Selected Item -50%
！餐廳佔全層，一出電梯就喺餐廳，環境四四正正，有別傳統嘅泰國餐廳，無晒啲滿天神佛，裝修又幾骨子，尤其啲吊燈，最具東南亞風，而且，甚具氣氛。此外，另一賣點喺外出有一列露台位，望過對面就喺九龍公園，整片園林景，就算夜晚感覺都好唔錯，加上每枱都擺有一盞枱燈，氣氛十足:)；就算日頭嚟，相信幾有空中花園嘅感覺，予人一份休閒感。近排天氣涼番晒，坐出去就感覺一流，同埋我見店家有晌露台位加設冷氣設備，相信天熱嚟都一樣可以坐出去。平時食日本菜先會比較注意到啲餐具，但晌度所見，啲用餐碟都好靚。講番食，餐牌好大本，實在有啲難影，只喺影幾頁留個記錄。無論食物定飲品，選擇多多，而且，圖文並茂，相片亦影得吸引，真喺好多嘢都相試。順帶一提，星期日至四晚，晚市仲推出個兩小時任飲，$98就可以任飲紅白餐酒、手工氈酒、泰國啤酒、雞尾酒、泰式特飲……等等，飲兩杯都番本啦
，所以，就算唔嚟食嘢，三幾個老死飲吓嘢，傾吓偈都好唔錯。
芒果沙冰 $68
不過，我哋就無揀晚市任飲，一來唔好酒，二來嗌一杯沙冰已經夠飲成晚到突。有相你睇，啲沙冰堅喺超大杯，以芒果肉嚟打，芒果味道濃郁，加上冰沙打得細滑，口感甚佳，甜度又啱啱好，正呀喂。奇異果沙冰 $68椰子沙冰、菠蘿沙冰都見得多，另外一位友人就試咗甚少見嘅奇異果沙冰，綠得嚟唔喺好誇張嘅綠色，但嗰份奇異果味叫人感覺清新，味道微微酸，但富奇異果香味，真喺有少少驚喜感。啖啖蟹肉蟹膏炒蛋配薄餅 $268小弟向來都幾鍾意食蟹，但就好怕拆蟹肉，麻煩嘛，但見到呢道新推廣菜式：「啖啖蟹肉」，合晒我心水啦。賣相確喺非常吸引，因為面頭放有一大堆生拆蟹肉，味道鮮甜到不得了，而下面就喺蟹膏炒蛋，炒得極之嫩滑，又富蛋香。至於晌薄餅之上，放上青瓜片，再加埋蟹肉、炒蛋，一次過入口，不單口感豐富，而且，味道有疊加效應，令食味更多元、更有層次感。燒牛肉沙律 $138為咗食得健康啲，點番一道沙律就最正路，燒牛肉用咗安格斯質素，自然唔差得去邊，咬落好軟腍，又有肉香，而沙律用上生菜、青瓜、紫洋蔥、甘筍絲、芹菜……等等，醬汁味道酸酸辣辣，而辣勁頗強，好泰式風味。清邁香酥酸辣魚 $248泰菜中有好多魚鮮嘅菜式，例如明爐烏頭，但睇見呢一道酸辣魚喺放晌餐牌中頭幾頁嘅新派泰菜中，就好有興趣一試。賣相比餐牌中嘅相片更靚、更立體，最窩心喺將原條魚鮮起成兩大片魚柳，食得更方便，而外皮炸得酥脆不膩，魚肉卻喺非常之嫩滑細緻，魚鮮味十足，唔喺雪藏貨可比，酸辣汁令人食落更加胃口大開。泰式蝦肉炒金邊粉 $128泰式嘅炒粉麵，以金邊粉最討歡心，亦食得比較多，就好似嗌乾牛河咁。碟金邊粉非常大碟，好似加底咁多，而且，金邊粉炒得濕潤，質感保持韌勁，味道酸酸甜甜，除有大大隻鮮蝦外，仲有啲豆腐乾、蛋花碎、怡保芽菜，旁邊佐以花生碎、青檸，令食味更豐富。芒果糯米飯 $68本來甜品中有兩款特色蛋糕，但已經無供應，老友話無甜品餐飯唔夠完整，所以，試埋個泰式經典，就喺芒果糯米飯。估唔到師傅咁有心，將糯米飯砌成心形，而椰漿以小兜放晌一旁，自行添多添少。暖呼呼嘅糯米飯好煙韌，椰漿味道濃郁，加上芒果十分清甜，為今餐劃有個完美終結。多謝老友推介，「泰斗」無論晌環境、招呼，定喺啲食物，都讓人好滿意，加上有露台位嘅加持，又提供多些新派泰菜，自然成為餐廳嘅賣點
。…Read More
