。今日就嚟試一試呢間打住米芝蓮一星旗號嘅莆田！
下午茶咁多樣嘢食，先至收$49一位，十分吸引。
2樣點心就揀咗杞子白米糕同埋酥脆莆田扁肉，由於未試過扁肉，所以出於好奇就叫咗佢。主食就叫咗相當有名嘅興化炒米粉！最後仲有一份跟餐甜品，但無寫明係邊款，所以都有啲期待！
等待期間就食住呢個前菜先！酸酸鹹鹹辣辣咁嘅味，又幾滋味。不過如果係想窮食嘅朋友就可能要留意吓啦，因為呢小碟都會收返10蚊嫁。但我就唔介意嘅，難得嚟到，不妨一試！
食到7788嘅時候就上咗點心同埋甜點啦！無諗到上菜都用咁精緻嘅碟仔同埋木具，眼前一亮
！個白米糕就正常發揮，我本身都鍾意食呢啲糕點，覺得米味都幾出！同埋都有飽腹感嘅。個扁肉我就帶住好奇心咁試，一試覺得其實姐係細粒版嘅鍋貼，但就真係好小型嘅版本🤣。反而個蓮子雪耳湯食落都滋潤嘅，但係就完全食唔出味，有啲失望。
主菜就係興化炒米粉！莆田嘅米粉真係好出色。首先，個米粉嘅口感係完全唔同平時食嗰啲，一送上嚟已經見到好似啲好細密嘅網咁，食落略略煙韌，落味啱啱好，唔會太鹹亦都唔會太淡！而且可以見到雖然係下午茶size, 但係都係落足料喎
。呢個滿分！
食食吓覺得啲嘢食咁出色，唔點返杯嘢飲好似掙咁啲嘢咁，見menu上面咁落力介紹呢杯紅毛榴槤汁，就試一試佢。
結果飲後感就係完全唔值$36咁貴，首先個size同menu上面嘅size都差咁多先，第二就係完全唔覺得來莆田必點，只係好普通水準嘅一杯嘢飲，唔係難飲，但吹大咗！
其實啲嘢食嘅原味已經好夠，所以我就無落到辣媽醬入啲嘢食度。但見個外表咁吸引，都有試咗一小啖
, 佢唔會太辣，有適當調味！下次再食會試吓落入主食度
總結嚟講，想揀有質素又飽肚嘅下午茶食嘅話，莆田就最好不過。但唯一缺點係4點至到5點半會閂一閂，但我3:45先到都仲比我入座，嘢食都好快嚟齊嘅。如果想呢段時間食嘅朋友又想坐耐啲嘅話要留意返啦。
