喜樂

Open Now

Now Closed

見元朗谷友推介喜樂個梳乎厘班戟，是晚特登嚟試下😋小店主推梳乎厘同雪花冰，仲有多款飲品同鹹甜小食，梳乎厘價錢58蚊起有兩件，都幾親民喎。⭐脆多多朱古力梳乎厘自己點咗朱古力口味嘅梳乎厘，雖然佢要脆多多，但係朱古力粉上面係淋咗黑糖珍珠，哈哈，開頭遠睇我以為係朱古力豆嚟㗎😆美麗的誤會。梳乎厘軟綿綿有蛋香，朱古力粉味濃微苦，正好中和返珍珠嘅甜味👍⭐超滿足奧利奧梳乎厘朋友點嘅oreo口味，上枱時已經有塌塌地嘅跡象😂oreo粉下得好多，整體嚟講微甜，係好食喎！⭐原味煉乳芝士條重點咗份炸芝士條，芝士味唔算好重，但炸得外脆內軟口感好正，點埋個煉奶甜甜鹹鹹咁又真係幾夾幾好食喎。⭐芝芝青提芝士奶蓋好厚有質感，有芝味又夠香滑，正！⭐雪山單樅個名咁詩情畫意但其實即係奶綠，個綠茶味幾幽香，要咗少少甜就啱啱好，茶香奶滑👍梳乎厘有水準值得一試，店內有少許座位可以堂食，梳乎厘嘛～梗係即整即食最正㗎啦。

呢間隱藏嘅甜品店，雖然細細間，但出品真係冇得輸！ 佢哋嘅Oreo梳乎厘脹卜卜，入口即化！Oreo碎脆脆哋，同綿密嘅梳乎厘簡直係絕配，甜度啱啱好，食完成個人都開心晒～ 士多啤梨雪花冰絕對係夏天消暑好物！牛奶冰打得超幼細，一啖落去即刻溶化，加上新鮮士多啤梨同自家製士多啤梨冰，酸酸甜甜好開胃，食完成個人涼浸浸！ 而且仲好靚好岩打卡仲有練乳芝士條，質地creamy得嚟又帶啲煙韌，煉奶嘅甜香慢慢滲出，真係忍唔住一啖接一啖！ 飲品方面，芝芝芒果真係冇得頂！芒果冰沙香甜濃郁，面頭嘅芝士奶蓋鹹鹹哋，同芒果出奇地夾，飲完成杯都唔會膩。而爆打白桃烏龍檸檬茶就夠晒清爽，白桃烏龍茶底清香，加上爆打過嘅檸檬，酸甜醒神，解膩一流！ 喜樂嘅甜品價錢親民，分量足料，真係食完成日想心思思再食

屋企附近遇上新開嘅甜品小店，估唔到係超有驚喜！甜品選擇都幾多，餐牌非常精彩😎😎令人超滿足既「奧利奧」「白玉豆乳威化」梳乎厘！唔係空氣感/食左好似無食個種！亦都唔係死實實成塊熱香餅個種！成件事滿滿蛋香，好鬆軟，但又好有實在既感覺，即叫即整，就係好食！平時空氣感嘅梳乎厘涼左就會變左一pat pat 但係呢個外賣拎到番屋企都依然保持到成個形態👍🏼👍🏼唔同味道嘅topping醬都好夾個梳乎厘 做到香港人對甜品嘅最高讚賞‘少少甜’ 真係鋪頭主打嘅甜品之一👍🏼👍🏼芒果椰乳沙冰： 雖然主打梳乎厘同雪花冰，但沙冰都好有驚喜！真材實料無添加、無加糖水，好香果味，夏天飲真係好爽！$38杯大大杯性價比好高冰糖雪耳燉雪梨：原本諗住中式糖水只係比偉大嘅母親滋潤吓，濕吓喉嚨，一打開：‘嘩’左一聲 見到成個雪梨，大大碗 味道唔會好甜亦都唔會水汪汪👍🏼👍🏼店細細但都充滿驚喜 真材實料性價比高 鋪頭入面有幾個可以坐嘅bar枱位 下次堂食一定會再試下雪花冰同d小食