甜西施研究所

Open Now

Now Closed

深水埗嚟講呢間糖水真係最好食，舖頭唔係好大，買完要企出去等。但！ ！真係好好食！冇諗過鋪仔細，味道同出品竟然可以好過啲大型連鎖店。我係食多芒仙草，芒果汁同奶嘅比例好好，西米好彈牙，仙草係我食過覺得最滑嘅，老實講，同五六十蚊一碗鮮芋仙嘅仙草有得輝，真係做得好好。芒果仲要好多，每一啖都有芒果肉。唯一可以挑剔嘅就係，甜品可以再凍少少，因為食嗰日都30幾度，如果芒果汁可以變沙冰就好啦。不過30幾蚊嚟講都算係超晒班。

呢間甜品店一直book mark咗好耐，睇佢哋IG啲片知道係小店經營，想去支持吓。去到見到店舖入面放咗好多芒果，見到老闆娘喺度親自揀緊芒果，已經感覺舖頭甜品唔會差得去邊。叫咗個多芒楊枝甘露，果然不出所料，非常出色，味道調校得啱啱好，每一啖都有嘢咬，唔會好似出面糖水舖成碗水咁。如果喺出面食要40幾蚊，但係唔好食，喺呢度$39就食到質素咁高嘅楊枝甘露，以後真係寧願喺呢度買，雖然冇堂食，但係買返屋企食都一樣咁享受。

開咗咁耐終於有機會去試，之前次次經過都見到好多人排隊，今日平日見冇咩人就去咗買，第一眼就比多芒系列嘅楊枝甘露吸引咗，見到佢display係超級多芒果，滿瀉咁滯，心諗係咪真係有咁足料？結果買完出到嚟係會冚蓋，的確係冇display裝得咁滿，正當我失望打開之際，原來入面嘅了一啲都唔少，係真係非常之多芒，基本上每一啖都會食到芒果，仲要勁大粒，好滿足。西米亦都非常彈牙，係大粒嘅西米，整體黎講唔錯，售價係$39，價錢公道。

去開黃金廣場，經過見到呢間糖水舖，見到玻璃櫃嘅展示品好吸引，就買咗兩碗返屋企試。一碗係多芒楊枝甘露，另一碗係芋泥桃膠小丸子。楊枝甘露同其他糖水舖有啲唔一樣，唔係剩係得芒果汁，仲有佢哋特製嘅椰奶，味道幾特別，仲有好多芒果，我比8分，如果西柚可以多少少就好。另外嗰個芋泥桃膠小丸子就真係好有驚喜，唔係講笑我冇食過咁好食嘅芋泥，非常之香濃，我食第一啖係非常之有驚喜，如果護理可以再多啲就完美，呢個我俾9分。

平時好少寫食評嘅我，今次忍唔住要寫返一篇。因為呢個多芒小丸子實在係太正，真係好好食，同埋超級多芒果，芒果全部都好甜，但係唔係死甜嗰隻。見到佢哋門口擺咗好多箱芒果，就知道佢哋唔係用罐頭水果，係真係逐隻逐隻芒果揀出嚟切，呢一點好值得欣賞。然後就係個小丸子真係好Q彈，好好味仲要本身自帶有少少甜味，加埋啲芒果汁同奶食真係絕配。放假過去大概等咗15分鐘，不過見門口都多人等緊，所以都冇埋怨等得耐，好食嘅嘢都係要等的

十分推介呢間糖水店，店舖細細，但做得好好。我係住喺深水埗，由開張幫襯到而家，水準一直維持得好好，由小店去到而家咁多人排隊，我都替佢開心。我最鍾意食佢哋嘅芋泥甜品，芋泥非常棉滑，但有少少椰香味，配埋椰汁鮮奶，桃膠，仲有小丸子，味道非常出色，仲要只係買38蚊，價錢絕對公道，性價比都好高。不過呢間甜品舖款式唔多，只有幾個系列，最多人食應該係芒果系列，門口放左好多芒果，希望佢地遲的之後可以推出更多甜品產品。

我覺得呢間應該係深水埗區性價比最高嘅糖水舖，$39有一大碗楊枝甘露，裏面係勁爆多芒果，西米亦都好彈牙。網上見到好多人推介呢間，本身都係抱住嚟試吓嘅心態，唔預佢會好好食，點知買完一擺落口，真係好驚艷，每一啖都好滿足，真係做得好好。唯一可惜係呢間嘢冇堂食，亦都冇立食位置，同朋友過嚟試，只可以揸住喺門口食，下次再過嚟會選擇揸車過嚟，咁可以喺車上面涼住冷氣食。希望遲啲會整返啲垃圾位俾客人，企喺門口食都好。

假日午飯時間買，等得唔算耐，5分鐘左右就有，收銀姐姐都好好，我第一次買好多嘢問黎問去佢都解答到。買左幾個返去同屋企人一齊食，真係有驚喜。芒果小丸子，芒果味十分香，仲有幾重椰奶味，好好味道，奶味同芒果味好夾，亦唔會搶左芒果味，拿捏得十分好。小丸子好彈牙有咬口，成碗芒果肉份量都令我振驚，真係超級多，好滿足。另外仲買左個芋泥桃膠小丸子，真係好好食，食完一啖仲想食，做得好滑。我小朋友兩個都爭住食，早知買多個！

見到深水埗開咗間外賣糖水舖 每日夜晚都大排長龍！門口放晒一箱箱嘅芒果🥭行過都聞到勁香…不過只做外賣，一次過買咗4桶試晒佢🥰😋佢哋嘅糖水份量好足料，全部大大桶🤣🤣真係2個人share都得，仲要只係3十幾四十蚊！性價比之王！去開深水埗買返屋企做宵夜真係一流🤤🤤希望佢地快啲開堂食店🥹🙏🏻-🥭多芒小丸子 $40經典芒果系列！必點！聽講店主會去果欄採購新鮮嘅芒果🥭芒果好鮮甜，完全唔酸好想讚吓佢哋嘅小丸子做得勁煙靭 另外加埋特製椰奶 ！perfect池😙🍡厚芋泥山野桃膠小丸子 $38非常濃郁嘅芋泥，甜度亦都唔會過甜配搭桃膠同埋小丸子 層次感upup🤤🍨紙醉金迷芋圓燒 $45 入面勁多料，有仙草、芋圓、紫米、芒果配特製椰奶芋圓都係做得非常出色，超級彈牙仲勁大粒，真係可以當晚餐食😹仲有海量嘅仙草底！🥛D24榴槤椰汁鮮奶燉雪燕 $48估唔到佢哋嘅榴槤都超有水準…一打開就聞到勁香(臭🤣) 畢起就見到兩大舊榴槤！配搭個雪燕嘅少少清涼+鮮甜味非常出色，我爸係多年榴連fans都話正🤣

呢間主打芒果，芋泥嘅糖水舖，實在令我好失望。成日見到佢好多人等，所以今次經過就試下，試完之後唔會再有下次。完全唔明點解咁多人買，可能因為新開，或者附近冇類似糖水。我叫咗芒果小丸子$40 上車食，味道就普普通通都係平時食開嘅芒果小丸子，重點係佢連最基本溫度都搞唔掂，食一啖，咦，點解唔凍嘅😅 ，再攪勻食多幾啖，都係唔凍，係直頭室溫，一啲都唔凍！！😅😅芒果小丸子唔凍簡直離晒譜，係咪太多人買，雪唔切啲食材？唔凍你咪講聲，又攞出嚟賣，夏天熱辣辣仲要食個室溫嘅芒果小丸子？！😅仲有，食食下咬到粒異物，感覺類似蛋殼，一咬就碎咗，我都唔知咩嚟。食咗少少成個掉咗，離晒譜。唔會有下次👋🏻

呢間一直都有幫襯開，覺得芒果甜品好好食，甜度適中，芒果十分甜也十分多，40蚊有找嚟講，性價比真係唔錯。平時我叫開多芒小丸子，小丸子好煙靭，加埋下面嘅西米一齊食非常有口感。今次嘗試新嘢，試埋芋泥桃膠水晶粉，本身我唔係特別喜歡食芋頭，但呢個好有驚喜，芋泥非常香滑，好好味，有芋頭味之餘，亦都有少少椰奶味，份量都係俾咗超級多，配埋椰汁桃膠非常夾。水晶粉就不過不失，類似啫喱咁。冇記錯呢個好似係$38，同樣係非常扺。

由啱啱開始已經幫襯開，講緊係未加價嗰陣已經幫襯過好多次，一個禮拜起碼買一兩次，見係小店就諗住支持吓。但係最近一次幫襯，過咗十幾分鐘諗住望吓攞得未，都未望到一眼～點知收銀位員工極唔耐煩咁話：出去等啦。再用趕我出去嘅手勢叫我出去等。唔會再有下次幫襯了，覺得多咗人食之後唔休做。