Hei's Kitchen (Closed)

話說第一次寫食評，因為今次實在太嬲。呢間餐廳想同朋友試好耐，終於有時間黎試試。原本想試下佢個牛肉河，不過原來晚市無牛肉河。侍應叔叔誠意推介我地吃食北越牛肉酸鍋，仲話係獨家，見叔叔用心推介，我地梗係試下啦，盛惠$238，再另外加一，openrice訂坐88折並不適用。我之後仲叫多個油飯$15，再加四條串燒$48。個鍋送到，見到啲牛肉，即刻勁唔開胃，啲生牛肉係熟牛肉咁嘅顏色，並唔係鮮紅血。我問叔叔啲肉係咪唔新鮮呀（如圖），叔叔話冇問題架食得架。我心諗，你收我$238比啲咁嘅牛肉我？再試下啲牛肉，絕對任何餐廳嘅一人火鍋都有呢個質素，而且個價錢肯定平至少兩倍。仲有啲生菜，加埋應該有五塊左右 。 之後到個串燒（兩串雞，兩串豬），每一串得三分二隻女仔食指咁多肉，啲肉質，鞋左啲，完全食唔到任何肉味，唉。不過，呢個串燒有88折，不過都係要加一。 最後，油飯係最好食，盛惠$15 加一再openrice 88折。飲粒粒分明，煙煙韌韌咁，係有啲油，有啲黃黃地色，但完全無黃薑味，無油香味，但已經係最好食。 結論，呢餐我食左三百幾蚊，無肚疴，無食物中毒，但環境非常乾淨，如果你想同班fd搵個地方輕鬆吹下水，呢度可能岩你，但我絕對唔會再去。…Read More

睇個門面平平無奇 竟然食完返尋味😋串燒嘅沙嗲汁好香🤤肉質好腍酸菜魚較辣 但湯底好好味送飯食一流！魚塊好多🤤好似食極都仲有咁最後就係主角 牛肉酸鍋🤤個煲好靚😂打完卡可以開餐！湯底較酸但好開胃 牛肉 紫洋蔥 芽菜 呢個組合真係一試難忘🤤👍🏻…Read More

放工去觀塘拎身分證，點知拎完突然落大雨，打算去附近餐廳食晚餐避雨，無意中行過見到The Wave有泰越餐廳就決定一試。我地兩個人叫左一個小食拼盤，馬拉盞豬頸肉炒椰菜苗同泰式冬陰功海鮮金邊粉。味道好香口同埋份量足夠，食到舔舔脷！值得一讚係店員哥哥好親切，人情味好足夠！佢仲另外推介左越式酸牛肉湯，我地決定下次再黎試一試！最吸引係Openrice 提早訂坐仲會有折扣優惠，估唔到落雨賜左個美食意外驚喜俾我地🥰…Read More

媽媽節一家人出去食飯慶祝去The Wave食泰國野個到環境ok 唔算太多人，由地鐵站行過去都近，易搵同唔耐冬陰公湯唔太辣，少少酸好易入口又夠多料青木瓜沙律，酸酸甜甜又爽口，食完好開胃皮蛋比較普通串燒連埋佢個醬好味，最鍾意食沙嗲醬食泰國野必食炒椰菜小食拼盤同海南雞有水準但炒米面好似無咁特別 比較普通母親節每台都有送左芒果糯米飯做甜品同埋送1枝花俾所有媽媽，👩表示有花收好開心😍😍做仔女既表示，只要媽媽開心，乜都夠啦😘😘😘祝所有父母身體健康，長命百歲😘…Read More

餐廳是包含了泰菜，越南菜，中菜嘅特色。 朋友就算唔係最鍾意食泰菜都可以有其他選擇，呢樣係幾好👍侍應哥哥強烈推薦店舖的*特色北越牛肉酸鍋*又很用心教我地要點樣食湯底香濃帶點酸味非常開胃作為第一道菜絕對適合。生牛肉很新鮮，五分熟擺落口滑溜香口絕對想再encore! 推廣期內可免費添湯底。香煎墨魚扒，如果可以切厚一點和增加一點蝦膠彈牙質感就更好了。招牌蛋花咖哩軟殼蟹配薄餅， 咖哩汁炒得香口亦夠味，薯仔亦有炸過，只係略嫌軟殼蟹本身太鹹了，鹹到最好幾件都吃不下了。。。。呢度居然有酸菜魚食！我地問左侍應叔叔，決定試他推薦的Heis水煮魚。 因為本身唔太食得辣 ，已經叫了小辣， 估唔到個麻辣依然咁強烈，麻香味十分濃厚， 麻薯粉十分煙韌好吃 ，同行朋友大讚配上白飯食一流 題外話：因本人食辣十分之差勁，食左兩片而且 辣到紅曬標眼水 另一位侍應哥哥很貼心，拿了一大碗熱水給我過水，又給了我一杯冰凍烏龍茶解辣最後點了一個芒果糯米飯為整餐晚餐劃上完美嘅句號。 糯米飯略嫌黏性過強， 如果可以配上多一點汁更好。飲品方面，龍眼冰挺推薦，一大杯裏面有十幾粒龍眼肉總括嚟講，食物質素不俗。 牛肉酸鍋最有驚喜食得辣嘅朋友仔絕對可以一試 酸菜魚/水煮魚。值得一提的係這裡的所有侍應都很有禮貌下次黎再試下其他野食…Read More