32度烈日當空周身汗嘅狀態，中午十二點幾，店裏邊得2個客，到底係大熱天時唔係好適合食羊肉定食評所致？廣告後自有分曉🫨
入門口嗰刻店員阿姨問幾多個同埋隨便坐，暫時完全唔覺得有其他人所講嘅態度惡劣，由於天氣實在太熱，冇乜胃口，只係嗌咗一個羊雜粉同一客秘製羊排再加竹蔗茅根降降暑。
1
個粉係可以選擇辣唔辣同埋大中小辣，我揀咗中辣食落去完全唔覺得佢辣，粉方面係完全吸唔到個湯嘅味道，仲有最大嘅問題係同個別嘅食評所提及嘅一樣，啲羊嘅份量係勁少，可以算得上係羊雜（丁）以下有相為證.
所以基本上你問我我真係食唔出佢哋係羊嘅內臟，因為我連羊嘅羶味食唔到，而且個湯底都係冇乜味好淡下，難怪啲粉都冇味。
相比之下個秘製羊排就好味好多
，真係好濃羊味，有少少煙靭，但係唔係咬唔開嘅狀態，而且o趙多幾下羊味仲突出，加上肥瘦均勻可以話係相當好食😋
支竹蔗茅根，實在令人太過失望，我諗住會好似火鍋店咁，點都有啲自家製嘅竹蔗茅根咁先似樣，點知竟然喺鴻福堂。
整體而言食物方面好壞參半，我唔建議食粉面類，無論係乾濕。但係嗰啲小食類，例如肉串，肉排嗰啲我都覺得好味。
關於服務態度方面，由我入嚟到離開收銀嗰刻，丫姐嘅態度都唔錯，不過有一點就係佢對住本地人相對有禮貌但對住啲操普通話嘅朋友仔反而係粗聲粗氣，但就現場所見內地嘅朋友仔講嘢都有啲粗聲粗氣，可能佢為咗迎合返對方姐
6
