連行多兩步都唔想，就揀對面又快又平的車仔麵醫肚。麵店新開了一段時間，但一直都沒有幫襯過，門面幾特別，鑲了兩個單車轆，具代表性，還有貼了名星和菜式相片，幾吸引喎！
內裏裝潢都幾特別，灰泥牆身配紅磚，寫上大大個店名，細看一下，旁邊畫上一輛小單車，真有心思！另一邊還有兩大塊簽名板和貼滿相片，但最搶睇還是兩輛真實比例的單車，難道店主是單車選手？
地方都幾寬敞，有一排泊牆的長椅配二至四人枱，中間有多張四人枱，走入一點還預設了三排四至六人枱，及一個半開放式廚房。
每枱均放有點菜紙、筆和三款調味醬。五張點菜紙不同顏色，分別有不同湯底的車仔麵、大碗飯、小食和飲料。
***********************
先來一碟唐生菜（$16）可配蠔油、腩汁、上湯或全走，我就揀了上湯。青綠清爽，少油少鹽，清新健康，岩晒我。
***********************
輪到車仔麵，基本可揀兩餸、三餸或四餸麵，再加餸就每款$8。選了姬松茸蟲草花養生湯（素），配米粉及六餸（$68），大滿足。先讚一讚，逢有濃味的餸料，即是冬菇、溏心蛋 和柱候牛腩 都分碟上，令湯底保持原汁原味，正！而碗中就有麻辣雪魚湯包、蜂巢豆腐 和蘿蔔。
馬上呷一口湯，熱度十足，甘香順喉，味道一流，還有香腍的合桃、爽口的姬松茸 和蟲草花，的確真材實料，夠火喉。揀了米粉，索湯力不強，故喜歡舀一羹連湯大大啖吃，最滋味！
1
先嚐碗中的餸料，蜂巢豆腐有三件，如海綿般吸收晒養生湯，咬一口，爆出甘香的味道；麻辣雪魚湯包共有兩粒，幾彈牙的外層藏着麻辣的肉碎，辣度不算厲害，岩我！蘿蔔約有四五件，多汁無渣，很腍嫩，味道很清甜，很討我歡喜，是我個人推介之一。
輪到分碟上的餸料，柱候牛腩夾少許肥膏，既有咬口，亦挺腍嫩，且相當入味，可惜沒有我喜歡的牛筋；至於冬菇共有四大隻，原隻上枱，大大隻又厚身，睇落更吸引，啖啖爽口兼滿有菇汁，烹調入味，正! 原隻的溏心蛋算不上流心狀，但也幾黏滑和富蛋香，同樣弄得入味，也不錯!
***********************
飲品有跟餐半價優惠，揀了杯熱薑汁咖啡 （$10/跟餐半價），香濃的咖啡中滲出薑的辛辣，辣度剛好，兩者味道平均，又夠熱，如果少一點甜就更合我口味。
------------------------------
從未試過把車仔麵的湯喝至一滴不留，今次例外，還覺得不夠喉，想添湯，相信真是每日新鮮熬製，絕無味精，果然是招牌鎮店湯底，今次嚐了姬松茸蟲草花養生湯，下次一於來一碗白果胡椒豬肚湯。
