忘不了拉麵小籠包 (Closed)

是晚上海之夜~好耐無食過上海野啦，突然TILL起根筋想食，CALL齊同事們收工一齊去擦餐飽XD酸辣湯: 材料有粉絲﹑木耳﹑豆腐粒﹑腐竹﹑等等，酸辣度黎講我覺得偏辣，反而酸味唔係好夠，呢個湯四個人都可以每人有兩碗，其實都幾大兜! 材料都豐富，唔會淨係得湯無料，不錯不錯!本幫黑醋排骨: 黑醋味濃，一上菜已經係陣陣既黑醋香味，黑醋酸中帶甜，香味四溢，真係令人流晒口水。另外，排骨都醃得好入味，完全吸收晒黑醋既香味，奈何排骨骨多過肉，相對無乜嚼感，享受唔到啖啖肉既滋味!蒜泥白肉: 蒜泥味重，帶點辣但係咬多兩啖有麻麻既感覺，幾得意。白肉方面，肥膏比較多，肉就相對比較少啦，因為要將肥膏咬出黎，所以無左啖啖肉既感覺。值得一提就係蒜泥白肉有粉皮襯底，粉皮對呢個餸起左好多既作用，蒜泥白肉如果淨食可能會愈黎愈麻，而且有點油膩，但係加左粉皮好似中和左咁，不錯!