福元湯圓

Open Now

Now Closed

一家人提早喺屋企做中秋節，家人買咗生料芝麻湯丸做飯後甜品，一盒10粒配上兩小碗薑味糖水。開爐水滾後放生料芝麻湯丸，當湯丸浮起就撈起來備用。用煲加熱薑味糖水，因為我個人比較鍾意薑辣味，所以另加咗幾塊薄薄薑片，糖水滾起就落已煮起湯丸再稍微悶煮1、2分鐘之後就食得，非常方便。薑味糖水入口順喉，甜味啱啱好，而且薑味好出，薑嘅辣味微微刺激，但係一啲都唔會嗆喉，飲一啖就即刻感覺暖烘烘。湯圓咬開一半，湯圓皮口感煙韌軟糯，香滑流心芝麻餡即時湧出，黑芝麻味道香甜濃郁，口感粘稠順滑，會令你忍唔住一粒接一粒放入口。一整粒放入口時，流心芝麻餡一爆而出，芝麻香氣由口腔衝上鼻腔，稠滑黑芝麻餡充斥成個口腔，嗰刻真係唔捨得吞咗佢落肚，想再嗒耐啲。第一次食已經愛上，有機會一定會去舖頭幫襯。