蛇王易

自己本身就好少專登去食蛇，唔抗拒，但亦唔算好鍾意，以前我哋一班死佬都曾經搞過啲蛇宴，一大棚人高高興興嘛。不過，有死佬唔老實呃兄弟，加埋疫情，我哋嘅死佬飯局（就算小飯局）都停晒，唔知何時先再搞番。早前，晌網上睇到銅鑼灣出名蛇店「蛇王二」嘅班底再出江湖，以「蛇王易」之名晌灣仔開咗新店，是夜無飯開，一支公貪得意過嚟幫襯吓。 

1

蛇王易

比起「蛇王二」，雖然新店地方新簇咗，光猛咗，但就無咗蛇鋪嗰種韻味，望上去，就只喺一家賣燒味、賣臘味嘅中式小廚餐廳。當然，時代總會變！ 

雖然枱上已放有餐牌，不過，好似跟牆上嘅巨型餐牌又有啲唔同，所以，都一齊貼晒出嚟俾大家參考。基本上，主打都喺燒味、臘味，仲有啲燉湯及套餐。因為得一支公，蛇羹定燉湯，臘味定燒味，只可以二擇其一。

1

特價蛇羹套餐 $110
嚟得呢度，相信有唔少人喺衝着蛇羹而嚟，所以，眼見唔少人都喺叫「特價蛇羹套餐」，已包蛇羹、飯及油菜，我亦唔使多諗揀呢個，只需要諗吓想食脆皮潤腸飯定喺臘味糯米飯。先嚟碗蛇羹，正如食火鍋，依家食蛇都唔分季節喇，碗蛇羹確喺幾足料，羹內有大量一絲絲蛇肉、冬菇絲、木耳絲、果皮絲，淨喺食碗羹都飽飽哋肚，再者，味道都幾香，質感又唔錯。 

秘製菊花蛇羹

秘製菊花蛇羹

而飯品揀咗臘味糯米飯，覺得比起潤腸飯好似喺多啲料咁。除了飯面放咗兩截臘腸、潤腸之外，飯內仲有唔少臘肉、蝦米、花生，臘腸唔算肥，而潤腸真喺好食，咬落真喺有啲脆皮感，糯米飯雖然都軟糯，但個人覺得有少少爛。 

臘味糯米飯

臘味糯米飯

碟蠔油生菜就無咩太多評語，喺淥得耐咗，完全無晒生菜嘅脆口感，唯一喺勝在大碟，平衡番啲臘味嘢。 

油菜

再幫襯「蛇王易」，無對上一次感覺咁大，不過，上次喺飲燉湯，而唔喺食蛇羹，亦見唔少客人嚟飲碗燉湯，似乎，燉湯更勝蛇羹！