所以，日本黑毛和牛120分鐘放題我們又來了！呢度打邊爐真係好好，一人一鍋，自己揀自己鍾意嘅湯底，又唔使擔心食人哋口水尾，所以特別鍾意呢度打邊爐！
今次湯底選了四季文昌椰子雞湯，真係落咗真椰子肉同埋雞去煲，配搭特別好味，推介推介！
揀得最貴嗰餐梗係要食日本黑毛和牛肩胛肉，塊塊雪花都靚到不得了，鮮嫩嘅粉紅色配搭均勻嘅白色條紋，每一片都足足手掌咁大，由於薄切，大概灼10秒就可以食，再點上辣椒豉油，一片塞滿成個咀，勁滿足！雖然油花咁勁，但係識落完全唔會覺得肥膩，好神奇，一盒有兩塊，足足encore左六次😂
特選牛腹肉都係唔能夠錯過，食起嚟比較輕盈，同埋有牛肉味，都嫩嘅，我都幾鍾意食㗎！
老公就話西班牙五花肉片啱晒佢心水，軟綿綿嘅口感喎！
當然熄咗好多款唔同嘅美食啦！蝦滑、即炸午餐肉都係人氣食品！自助區都有好多食物，超過10款蔬菜、炸雞、多達20種丸類、飲品、甜品都應有盡有！我仲玩咗自製格仔餅，原來好容易， 2分鐘就整到，配搭埋焦糖醬同埋提拉米蘇，有得玩，又好食，真係冇得彈！
原來仲有糕點時光禮盒售賣，只售$79，見幾得意，都整咗盒玩吓！
