80
16
13
Telephone
2450 6366
Introduction
Opened in 1939, was one of the popular filming spots of old Cantonese dramas, now has been rejuvenated become the restaurant it is today. As it is close to the Sam Shing seafood market, most of the people will select and purchase the freshest seafood themselves. continue reading
Opening Hours
Today
11:30-23:00
Mon-Sun
11:30-23:00
Payment Method
Visa Master AE Cash UnionPay
Number of Seats
300
Other Info
Alcoholic Drinks
May Bring Your Own Wine Details
Cake-cutting Details
Parking
Phone Reservation
10% Service Charge
TV Broadcast
Review (118)
Level7 2016-07-20
4883 views
繼2014、2015連續兩年一班死佬入到屯門三聖村「興記」大擦海鮮,接續依個傳統,2016再豪多一餐 。本來想試吓其他區域嘅海鮮酒家,但大佬話要三戰三「勝」全取九分,所以就三戰三「聖」。不過,嚴格嚟講,今次唔算完全喺「三聖」之戰,因為,改改策略,先去有香港築地之稱嘅荃灣楊屋道街市買海鮮 ,再入三聖村斜對面山丘之上嘅「容龍海鮮酒家」,依間嘢都喺有死佬試過嘅推介。未講酒家,就直擊吓晌楊屋道街市嘅實況,街市樓高四層,地下全層主打賣海鮮,所以幾十檔,人頭湧湧 。而且,叫得香港築地,檔口多之餘,價錢比晌三聖真喺平平平一大截。好似啲美國桶蠔,對比舊年食評嘅資料,三聖賣$160(大桶),楊屋道賣$85(大桶),質素一啲都唔差;東星斑晌楊屋道斷條賣,條條兩斤幾,一條先$350,但三聖要$380一斤喎 。不過,瀨尿蝦最後都返去三聖買,因為行勻個街市都喺細隻咗啲,唔夠睇頭,但三聖買真喺好貴。順便介紹吓楊屋道街市嘅「陳女東記」海鮮(兜到我都唔記得佢個位置,大概正中間),睇勻咁多間,依間海鮮鋪真喺選擇多多,平價 、貴價都有,覺得取價公道,而且,啲店員好好相與,又唔介意我哋影吓相,最鍾意喺佢哋明碼實價標晒價錢嘛 ;有位疑似店主,唔知會唔會就喺「陳女」,好識做生意,樣樣平多十蚊八蚊,所以,原先只賣三幾樣嘢,依家就執咗7樣海鮮 。結果,走訪兩地,一共買咗11款海鮮,夾埋$3,310,價目大概如下:加拿大象拔蚌($480條)$460 - 楊屋道陳女東記大花蟹($220斤)一隻$470 - 楊屋道陳女東記肉蟹($140斤)兩隻$270 - 楊屋道陳女東記大蝦($56斤)兩斤$110 - 楊屋道陳女東記蟶子($56斤)22隻$170 - 楊屋道陳女東記花螺($64斤)兩斤$120 - 楊屋道陳女東記桶蠔($85大桶)兩桶$160 - 楊屋道陳女東記東星斑($350條)$350 - 楊屋道其他街市檔帶子($30份)$90 - 楊屋道其他街市檔瀨尿蝦($280斤)11隻$840 - 三聖關財記南非6頭鮑魚(?斤)11隻$450 - 三聖關財記比起上次單晌三聖買海鮮料(9款海鮮,共23斤,$5,180),今次款、量都多過上次,但足足平咗一大截 。「容龍」有啲60、70年代嘅風貌,門口位整個噴泉,最搞嘢地下入口仲有個牌匾叫「容龍別墅」,至於大堂環境,就肯定好過三聖村冬菇亭嗰堆酒家啦,更曾獲米芝蓮推介食府銜頭,羊毛出自羊身上,自不然樣樣收費都貴人一截啦。晌興記代煮海鮮,唔鬼理你點煮法,總之油料費斷斤計,舊年5月嚟嘅油料費喺$58斤;但晌容龍就複雜咯 ,有斷斤計($96斤),有斷隻計(如貴妃蚌、鮮帶子,$18隻,隨時油料費貴過啲食材),亦有斷桶計(如美國桶蠔,大嘅$130,細嘅$70),仲有其他計法,總之,埋單時你都未必睇得佢明 。當然,唔賣海鮮嚟代煮,佢哋一樣有好多海鮮菜式,不過,收費就唔便宜啦,但食海鮮就預咗喺高消費。除海鮮外,我哋亦額外再點半隻燒鵝過過口癮,再加3碟時蔬均衡吓餐飯。 加拿大象拔蚌刺身+堂灼 其實,條象拔蚌本身晌陳女東記買嗰時,已幫我哋起埋肉做刺身,不過,嚟到容龍佢都講到明都照收油料費,至多再洗乾淨啲,加啲芫茜、椒絲擺靚啲,加個上湯做堂灼。咪睇陳女東記喺街市檔,人哋日日切嘢無數,功多藝熟,佢哋切嘅象拔蚌刺身比舊年晌興記做得仲好,厚薄平均,而已,大細均一,入口爽脆,沾少少豉油,鮮味盡出。亦試過灼一灼嘅效果,灼過嘅象拔蚌,口感會變得軟腍啲。 自家製掛爐燒鵝 $230 / 半隻 依度食燒鵝唔使預訂,想食就點,較方便。雖然唔覺聽聞佢啲燒鵝特別出名,但高質素,皮脆肉香,富鵝油嘅脂香,卻喺無羶味。 白灼大蝦 灼蝦就喺為食其鮮味,容龍就當佢喺中蝦,但我就覺得喺大蝦嘅尺寸,入口夠肉地,鮮甜爽口,沾丁點豉油提鮮,一流。兩斤大蝦兩食,一斤白灼,一斤豉油皇炒,兩碟都好夠份量,陳女真記真喺好足秤。 豉油皇原隻乾煎大蝦 食個白灼大蝦已品嚐到蝦嘅質素有幾鮮,再嚟豉油皇煎,鹹鮮惹味,蝦肉保持彈牙,實在好食。只喺食咗幾道菜,就發覺越食越熱,跟住就越嚟越焗,原來全個大堂壞冷氣(得番啲VIP房有冷氣),真喺大鑊。結果食完餐飯都解決唔到,亦從無人嚟解釋個情況,更無人嚟講講補救方案 ,得啲侍應不時拎啲冰俾我哋,我哋亦只有灌多兩啖汽水解「暑」。尤其依家咁嘅天氣,搞到各大佬食到標汗,唔喺講笑,食到衫都濕晒,對面枱位哥仔除剩件底衫,認真街坊 。所以,服務一環唔合格,唔喺因為你哋壞冷氣,我都知事出突然,而喺處理手法,完全無理會食客嘅實況,就連任何補償方案都無提出過,搏啲食客唔出聲當無回事,所以,見有好幾枱食客都「嗱嗱臨」打包埋少少餸尾走。 蛋白花彫蒸大花蟹 因為都喺啱啱開始無冷氣,所以,都唔影響食呢個蒸大花蟹嘅食味。以上幾道菜都做得出色,而依道蛋白花彫蒸一樣精彩,蛋白滑溜無比,淡淡花彫酒香,香得嚟唔會太嗆,至於隻花蟹,多謝各位大佬讓隻鉗俾小弟食,鮮甜多肉,正到爆。 豉椒炒蟶子、蒜蓉粉絲蒸蟶子 晌陳女真記見到啲「肥仔」蟶子好抵買,以前又未試過,人頭數執夠22隻,諗住兩食:豉椒炒及蒜蓉粉絲蒸,點知店家搞錯晒,全部拎去豉椒炒,加個米粉底,唔怪之得炒到咁大碟。味道唔錯,好惹味,配米粉都好正,不過,蟶子口感有少少韌。 薑蔥煀桶蠔 桶蠔嘅水準唔錯,夠大隻,再者,煮熟後亦唔喺點縮水,仲喺大大件。以薑蔥煀,香氣十足,蔥香配蠔,真喺不俗。 清蒸東星斑條星斑夠晒份量,大家都覺得好抵食,不過,咁大條的確好蝦人煮,結果,條魚蒸過籠,近骨位啲魚肉好實好嚡,其他位都幾好,魚鮮味十足。 果皮蒸南非鮑魚 碟鮑魚蒸得有啲迤,鮑魚本身喺有質素,大隻有睇頭,既有鮑味,又煙韌啜刀,可惜果皮味淡薄無痕,似有還無,比興記煮得無咁好。 星洲黑胡椒炒肉蟹 室溫越嚟越高,再嚟一道黑胡椒蟹,真喺氣熱逼人。兩大隻肉蟹炒出一大碟,啲黑胡椒極為入味,但又嚐到肉蟹嘅鮮,隻蟹又好好肉,好味指數喺啜晒手指。 椒鹽瀨尿蝦 瀨尿蝦指定椒鹽油泡,喺我哋一班死佬嘅指定菜式,不過,計埋油料費,依碟嘢要過千,但至緊要喺做得好食,咁先值番晒。細心拆殼後至慢慢嘆,蝦肉鮮甜,椒鹽味足,無令大家失望。 XO醬西芹炒帶子 唯一一碟有得睇,無得食嘅菜式,皆因晌街市檔買一份份嘅帶子,煮出嚟好腥,果然貪平瀨嘢,故此成碟無要,不過嘥晒啲油料錢。由於油料錢斷隻計,實情貴過啲鮮帶子。 椒鹽象拔蚌膽 雖然我哋一班死佬年紀有番咁上下,稱得上百病叢生啦,但無懼膽固醇依家嘢,象拔蚌個膽梗喺食得唔好嘥啦,揀椒鹽一於唔健康到底。惹味就惹味,挑剔少少就喺粉漿整得有少少厚。 椒絲腐乳炒通菜 $78 話唔健康到底,都要食番多少少菜,喺度食海鮮固然之貴,但啲炒菜又唔算貴喎,碟頭亦夠大,個通菜炒得頗香。 北菇扒芥菜膽 $98 大花菇用上大隻靚貨,菇香厚肉,但一碟得5隻,手快有手慢無,我就梗喺唔執輸啦! 大澳唐生菜煲 $88 幾碟炒菜都炒得上乘,但個人偏愛少少個唐生菜煲,因為以大澳蝦糕炒,鹹香突出,生菜仲帶少少脆身。 辣酒煮花螺都唔知喺咪廚房大佬玩嘢,已經無冷氣成個幾鐘㗎啦,個大堂夠焗夠晒高溫,臨尾先出依道辣酒煮花螺,驚辣你唔死。小弟就無心情食喇,嗜辣嘅老友反而食得津津有味,又話啲螺肉夠厚身,不得不佩服佢咁嘅環境都仲到咁辣,睇見窩嘢我都已經標汗咯! 生果碟臨尾送碟西瓜都無補於事,除咗打邊爐會邊食邊灌汽水外,今餐飯都可以講絕無僅有一晚灌幾罐汽水。講笑咁講,有少少回復惜日大熱天時坐大牌檔嘅感覺 !以前讀中學後生嘅年代,炎夏中午踢波都無問題,今時就梗喺唔同往日,熱死辣辣兩個幾鐘食餐飯真喺有啲受罪。買咁多靚海鮮嚟,點知食得咁無癮 ,上次年初嘅死佬蛇宴酒樓發生好多「蝦碌」嘢,個經理醒目識補鑊先令各大佬無咁多怨氣,今勻容龍咁大鑊幾個經理都可以當無事發生咁,危機處理喺零 。 continue reading
保持水準的海鮮餐 Featured Review
Level4 2016-11-29
3851 views
今次已經係第二次黎容龍食海鮮餐~我地自己係三聖買海鮮,之後行過去容龍都唔駛10分鐘~由於已經預先book左位,所以唔駛等就可以入去坐~ 我地總共叫左8樣餸1) 豉椒炒大蟶子蟶子比平時食的大好多,經烹調後仍然爽口,而且以豉椒炒這個方式煮很入味,好食~(2) 芝士龍蝦(開邊)同平時的芝士龍蝦有少許不同,龍蝦表面的芝士焗到好脆,芝士味非常濃郁,而內裏的龍蝦則好彈牙,很出色的菜~(3) 胡椒薑蔥鮑魚煲胡椒薑蔥味非常濃郁,但由於鮑魚比較細,令到鮑魚過於入味,反而失去了原有的鮮味~(4) 蒜茸粉絲蒸元貝蒜茸味唔夠強,而且粉絲比較乾身,令到元貝味道比較清~(5) 海龍皇湯湯有蕃茄同豆腐菜兩種選擇,我們叫了後者,做法簡單,但味道鮮甜~(6) 特色意大利黑醋骨肉質都算滑,而黑醋味道唔會過酸,味道非常配合~(7) 上湯野菌浸菜苗菜的份量都唔少,味道中規中矩~(8) 福建炒飯份量比想像中大好多,味道都算唔差~酒家奉送生果及糖水,味道都ok~雖然酒家加工費唔算平,但食到這樣質素的菜仍然值得一試~ continue reading
(The above review is the personal opinion of an user which does not represent OpenRice's point of view.)
容龍,客讚 Featured Review
Level4 2016-09-06
4384 views
家庭飯聚,親友偏愛中菜,其中海鮮最受歡迎,與其去光服西貢鯉魚門,寧願遠些少入到屯門,當然所謂長距離,只是對住在市區朋友而言.是次光顧,已是去年十月,到現在方有餘裕記下點滴..週六傍晚由九龍驅車往屯門,道路很暢順,我們先到三聖邨買了若干海鮮,將海鮮交給容龍接待員,隨後再議定烹調方法.是晚菜餚很是豐富:{清蒸花英斑}活跳鮮魚,清蒸最味美,魚肉十分嫰滑.{白灼花螺}白灼後,逐隻挑出螺肉,點上䜴油,最是簡單直接.{蒜蓉開邊蒸龍蝦}芝士焗龍蝦是此店名菜,不過我們更愛輕怡版本,因此選了開邊蒸,時間掌控剛好,蝦肉爽口彈牙,蒜蓉起了提鮮作用,沒有過濃搶去食材天然味道,很好.{䜴椒炒花甲}花甲由於長於沙𥚃面,故此較其他生於泥的蚶肥美.長輩如是説,果然也是,豉椒炒比鹽水浸更俱鑊氣{膏蟹蒸糯米販}蟹熟度剛好,蒜蓉油膏滲到米飯𥚃,精華盡是吸收,盈香撲鼻. {椒塩瀨尿蝦}我對瀬尿蝦一向興趣缺缺,沒有嚐到,不過親友說很香脆惹味.,看顏色外觀不頼.{野菌浸菜苗}其實是雜菌白菜仔,雞肶菇草菇和金菇算不上野菌..乍看完成品,跟魚湯湯渣很相像,味道過於清淡,儼如白灼,令人有點失望.{魚湯}海鮮檔送了些魚毛蚶類,食店加上豆腐白菜仔熬煑成湯,清甜冇添加.{咕嚕豆腐}布包豆腐滾上炸漿油炸,再澆以甜酸汁,嫰滑酥脆,色味俱全.{椰皇燉鮮奶蛋白}這個甜點是此店名物,要預留,果然幼滑清香.{紅荳沙}陳皮紅豆沙亦毫不馬虎,材料很足,甜度適中.肥餐一頓,很是滿足.親友稱讚是晚菜餚大多烹調理想,有時忙中有亂,廚師不同,水準上落差異是無可避免..我個人菜後感很好,獨是沒有敏感發作已很感恩..當然,這些幸運,不是常有.P.S.三聖邨海鮮 $1,800 / 容龍 $2,050 continue reading
(The above review is the personal opinion of an user which does not represent OpenRice's point of view.)
山長水遠~~入容龍 Featured Review
Level4 2016-08-21
3142 views
自問不是一個特別喜歡吃海鮮的人,所以對那𥚃好食抵吃,沒有什麼心得,至於外購材料費啊,店內加工費,亦有些不明所以..只曉得吃海鮮,價格質量可以上落差距很大.在有限幾趟本土品嚐海鮮經驗,始終覺得不要浪費彈藥在一般食肆酒樓上,集中火力在頭號叫座,而不介意付出多少少錢,路程又遠少少的專門店上,你的失望感隨時可能有機會減低一半!屯門容龍,首次光顧,驚艷;再次光顧,依然沒有失望;只要海鮮買得夠新鮮質量好,容龍師傅們在烹調方面沒有太多的失手.家人說容龍前身是容龍別墅,有錢人府第,在該區很出名;改建後成星級食肆,十分火紅,週末訂枱要預早至少兩個月.我們是次同様揀選週日,店子當然爆滿.把從三聖村購來的海鮮材料交給店員,確定了烹調方法,就只有在熱鬧的環境下靜候美食了.首先端來是{菠蘿咕嚕豆腐}這道菜是每次必吃之選,看外型是布包水浸豆腐,豆腐嫰滑,外皮粉漿炸得香脆可口,甜酸汁份量恰好包裹所有材料沒有太多滴漏,菠蘿靑椒也沒有太吝嗇,整體賣相口感都一流!{椒絲腐乳炒唐生菜}菜煑有點水水,炒菜鑊氣欠奉,食感一般,故此沒有拍照的勁兒..隨後是{白灼九節蝦}我喜歡細蝦,相對清甜鮮嫰;材料新鮮,白灼然後點上辣椒鼔油已很足夠了.{鹽燒茄子}怎樣看,也是椒鹽炸茄子,幸好火喉控制得宜,茄子沒有吸收太多油份也算清爽,而味道中規中矩沒有過咸,尚算合格.{海龍皇湯}在相熟海鮮檔選購材料時,每次都相贈一袋小魚作煑湯之用,今趟除了各式小魚還有一隻蟹和很多蜆..結果加入豆腐青菜煑好的湯,真是異常清甜味美!可能廚房太忙吧,上菜的次序有點亂..這個時候端正來{羔蟹蒜茸蒸糯米飯}一般而言,應該是吃完其他輕盈類別,最後才是重型飽肚的餸菜吧?家人不免有點嘀咕,最後還是稍為擱置一旁,等待征服完其他陸續呈上的海鮮後,才有空檔處置這盤糯米飯.可能進食時已涼了,風味大減,否則熱騰騰香噴噴的蒜茸加羔蟹精華給糯米飯吸收盡,本該是人間美食.羔蟹略嫌過熟,蟹羔口感很實且硬,什麼蛋黃似的甘香沒能呈現出來,有些少可惜.{清蒸石斑}中國人烹調魚,始終是高手!除非你喜歡生吃刺身..一尾活跳鮮魚始終清蒸最皮嫰肉滑,沒有白白浪費了一條生命.{原隻一開二鹽淌奄仔蟹}奄仔蟹,處理得乾淨,火喉時間拿揑宜,蟹羔和肉都鮮嫰,不用多言,動手吃吧!{豉椒炒大蟶子}避風塘風味,質量汁量均沒有挑剔的餘地,很好.{蒜茸粉絲蒸元貝}說實話,到這個時候,我已經撐得很飽了,沒有空隙可以容得下這個元貝,不過其他在席成員吃得津津有味,看來十分滿意.最後敬送生果及紅荳沙..我們是晚吃得很高興,食物沒有出大問題,塲所也乾淨企理,服務縱使很是一般,亦沒有令人難受,算是OK,以本土水準而言..下次?還是會選擇容龍~~即使山長水遠~~P.S.餐館$1,696未計加一, 食材$1,700 continue reading
(The above review is the personal opinion of an user which does not represent OpenRice's point of view.)
鮮味出曬黎 Featured Review
Level4 2016-06-09
4262 views
老人家話想食海鮮,自上次起就愛上了容龍了,再次來到都沒有失望。先係三聖簡左一堆海鮮,有埋送貨服務先黎一個琵琶蝦,肉質其實同龍蝦差不多,不過本人就覺得俾龍蝦好味,更煙韌,更有咬口,啖啖都係肉,帶出曬佢既鮮味第二度送就係 砵酒焗蠔 呢個一定要食,個汁好好味,我地買桶蠔,大大只,啖啖肉,超正,香香甜甜既汁,真係想汁都 我地仲叫左半只鵝,雖然有點瘦,不過個皮燒得好靚,好脆,點埋個汁食一流呀,香脆多汁。好大只既聖子呀,估晤到煮完出來一點都不韌,仲好爽口彈牙潻本人都係覺得蒜蓉清蒸係最好味嘅 今次叫左整蒜蓉清蒸龍蝦,正,鮮味出曬黎,加埋肉汁,無得頂就算呢個係送既雜錦海鮮煮成湯都超清甜,無腥味,飲多幾碗都晤怕,仲有菜食,吸晒啲海鮮汁好好味,連豆腐都來個薑蔥鮑魚煲,不得了,超級香,鮑魚爽口彈牙好新鮮,又易咬口,再加上薑蔥一齊食就更香口,又可以清清一下你個口,正。 最後來一個鹽焗奄仔蟹,咸咸地既外殼,內面超多告,好似食梗大閘蟹咁,超鮮甜,都係必食之選 最後最後仲有糖水同西瓜送,就連普普通通嘅紅豆沙都煮得超有水準,粒粒鮮明紅豆,好有咬口,又唔會太甜,剛剛好,西瓜都超級甜,大讚。 今晚真係吃得超滿足,可以抱着肚子回家休息去了。 continue reading
(The above review is the personal opinion of an user which does not represent OpenRice's point of view.)