。
2
一坐低即刻點左個三點蟹先，因為係旅行團有機會食的但礙於內地嘅生蟹安全所以無食到。但返到黎香港係呢度當然放心大吃特吃啦。
呢個三點蟹醃鮮真係無得頂，鹹甜有致當中蒜頭、辣椒與香料味均勻，一口吸吮軟腍的蟹肉，嗰種醃漬鮮味着實令人難以忘懷，其間仲隱隱散發出酒香令蟹肉嘅味道層次更深厚。而且唔會死咸，空口食完都唔覺口渴。
螄蚶的鮮甜又係另一種享受，因為醃漬螄蚶嘅醬汁偏淡口，所以將肥美螄蚶肉連血水一併吃下，那種鮮甜可算話敢試嘅朋友一定會愛上。加上特別開殼夾，輕輕一啪就將蚶肉取出，一粒接一粒送入口十分過癮。
之後就係打冷必點之一，酥炸蠔餅。雖則經過油炸但無乜油羶味，係酥脆粉漿包裹下蠔仔肉仲保持濕潤。同埋調好左味食落唔有蠔仔腥味，輕輕點一點魚露提鮮，香口又好食。
滷水鵝，單睇外觀上晒色就知道滷左夠耐。入口鵝肉腍身中帶點咬口，又夠入味當中嘅鵝油、鵝汁與滷水融為一體色香味俱全。
因為知道呢度嘅滷水夠正，所以再追加埋個鵝肝。經過低溫及長時間浸熟鵝肝，入味之餘仲保持鵝肝嫩滑絲質口感，唔知仲以為自己食緊下面墊底嘅豆腐。食完滷水香味同鵝肝甘香亦充斥口腔內，久久不散
。
而且不能錯過墊底豆腐片，因為佢吸收晒滷水嘅咸香同鵝嘅精華，絕對唔俾鵝肉同肝遜色。
鵝腸非常爽口，拉得也很直而且依附在腸衣的肥膏沒有全數刮走，所以食時仍會有淡淡鵝酥味發出。正正係呢啲嘅肥膏先會造就到咬勁同味道十足嘅好味鵝腸出黎，美食當前健康飲食可以稍微讓步一下
。
潮州凍馬友。因為馬友魚本身肉質鮮甜脂肪比例又夠高，所以凍食係一個唔錯選擇。原條馬友以粗鹽醃製後蒸熟雪凍，食落魚嘅油脂甘甜平衡左醃製嘅微鹹的味道，肉質綿滑緊緻魚味香濃，點埋普寧豆醬同食更美味。
最後大家再點左幾個下酒菜，啤啤佢。蒜香骨同小炒王鑊氣同火候都好夠，咸酥香口味道非常適合用黎佐酒。
黃金鮮魷入口熱辣辣，鮮魷魚放入拌炒至冒泡泡嘅鹹蛋碎中形成一層金沙薄膜。食落咸香又爽口加上魷魚大大件，所以唔似出面因為細細條好容易炸到乾爭爭，無晒口感味道
。多得團友建議黎到呢度，如果唔係都食唔到咁正宗味道又價廉物美嘅潮州菜，下次要食都可以唔使再跟團返大陸了，近近埋搭個地鐵就過到黎夠晒就腳方便。
下次要黎補一補了
。
