因為疫情關係所以都要排一排隊先有位，不過都唔算耐，而且員工都非常之體貼，詢問我哋各種要求，盡量配合我哋，非常唔錯！
我哋一一共四個人去食，分左兩張枱，呢張單係我同朋友A嘅單，我哋每人帶咗一個主食，一個飲品，感覺唔算特別貴，而且份量OK，非常好！
🍝Smoked Salmon and Crab Roe Angel Hair $88
呢份係我叫嘅主食，我等緊嘅時候，睇餐牌已經超級想食呢一個，原本冇為意係天使面，等我仲以為係普通意粉，有少少唔開心， anyway我覺得以天使面來講都算好食，唔會太碎！三文魚就非常好食，份量都好多，我覺得好好食。所以我覺得如果想試呢個就放心叫啦，不過不失不錯！
☕️Mocha $38
我覺得去呢一間餐廳，至少一定要嗌一杯咖啡，因為佢嘅拉花係非常之靚，我甚至覺得係呢間餐廳嘅主打！果然一嚟到，上菜速度已經係非常之快，而且個花亦都係非常之標準嘅靚，所以我覺得一定要嗌，我好滿意！飲落呢，就正正常常咁啦，就係普通mocha啦，因為我唔太識咖啡，唔作評價啦！
☕️Americano $30
呢個係朋友A叫嘅，唔太清楚味道！
🥩Slow-cooked Pulled Pork Penne $88
呢份係隔離枱嘅朋友B叫嘅，我原本都想試，佢話味道唔錯，而且份量比佢想像中嘅多好多，我就覺得好似好好食咁啦，最後佢好似食唔晒仲外賣攞走添！
