所以今次我就去左位於九龍城的小曼谷海鮮燒烤屋. 餐廳環境舒服，有室內同室外，而且晚上8/9點仲有人會live唱歌，一邊食飯一邊聽歌都幾似真係係泰國咁.
食物方面, 我同朋友就揀咗一碟青木瓜沙律，飛天通菜，咖喱軟殻蟹法包，4串串燒(豬，雞，魷魚鬚，珍寶腸)，榴槤糯米飯.
先講一下碟青木瓜沙律 份量比想像中多, 味道又唔錯喎，連本身唔太好沙律嘅我都忍唔住食左。飛天通菜，個人覺得好食！不過帶少少辣，鐘意食少辣嘅朋友可以試試。
咁泰國餐廳點都要食埋個串燒同咖喱先叫黎過，所以我就叫左咖喱軟殻蟹法包同埋薄餅，薄餅同法包配咖喱好食，而且法包吸左啲咖哩，味道更出，不過建議兩個人嘅話唔洗叫加薄餅，可以改為叫其他串燒輕食，因為太多澱粉質會太飽.
串燒黎講豬同雞都燒得剛好，豬唔會太熟，雞好滑。因為豬太熟嘅話會好難食。魷魚鬚唔太乾，同有我嘅最愛珍寶腸！！真係好正！
又到左我最期待嘅甜品，好多餐廳有芒果糯米飯，但今次竟然俾我揾到榴連糯米飯，機會咁難得，緊係要try try。嘩！榴連肉絕不欺場，一飯配一肉不成問題，而且味道比得上出面的甜品店，喜歡榴連嘅朋友，值得一試！
整體嚟講, 地方幾好，有細枱，大枱，室內，室外，可以滿足到唔同人數同要求客人嘅需要。而且餐廳有請人來唱Live，氣氛真係好開心，又有得食又有得聽歌，又有得同朋友聚會，想食泰國野嘅你，記得約埋一大班朋友黎喇！
