阿四快餐

Open Now

Now Closed

係尖沙咀經過呢間餐廳好多次，門面唔多吸引一次都無食過，是日又來到尖咀行街，間間都網紅店排晒隊，咁就試下阿四啦。半自助模式，自己搵位，出去落order，但有店員送餐。⭐咖哩牛坑腩飯正正常常的港式咖哩，少少辣料幾多，仲有一大碟飯，肯定夠飽😂⭐揚州炒飯炒飯足料有鑊氣，但偏淡少少，可能習慣重口味，加啲辣椒油就啱啱好。⭐凍檸茶 & ⭐凍奶茶凍飲加$3大大杯，夠凍。正常茶仔價位啦，份量足味道ok。好懷疑店員係點記得每張單講咩語言🤔佢叫號直接對外國人用英文、國内人國語，每叫錯㗎喎，莫非張單有記號？

今日喺尖沙咀食咗個焗咖哩牛腩飯，焗飯有炒飯底，咖哩都算幾香，份量亦都非常大份，醫下肚都ok嘅。店內嘅裝修比較懷舊，係好舊式嘅港式快餐店。價錢喺尖沙咀呢邊算唔錯。

三拼米線海南牛肉乾米線配雞扒炒蛋香港第一次食到牛肉乾米線 佢落去都幾match 新鮮體驗 雞扒都煎得脆嘅 炒蛋有點過熟 三拼麵炸雞髀配雪菜肉絲腸仔炸雞髀炸得好脆 充滿肉汁 腸仔炸耐多少少會好啲 雪菜肉絲偏淡洋蔥焗豬扒飯即焗即起 豬扒都算大塊 份量OK小編真心讚賞 服務態度良好 早餐時段人流唔多 會送餐服務 ‘-‘-‘-‘-‘-‘-‘-‘-‘-‘-‘-‘-‘-‘-‘🏰環境: 6/10🙇🏻‍♂服務: 8/10 💰價位: 低價⏰用餐時段: 早餐‘-‘-‘-‘-‘-‘-‘-‘-‘-‘-‘-‘-‘-‘-‘

夜媽媽喺isquare睇完戲落到樓，隔離嗰個話肚餓想食野，諗住喺樂道求其搵間野食就好了，經過呢間叫阿四既快餐店，隔離嗰個又話好想入去回味下，佢話會諗起細時讀書既快樂回憶，啲咖哩好好食架。入到餐廳果然係舊時既感覺，對於好似係初次入呢類餐廳既我覺得好新奇又好懷舊，好似係睇舊式港產片見過既畫面咁。侍應叔叔聲大大但其實都幾友善嗰種，見我行到入去一舊雲咁就指引一個位置俾我地坐 (當時店內接近90%滿)，如果佢唔指引我，可能我又會自轉幾個圈阻頭阻勢然後俾人鬧 XD我自己就叫咗個咖哩牛腩飯，仲跟咗碗羅宋湯同飲品，份量非常大，咖喱係辣口嗰種，惹味~ 可惜碗湯對我黎講太濃味了，可能因為已經滾咗全日到咗尾水，六十幾蚊既餐，在尖沙咀，絕對係抵食夾大件既。

用餐日期：2023/12/07用餐時段：午餐用餐費用(每人）：$56餐廳環境：室內不少座位 冷氣足 檯與檯之間較近 人多時可能要搭檯 服務：服務員服務態度正常 點菜出菜都快味道：點了楊洲炒飯+滑蛋牛肉飯 送湯+熱飲1-楊洲炒飯：份量足 飯和配料炒得鑊氣十足夠熱夠香 飯不硬也不油 推薦2-滑蛋牛肉飯：份量足 有很多牛肉 蛋和牛肉很潤滑 牛肉味足 牛肉好味 湯汁內也有很香蒜蔥味 整個味道超好 推薦3-湯：選了中湯 湯中有幾種蘿蔔 湯不油不咸味道好 推薦4-飲品：選了熱檸水 味道正常總結：這家在尖湯咀區已很多年 就在isquare 旁邊的街道上 每次去尖沙咀趕時間的都會食這家 這家室內有不少座位 野食不算最平 但味道好 出菜快 午餐包湯+熱飲 是值得推薦的快餐店 這家中午時段多數很多人較難有位 如唔想等或像我怕人多的可外賣去附近九龍公園慢慢輕鬆進食

今日去九龍公園行個早運，之前搵個早餐食飽飽先。行過九x餐廳滿曬又排隊，旁邊一兩家都貴，咁就選中哩間平平地老老地餐廳。裝修就系老餅茶餐廳，雖然個個夥計都上年紀，但好在個個夥計都幾好禮貌，入去比個餐牌叫你慢慢睇，睇完至出去買飛，坐低等攞來。等左一兩分鐘就有，幾大份量，食完真系飽曬。豬扒米線($40)餐-豬扒系帶骨，都幾厚幾大塊，系炸得油D,味道OK。- 雪菜吾會死鹹。- 炒蛋系傳統吾系滑蛋，味道OK-檸檬茶正常系尖沙咀有咁份量同味道，算OK啦！

尖沙咀工作，所以呢間係屬於自己午餐餐廳之一。星洲炒米、炒貴刁都不錯，算有少少鍋氣，大排檔感覺。我自己常吃的是他家的咖哩：咖哩雞扒、咖哩豬扒都很好吃，就係怕變肥，所以唔敢餐餐吃。午餐一般都包湯和餐茶，我喜歡他家的羅宋湯，酸度剛剛好，但偶然會有一次半次失準，唔知是否偶然師傅休息，第二個人煮。整體餐廳似室內大排檔，樣樣食物都能滿足食客，有炒的、焗的，蓋澆的，而且味道長期可以保持，呢個最欣賞。唔滿意的係衛生，長期有一兩隻大蒼蠅飛來飛去，真係唔明老闆點可以忍到而唔買殺蠅設備，千萬唔好去洗手間，去時經過廚房後，怕有心理陰影。

大前日(14-10-2023 Sat)同老公喺女友人WK食完生日蛋糕後走人,為嘅係去尖沙咀文化中心睇話劇,我哋要睇之前食個晚飯,我就帶老公嚟呢間食,我哋嚟到時未多人,坐低睇完menu就出去買飛,之後就等佢哋嗌no.送嚟.我就要咗兩個同樣$56.00,6:00pm過後要加$3.00嘅午餐.冇耐,老公嘅餐肉蛋飯,要西湯同熱奶茶到嚟,西湯係羅宋湯,餐肉蛋飯有三隻蛋咁多,佢先食餐肉蛋飯,話好好味,豉油唔鹹,煎蛋係半生熟,將蛋汁撈落白飯好好味,白飯又夠軟唔硬.味道:5分羅宋湯呢?佢一飲又係讚好味道,蔬菜充足,我都飲啖,係好味,酸辣度啱啱好,又夠味.味道:5分熱奶茶呢?老公話得,我又試吓,拎到嚟我嗅到奶茶嘅香味,飲落茶味係有但甜,老公話佢落咗2/3包糖,吓?!咁多?唔怪得.味道:4分我嘅菠蘿雞粒炒飯,要中湯同飲熱檸水好耐至到,無他,因為要即炒嘛.菠蘿雞粒炒飯比較遜色,冇乜鑊氣,雞粒好油,菠蘿正常嘅酸甜.味道:2.5分中湯係紅蘿蔔豬骨湯,睇顏色好濃郁,但飲落唔係話唔好飲,只係又比羅宋湯遜色.味道:3分熱檸水就正常冇問題.味道:3分衛生:我哋坐入面嘅卡位,被我見到有細隻嘅甲甴.價錢:竟然冇加我哋$3.

呢期總有機會到尖沙咀，早晨食開阿四就繼續，點解？講真尖咀食到唔知食咩好！選擇阿四：通粉🥣底夠熱👍🏻奄列好少有沙爹牛肉，味道都箅唔錯，阿四辣椒醬都做🉐️好野味👍🏻茶味都算合格，自己不用取餐，有人送過嚟👍🏻👍🏻👍🏻

行行下好肚餓，見到阿四就行入去，其實之前都食過幾次，每次都係嗌吉列雞扒湯烏冬，我諗個到啲侍應都認得我，但今日有個不愉快經歷，當我嗌完野食後，有個阿姐突然好大聲係我後面嗌喂 睇住啦，然後好大力將我個餐抌落枱面，黑口黑面冇禮貌，唔知得罪你啲咩？大佬 我係黎俾錢食野，去完廁所見到廚房同樓面個個唔帶口罩同手套，大家分析下今日真係食到一肚氣，唔會係有下一次，食個野都要受氣😅

呢期愛上左阿四，由雜扒飯開始：有日特然好想食雜扒飯，叫同事買左2日不同的餐廳都係唔好食，第三日我申請請大家食阿四試下，以前阿四咖喱真係好食，但可能轉左廚師，E家咖喱真係麻麻，過為蒜茸汁，外賣亦可以多汁仲汁分開另上👍，就係汁已經可以伴飯，不用雜扒🤣，羅宋湯都做得唔錯，夠濃，檸檬茶茶味差少少，咖啡不合格，E家好多同事都會去食早餐，講真咁多年都無食過阿四早餐，一食之下👍👍早餐湯底熱到出煙，好少會餐廳能做到，我都去咗好幾次，加油👏

今日整頭髮嘅時候太肚餓叫咗個外賣，髮型師就推介我食呢間餐廳，我就叫咗乾炒黑椒牛柳絲公仔麵。當我打開外賣盒，飄出一陣香氣，勾起咗我嘅胃口，都有可能因為我太肚餓。第一口入口，就感覺到黑椒味道好濃，有啲掩蓋咗其他味道，但整體嚟講口味幾重，都幾惹味。牛柳絲都炒得好嫩，同埋好入味，不過某部份嘅筋位太多，有啲微微咬勁。另外，炒公仔麵嘅質地都好啱，唔會太淋or太硬，有啲彈牙嘅感覺，好好食。除咗味道好之外，送餐速度都好快，真係好方便呀！外賣員將食物送到我嘅手上時，食物仍然熱騰騰，而且包裝都好整齊，沒有任何漏油或者漏汁現象。總括而言，呢道菜式算係一個唔錯嘅選擇。如果你鍾意味道重口味嘅麵食，同埋可以送上門嘅外賣，呢個都係一個選擇。

又到星期日，睇早場，支持港產電影同古先生---明日戰記10:20a.m.，入場前先吃個早餐。Walk in 樂道阿四快餐，先在收銀處點餐和付款，然後入座 (free seating)，稍等一會，店員會送上早餐。是日早餐，點了以下的：#雞扒早餐：吉列雞扒、腸仔、煎蛋、牛油餐包，吉列雞扒即炸，熱騰騰；煎蛋是流心的；餐包烘過，外面微脆，塗上牛油，好吃；腸仔無功無過；整份早餐夠熱，我滿意！(吃過太多連鎖餐廳/快餐店的早餐，多士、煎蛋都是放涼了，多士受潮已經不脆，凍的煎蛋一點卻不好吃！)#熱鴛鴦：紅茶、咖啡、淡奶的比例，對我的口味，喜歡！

而家香港越來越少呢種港式家庭式快餐店，通常只會係舊式屋邨商場搵到。今晚竟然係尖沙咀鬧市，isquare隔壁就有一間。叫左佢既黑椒牛扒鐵板配意粉，跟羅宋湯。呢種鐵板餐係唔少茶餐廳都仲有，黎呢度食既特色係食埋佢個環境：。餐廳既裝修仲保留住八九十年代港式快餐點既特色，色彩鮮豔，果種鑲係個地無椅背既硬膠彩色櫈（有返咁上下年紀會知我講緊咩😂）大大個餐牌係牆度，員工睇落都係仲在好耐既熟手伯伯⋯無錯我係黎懷緬童年既。講返食物，個羅宋湯番茄味同辣味配合得好好，薄牛扒配「咋」一聲既洋蔥汁，唔輸其他茶餐廳。我坐係收銀姐姐傍邊，短短一個鐘已經有兩個人叫左漢堡扒煎蛋飯，但睇勻個餐牌都唔見有，唔通呢度有隱藏菜色？下次試下先😋

入到去見到d枱凳都充滿舊式快餐店既味道，排隊比錢後就比左個牌，返去坐低等職員送餐黎。叫左一個正宗海南雞飯同咖哩牛腩飯。🔴正宗海南雞飯個名叫正宗海南雞飯，但一d都唔正宗。首先只有豉油同薑葱醬，少左個酸辣醬。其次係正宗既海南雞應該係去左骨，但呢到既雞係有骨。加上呢到既雞食落好油膩，好肥好多脂肪，無海南雞既清新。食落既味道有d咸，感覺似食梗白切雞飯。仲有配菜係菜心，而唔係平時海南雞飯配既青瓜蘿蔔。味道係ok既，但你話佢係叫海南雞飯，就完全唔係個回事。🔴咖哩牛腩飯熱辣辣用煲仔上，咖哩好香椰汁味，食落辣度岩岩好，牛腩都唔錯，但比較少，反而有兩大舊牛筋，牛筋個人覺得切切佢，整返細舊d會方便進食d。加上個份量牛腩應該多返d，牛筋唔洗咁多。