Cucina假日海景Brunch，可以望住維港嘆美食，又有豐富半自助前菜同主菜選擇，環境舒適可以打卡。一入餐廳已經見到玻璃大窗，整個維港開揚風景盡收眼底，天氣好嘅時候陽光灑落餐檯，望住藍天白雲，感覺好舒服。如果食晚餐仲可以欣賞到「幻彩詠香江」，應該又係另一種享受，有機會真係要黎試吓。自助區有前菜凍肉拼盤有巴馬火腿、意式豬肉腸、莎樂美腸，油香味夠，口感好Q好煙靱。芝士拼盤有松露芝士、藍芝士同阿夏戈芝士，好多款供選擇。沙律區選擇多，有牛肉沙律、鴨胸沙律、番茄水牛芝士沙律，全部清新開胃，醬汁惹味。意粉station可自選醬汁，有蕃茄醬同海鮮汁。意粉食落去有彈性，海鮮汁香濃鮮味，掛汁好足。雞蛋station即叫即煮，有黑松露炒蛋，口感滑溜。熱葷有意式焗千層茄子，茄子燴得好入味又唔夠油膩。意式肉丸好Juicy，濃郁番茄同香草味道好好味。烤加拿大豬鞍配杏桃醬，豬肉外皮香脆，肥瘦均勻。除了自助區外，brunch仲包左個海鮮塔。海鮮塔裡面有鮑魚、龍蝦、蟹腳、翡翠螺同青口。鮑魚鮮甜爽口，啲龍蝦肉彈牙又Juicy，咬落去啖啖肉。其他海鮮都好鮮甜，喜歡食海鮮嘅朋友真係會好滿足。主菜方面可以選慢煮牛頰肉同比目魚，牛頰肉入口即化，牛香味濃，薯蓉綿密，醬汁好夾牛肉，一啲都唔會柴口。比目魚鮮甜嫩滑，魚皮微脆，配埋青豆，口感豐富。甜品檯有火焰車厘子、提拉米蘇、馬卡龍、各式蛋糕、生果，雪糕用Häagen-Dazs，甜品層次豐富唔會太heavy。…Read More
