Video
Exit C, Shek Mun MTR Station
continue reading
Opening Hours
Only for banquet reservation
Above information is for reference only. Please check details with the restaurant.
拉釘結婚了，恭喜恭喜，招乎唔到，食多兩舊、飲多兩杯，千奇唔好客氣！慣性囍宴都等要到九點先開飯，想餓死朕咩﹗囍宴前走轉尖沙咀金湖隊碗牛腩麵打定底穩陣喇。七半到達會場，立即開波飲兩啖啤酒開開胃，大會指定啤酒藍冰！真 Ice 流砂冰。往年曾試過 8 位 1 席都已非常經典，從來未試過 5 位 1 席爽乎呀，預計好飽好飽。李拜銀、黃格仙、宅男甲、哈佬喂加埋我，想食幾多有幾多，抵呀。不過最後加埋攝師及化師，湊夠 8 位好意頭，變成 8 位 1 席嚕。瞄瞄菜單都係基本那些，心裡有數。遁例進場、演講、播片、咀咀，開飯喇﹗鴻運脆皮乳豬，百年難得一遇，宇宙最強！滿分無得彈，就算頂級酒店中菜廳都未必有如此高質美豬供應呀！皮脆肉嫩暖笠笠，肉香多汁性感誘惑，半肥瘦散發淡淡香料芬芳，加兩滴乳豬醬更如虎添翼！不其然連食 6 件都唔夠喉，豬腳都被我全部沒收。野菌泡蝦球，配上湯紹菜神奇創新，還各據一方，河水不犯井水，得意有趣。觀賞性極高，超重份量，唔怕您唔飽。爽甜紹菜一片片堆得整齊有序，菜甜味出眾非凡，幾疊幾疊的塞入嘴，簡單的調味，爆汁爆水香醇濃郁。大大碌的蝦一粒已塞到我嘴仔脹卜卜，滿足地趙。蝦肉爽爽，鹽啤得不算過份，微微蝦甜，還感受到原始氣息。彩椒加菇菇爽甜清新，夾著紹菜蝦碌齊齊品嚐更豐富更安慰。百花海皇卷，聽個名已估到係炸沙律海鮮卷，我最不喜歡的料理，都比面試舊吧。新鮮出爐滾熱辣，厚厚的炸皮，質地口感味道十足十食緊煎堆一樣，分子調理嗎？薄如紗的沙律醬，連餡料都食不出來，吉列麵團？珊瑚扒翡翠，初期睇菜單時滿心歡喜以為有珊瑚蚌食，原來得幾篤蟹子呢！真身為蛋白蟹肉扒西蘭花。晨早烚好的西蘭花已放涼，淋上暖暖芡汁加蟹子點綴，禮成上檯。西施蟹肉芡淡淡的、微溫的、厚厚的，已凝固一劈。室溫西蘭花爽脆，輕輕清新菜甜味，滾上豆瓣醬咸香配菜汁，在平平淡淡中帶點樂趣。高湯海味翅，侍應嬸嬸比錯紅糖水，朋友碗翅變成啫喱味，笑死！嬸嬸入廚房搵正確的浙醋，但遲遲未回，我都已經食晒咯。肉絲食到，腍劈劈質地，外觀蚯蚓一樣。皇帝的翅針，睇唔到亦食唔到。腥得出奇的湯汁，免強吞落肚，嚇死朕咯！腥味明顯來自魚肚，用醋漱漱口。清蒸海石斑，緊緊熟剛到位，火辣噴煙出場，驚喜的演繹。結實肉質噴出肉汁，魚味濃濃清香，厚厚啖啖肉，海斑的特點。魚肉滾上精華及豉油，食得開心暢快。魚頭魚尾魚鰭滑嘟嘟充滿骨膠原，甜美無限，啜得乾乾淨淨。翡翠蠔皇鮑片，色澤鮮明賣相吸引，食慾增加不少。鮑片炆得異常軟棉，味道質地都似足鮑魚菇，真的疑幻似真，真假難分。反而蠔汁生菜實實在在的鮮甜爽嫩啊！用生菜捲著唔知鮑片還是菇片齊齊食，蠻喜歡的食法，心理平行很多呢。脆皮吊燒雞，果然係齋吊無炸過喎！凍冰冰腍劈劈巢巢的雞皮，內外油膩感同樣旺盛，咸咸的沒有雞甜味，低於水平的處理。龍芽花菇炆伊麵，毫無期待的最後炒麵炒飯，本來直頭不打算外賣，但我覺得試啖無妨，好食咪帶走囉 ﹗估您唔到十分驚喜，稀有的高質出品。即炒上檯無欺場，熱燙燙完整彈滑的伊麵，味道甜美清香，菇味與醬油味黃金比例撞得出色，唔該幫我全部包起去﹗砂鍋雞絲飯，跟伊麵一樣比個機會您，淺嚐一啖仔。乾爽嚥韌有鍋氣，蛋香雞甜好開胃，落味可口香噴噴。多年囍宴的不愉快經驗，難得最後的不凍不濕不爛，色香味非凡，請幫我全部包起外賣。
continue reading
人手不足！入錯單！亂七八糟！除了叉燒好少少之外其他都好難食...一個字差。家人一致同意不再來！十年前跟十年後完全不一樣了！後悔當初提議想去試一試 唉！😟😟😟
continue reading
一號，是會所一號，果然有派頭！氣勢逼人，教人震攝，就是被它的氣場吸引，入去，都想測試下它們的食物也是否一樣震攝，它是位於石門站，近馬鐵站，走路不需幾分鐘，會所一號萬濤，改名極具霸氣又攝人，有大哥風範！黑松露海鮮炒飯:有濃烈黑松露味，細粒的米飯也炒到企身，不腍口，也算入味，但欠料，也值70分！黑椒燒鵝: 色澤對辦，香味也有淡淡餘香，肉味ok , 算上等肉，皮ok脆，跟大酒家燒鵝比，仍有進步空間！蝦蝦: 大隻，蝦處理過，不算太膠，也有點點鮮味。皮算薄，有白透紅感！叉燒腸: ok合格，沒太大驚喜，皮略嫌少厚！叉燒包:蒸上來頗熱，叉燒料也，醬也未到流瀉境界！一句到尾，4佰元都不用，仲可以點！
continue reading
結婚到哪裡擺酒，永遠是新人最頭痛的問題！我之前來過沙田的ClubONE萬濤參觀，今次再試試它們的晚宴菜式～ClubONE萬濤走典雅清新風格，感覺時尚大方，最多可容納24席，適合年輕人舉行小型婚禮。晚上來到萬濤的晚宴，這裏無論是裝修還是餐具擺放亦有別於一般的茶樓，令人眼前一亮。 鴻運脆皮乳豬先上傳統婚宴的第一道菜－－脆皮乳豬！乳豬烤得剛剛好，上菜時還是暖的。皮十分脆，顏色漂亮，肉肥瘦適中，吃下去不會感到肥膩。 侍應會幫忙分餸，我們坐着等吃就可以，好方便呢～ 野菌泡蝦球蝦球大大粒，咬下去非常彈牙，蔬菜亦非常新鮮。 百花海皇卷中式飲宴中，我最喜歡吃炸海鮮卷了～這款海皇卷內含什果、鮮蝦及帶子，十分鬆脆可口。 珊瑚扒翡翠新鮮蔬菜上加上蟹肉碎，簡單又好吃～ 雲腿雞絲燴花膠湯羹熱度適中，內含一絲絲的花膠和雞肉，雲腿亦令味道提升不少。 清蒸海石斑石斑魚肉嫩滑多汁，配上白飯簡直一流～ 翡翠蠔皇鮑片鮑片算是大塊，再配上蠔油汁十分惹味～ 脆皮吊燒雞雞皮薄而脆口，可惜煮得有點過龍，雞肉再嫩滑一點更好。 不過不失的砂窩雞絲飯和龍芽花菇炆伊麵。 甜品不是傳統的紅豆沙，而是意式泡芙酥和蓮子百合紅豆糕，令人有驚喜。甜度適中，不嗜甜的人也可以輕鬆入口～ 晚宴的食物分量非常多，吃到中途已有飽意，十分划算～大家不妨考慮一下ClubONE萬濤呢～
continue reading
自己同身邊朋友都踏入適婚年齡，所以近期不停收到炸彈XD 除咗有朋友訂定今年5月喺Clubone時尚康山擺酒之外，我喺1月尾亦去咗沙田萬濤飲舊同事果餐。我都係第一次喺Clubone飲，原來侍應係會幫忙分餸的，因為我果檯我只認識4-5位前同事，有人分埋餸就食得冇咁尷尬啦~鴻運脆皮乳豬第一味例牌係乳豬，皮夠脆但有少少肥，每人分咗兩件之後仲有幾件剩低，夠食有餘啦。 野菌泡蝦球野菌就唔係好多，反而似甜豆炒蝦球先係主角，蝦球大隻又爽口，而且味道清淡唔會以濃醬汁為主，有時好怕去飲每個菜都加XO醬。甜豆雖然同荷蘭豆好似樣，但甜豆嘅豆莢會比荷蘭豆肥厚D，味道又甜甜地。 百花海皇卷外皮炸到鬆脆又夠熱，我一向都鍾意食海皇卷，咬開中間有好多菠蘿酸酸地十分開胃。本來都希望有人唔食炸野，我就可以分多件，可惜個個都食晒XD 珊瑚扒翡翠原本以為係珊瑚蚌炒西芹之類的物體，原來係蟹肉扒菠菜就真。白色醬汁落咗好多蟹肉去煮，食到啖啖蟹肉嫁！而且菠菜個莖係中空狀態，所以更易吸汁！ 雲腿雞絲燴花膠去飲我一向都不太熱衷於食翅，用花膠仲好過魚翅啦，環保又養顏。唔好以為金華火腰絲就咁放面會唔入味，雲腿甘香味其實10級濃郁撲鼻~ 清蒸海石斑平日我都唔係太鍾意食魚，唯獨是去飲可以食到嘅海斑例外~ 好幸運我分到魚背多肉又冇骨嘅部份，夾埋大棵蔥段一齊食真係滋味無窮~ 翡翠蠔皇鮑片終於食到一個較為濃味嘅菜式，蠔皇鮑片向來是個天仙配，但底下的生菜卻真正令我一試難忘。印象中我只有喺國內先可以食到爽甜嘅生菜，無諗到生菜雖然唔係呢味餸嘅主角，偏偏比主角更突出，一咬爽脆又清甜。 脆皮吊燒雞呢一味我之前同屋企人喺尖東薈ClubOne食過，同上次一樣咁好食~ 外皮經油泡後極度酥脆，但食落一啲都唔覺得油膩，隻雞本身脂肪唔多所以唔洗怕食到成口油。師傅醃雞嘅味道比例亦調較得宜，因為過多鹽份會令到肉質太結實，而家少少鹹味就唔會掩蓋雞隻自身嘅肉香了~ 砂窩雞絲飯食到呢刻已經有7成飽，平時飲宴中嘅炒飯 &伊麵我通常都只會二選一，但眼見今餐炒飯及伊麵賣相都非常誘人，所以兩樣都食晒~ 雞絲飯粒粒分明夠乾身，食落覺得幾夠鑊氣。 龍芽花菇炆伊麵伊麵同樣出色，面頭大花菇肉厚又炆得夠入味，咬落好Juicy~~ 意式泡芙酥 + 蓮子百合紅豆糕好有心思嘅甜品，終於唔洗食紅豆沙同西米露~ 紅豆糕咬開中間有爽口百合，如果可以俾我食多十舊八舊就更好了。 終於有機會食到Clubone婚宴菜，冇諗到Clubone一向都以裝修靚而聞名，而原來金玉其外，內在嘅食物質素亦相當有水準~ 雖然廚師功力係先決條件，但都要靠侍應們夠眼明手快，先可以keep到每味餸都咁新鮮熱辣嘅~ 在此祝賀一對新人佳偶天成，甜甜蜜蜜！
continue reading