唔一定要好貴～
之前聽朋友介紹中環蘭桂坊附近有一間樓上法國私房菜餐廳，質素頗高之餘仲價錢相宜～
適逢Happy Friday～ 一於同另一半去試下～～【 食。好。西 】！
一入到餐廳，裝潢偏向簡約風，燈光柔和微暗，牆上掛滿法國國旗及大量不同類型畫作
舖位雖不算大，但座位間距舒適且環境幽靜，再配以枱上燭光，頗有格調，好適合情侶或朋友聚會！
⭐️焗古也芝士洋蔥湯 ($68)
一上枱時，香濃洋蔥味隨即撲鼻以來～
先嚐一啖湯，洋蔥嘅甜味充份融合湯中，味道非常濃郁且香甜～ 好好味！
而法包亦烘得非常香脆，吸收了湯汁，再配上香濃古也芝士～食落一脆一軟～ 口感特別～ 仲有微微拉絲效果～ 
洋蔥味及芝士味～兩者配搭得恰到好處～ YUMMY～！
估唔到第一道菜已經充滿驚喜！
⭐️煙三文魚牛油果沙律 ($118)
煙三文魚同牛油果份量十足～ 沙律菜亦好新鮮。
配上酸酸甜甜嘅沙律汁及千島醬一齊食～ 好清新好醒胃～！
啱啱飲完咁濃郁嘅湯，再食哩個沙律，剛好可以中和返同埋幫味蕾重新refresh！為下一道主菜作好準備～！
⭐️法式地道鴨腿配鴨油煎薯仔 ($189)
鴨腿表皮烤得非常香脆
鴨身肉質則非常酥軟、肉理分明，輕輕一切，肉就能輕易撕下。
鴨味濃郁且鹹香無比～ 而旁邊嘅煎薯仔亦值得一讚！ 廚師特別用鴨油煎香～ 食落份外滋味！
整體烹調得非常出色！我同另一半都食得停唔到口 ！【必點之作】！⭐️海鮮墨魚意粉 ($168)
一上枱～ 第一反應就係「好足料！！」
海鮮鋪滿整碟意粉上。
蜆肉好鮮甜又無沙， 帶子大大粒又肥美，鮮蝦爽口又彈牙！
墨汁意粉烹調得啱啱好，軟硬度適中有咬口。最特別之處係墨魚汁能夠鎖入每條意粉中，而唔會食到成嘴都係黑色～ 食落仲慢慢滲出當中嘅鮮味～另外廚師仲加入左番茄、蒜蓉、香草等一齊炒香，令整體味道更豐富又惹味。
⭐️朱古力心太軟配雲呢拿雪糕 ($78)
食心太軟最期待～ 當然就係切開餅身，睇住內藏嘅朱古力一湧而出嘅一刻！
睇相就知～～ 流心效果非常成功！
好治癒呀～～～～～
朱古力味非常濃郁～但唔會太甜～ 再配上雲呢拿果仁雪糕一齊食～一冷一熱口感～ 大滿足～！
為今頓晚餐劃上完美句號。
今晚的確有驚喜！
估不到喺一間樓上小店都能夠食到如此有水準法國菜。價位亦非常合理～！！ 老闆娘同廚師感覺好親切～加上餐廳環境舒適又幽靜～ 下次一定要再臨試埋其他菜式！
