一直想試呢度的開心果雞蛋仔。舖頭開1200，我同狗狗爸爸1215到達，當時冇其他顧客。喺店員介紹下，買咗夾心雙重開心果雞蛋仔，對方仲好主動問我哋試唔試下蛋卷，最後，我哋試曬3款口味 - 原味、抹茶同黑朱古力。夾心雙重開心果雞蛋仔：$42，無論係以街頭小食定雞蛋仔嚟講，呢款特色雞蛋仔都幾貴，份量唔大，餡料亦唔多，至少冇平時睇介紹果種「爆漿」的澎湃效果，食到最尾亦冇開心果醬漏出嚟，餡料只剛好填滿雞蛋仔（有1、2粒冇沾到醬）。購買時，啱啱有人送貨，話係開心果醬，所以，餡料用的開心果醬應該唔係自家製，呢點亦令我有少少失望。雞蛋仔鬆脆，邊位亦脆口，單睇冇掂到開心果醬果1-2粒雞蛋仔，佢哋裡面呈鬆糕狀，所以，成粒雞蛋仔可以話係外脆內軟，質感好好。不過，個人覺得雞蛋仔冇乜蛋香，而開心果醬亦冇乜調味，味道單薄、好寡。我好喜歡食唔同種類同品牌的100%堅果醬，食落覺得呢個雞蛋仔的饀料幾健康，用的應該係100%開心果製的堅果醬，只係所用的品牌的原材料唔夠香，油份亦相較其他品牌的開心果醬少（本身開心果喺做醬過程中出油已唔算多），變相如果唔再特別加工，單單將開心果醬搽落雞蛋仔度，就會令到成個組合好乾。開心果醬果仁香一般，開心果味亦唔濃，食落又乾身，味道單調，好易食厭。蛋卷：試齊3種口味，原味有蛋香，抹茶味清淡唔苦，唔鍾意抹茶的人可能都會喜歡呢種淡淡的茶香，好適合作為茶點；黑朱古力濃味而唔「漏」，甜度調校到好適合而家的香港人。蛋卷非常鬆，味道清怡、冇負擔，好好食！最後，我哋以中秋節優惠（95折）買咗4罐蛋卷。店員（店長？）非常友善、主動，會熱心介紹同分享，仲問咗我哋覺得開心果雞蛋仔味道如何，佢亦提到，如果想多啲甜味，可以喺落單時提出，咁佢哋會落番啲糖/煉奶，不過，我覺得鹹食可能會吸引啲，如果加少少海鹽/鹽之花，應該可以帶出堅果香。唔知有冇方法增加開心果餡的濕潤、流動性，雖然我覺得饀唔多，但事實上，如果用同一款餡，再落得重手啲，一般顧客亦都未必食得曬/enjoy到，因為實在偏乾啊~蛋卷好好食，可以一試，價錢唔平，原價：原味$178/罐（24條），抹茶味$188，考慮到係手工製加埋味道恰到好處，真係值得一試~~…Read More
