Nuocmam French Vietnamese Cuisine

差點忘記了這間餐廳，開張第一天已幫襯，但只此一次, 感覺是不去也罷。已經有心理準備第一天會亂, 要等, 但估唔到會咁。
叫了二人餐, 有"海南雞"(他們不是叫海南雞的, 但忘記了叫咩, 不過切切實實是海南雞囉), 炒菜, 炸春卷, 蜆湯, 糙米飯, 甜品, 預咗份量細, 所以叫多個"青口"。當日客不多, 應該是真正比錢幫襯的客不多, 唔使錢老闆請來試餐的客就多。
幫我地落單個經理好叻囉, 唔使寫低, 記得我地叫咩(actually 都係兩個order啫)預咗漏單, 結果真係。
二人餐嗰海南雞好快上, 份量超少, 比大家樂份量還少。我和bf一人3件咁多, 味道一般。等左好耐, 等到呆左都無人理我地，之後上湯, 都係一般, 反而春卷熱辣辣, 唔錯。再等左好耐, 炒菜上場, 嘩, 我以為去錯隔離別府, 食炒野菜哩, 炒椰菜, 一人兩啖食哂。諗住青口要煮耐啲, 就唔吹佢啦。於是問個侍應二人餐嗰糙米飯係碟上定碗上，點知佢答我係跟海南雞上嗰喎。吓！海南雞食完好耐囉噃，其他菜都食哂, 咪無嘢送飯囉。嗰侍應聽完好驚咁即刻出一碗飯比我地, 記住係一碗囉, 一碗好似酒樓細碗仔size咁大。因為已經無哂餸, 我無食囉, 我bf食左一啖都唔食, 因為無味，諗住等青口到才食埋佢。我問個侍應, 二人餐係唔係得一碗飯, 佢竟然話係。我見隔離枱都係叫同一個餐, 但有兩碗, 問佢點解, 佢話唔知！不過隔離枱啲飯都係食完哂所有野先出囉, 好明顯係樓面廚房無溝通邊個負責出飯囉。又等左好耐, 忍唔住問個經理(落單嗰個)追單, 因為青口仲未上, 佢無厘表情點吓頭, 跟住行開, 然後甜品都上埋, 佢先好似小新做錯事既表情, 笑住話無落單, sorry都無聲就走開, 個captain見我地黑哂面, 就行埋來say sorry, 話請飲咖啡, 話新開張同事唔熟手, 我答佢係經理幫我地落單, 佢竟然答我"等我坐佢個位就唔會發生咁既事"，所以一句講哂, 這間餐廳, 不去也罷。