Video
Read full review
2024-05-08
186 views
円相 ENSO📍尖沙咀漆咸圍1-3號地舖呢晚牙科覆診後，我同朋友決定喺尖沙咀食埋飯，行埋就快結業嘅丸急後先返屋企。我哋四圍行，沿路留意有無啲有興趣嘅餐廳。行到一條人影稀少嘅街道，見到有間門面幾特別嘅餐廳，睇睇餐牌，知道係食日本菜就二話不說入咗去。店內裝修簡約得嚟，又好有格調，牆上整齊地放住唔同嘅擺設，仲掛有結他同用手寫嘅簡介，同一般嘅居酒屋/酒吧唔同，別有一番風格。 💰$42なすの淺漬け 🍆作為茄子頭號粉絲，我又點可以錯過漬茄子呢？漬茄子係日本家庭嘅常備菜之一，作為頭盤食非常輕盈清新，茄子以味醂及糖等混合而成嘅日式醬汁醃漬，咬落軟身多汁，比燒茄子來得清新。 💰$88いかげそ揚げ 🦑魷魚鬚即叫即炸，上檯仲係熱辣辣，口感非常香脆。粉漿厚度適中，混入紫菜碎加添風味，炸皮脆而不膩，完美地包裹住爽口嘅魷魚鬚。呢度嘅酒品種類豐富，而且居酒屋嘅氛圍亦好適合飲返幾杯，如果唔係第二日要返工，相信朋友已經食住呢道滋味佐酒小食，叫返兩杯杯嚟飲。 💰$72明太子だし巻き卵 🍳明太子玉子燒係呢度嘅大人気嘅招牌菜，人人呢到都會叫返件！厚燒玉子層次豐富，口感綿密細嫩，再係表面唧上大量鹹鮮嘅明太子醬，又灑上木魚碎，除
📍尖沙咀漆咸圍1-3號地舖
呢晚牙科覆診後，我同朋友決定喺尖沙咀食埋飯，行埋就快結業嘅丸急後先返屋企。我哋四圍行，沿路留意有無啲有興趣嘅餐廳。行到一條人影稀少嘅街道，見到有間門面幾特別嘅餐廳，睇睇餐牌，知道係食日本菜就二話不說入咗去。
店內裝修簡約得嚟，又好有格調，牆上整齊地放住唔同嘅擺設，仲掛有結他同用手寫嘅簡介，同一般嘅居酒屋/酒吧唔同，別有一番風格。
[價錢 Price]
💰$42
なすの淺漬け 🍆
作為茄子頭號粉絲，我又點可以錯過漬茄子呢？漬茄子係日本家庭嘅常備菜之一，作為頭盤食非常輕盈清新，茄子以味醂及糖等混合而成嘅日式醬汁醃漬，咬落軟身多汁，比燒茄子來得清新。
[價錢 Price]
💰$88
いかげそ揚げ 🦑
魷魚鬚即叫即炸，上檯仲係熱辣辣，口感非常香脆。粉漿厚度適中，混入紫菜碎加添風味，炸皮脆而不膩，完美地包裹住爽口嘅魷魚鬚。呢度嘅酒品種類豐富，而且居酒屋嘅氛圍亦好適合飲返幾杯，如果唔係第二日要返工，相信朋友已經食住呢道滋味佐酒小食，叫返兩杯杯嚟飲。
[價錢 Price]
💰$72
明太子だし巻き卵 🍳
明太子玉子燒係呢度嘅大人気嘅招牌菜，人人呢到都會叫返件！厚燒玉子層次豐富，口感綿密細嫩，再係表面唧上大量鹹鮮嘅明太子醬，又灑上木魚碎，除咗味道好之外，賣相亦好吸引。我同朋友經常食日本菜，食過數之不盡嘅明太子玉子燒，朋友邊食邊讚好，敢講呢度嘅玉子燒係我哋食過數一數二好食嘅，大家如對明太子玉子燒情有獨鍾，必定要嚟試一次！
[價錢 Price]
💰$46
明太子おにぎり 🍙
燒飯糰一向係我同朋友嘅favourite，我哋熱愛到曾經自己係屋企自己整嚟食。今次見到有燒飯糰，都不妨貪心一啲，佢個明太子version試試。飯糰用既珍珠米比較黏身，表面塗上濃香嘅醬油後烤製，再係上面塗滿明太子醬，滋味無窮。
[價錢 Price]
💰$118
明太子とエビの冷やしウドン 🍜
唔知道大家有無留意到，雖然唔係討厭，但其實我唔太鍾意食烏冬，所以一般都係同大家分享拉麵比較多。但朋友今晚指明想食呢度嘅冷烏冬，為咗唔好掃佢興，於是叫咗一碟做主食，估唔到呢道菜會係我全晚最鍾意嘅一道！首先，睇餐牌嘅時候我一心只係想叫鰻魚炒飯食，根本無認真睇，無留意到朋友揀嘅主食係冷烏冬，所以即使送到上檯，我依然覺得佢係一碟熱嘅明太子烏冬。真係到食第一啖嘅時候先發現原來係冷烏冬，涼涼地，最啱就係夏天食！
店舖選用較幼身嘅烏冬製作呢道料理，烏冬煙靭彈牙，拌入明太子醬增添鹹鮮味，亦有蟹籽增添口感，三隻大蝦非常爽口，配埋生洋蔥絲一齊食，簡直無得彈！
[價錢 Price]
💰$38
とり皮 🍢
食食下心血來潮想叫返串串燒，我哋都不約而同地揀咗大家嘅最——燒雞皮！一串價錢雖然少貴，但雞皮脂肪量適中，調味唔會過份重手，加上烤得香脆，入口盡是油香，絕對值得呢個價錢。如果想經濟啲，可以跟佢哋嘅自選烤鳥串，$108就可以食到三款自選串燒！
Post
