麥記糕品 (Closed)

今日買咗心思思好耐既糯米糍🤤,其實聽聞驊記好好食,但見網上好多人排隊同埋搵唔到就算啦！糯米糍$12/1,$20/2有花生同埋芝麻,買咗芝麻味,但...一食落去略甜🥲但內餡好多都埋幾濕潤有少少花生粒增加口感,外皮唔會話好厚仲幾煙韌😉,但唯一缺點可能係太甜😓,亦有可能係芝麻容易有苦味掛🤔

麥記糕品🥧元朗好味傳統糕店新年想食啲甜既糕點，呢間糕品店係元朗開左好多年，砵仔糕同茶果都好味，今次試左原味、芝麻味同埋紫薯味砵仔糕🥧口感煙韌又唔會好甜🌟食到紫薯同埋紅豆粒，抵食又好味😋

鮮蝦鳳城水餃（$30/打）：隻隻飽滿，皮薄餡靚，不會太多肥豬肉，而且每隻都有一粒蝦，雲耳爽口，最愛買番屋企放冰格，隨時煮黎配湯麵食。仲有鮮蝦雲吞同其他菜包既餃子，但我特別鍾愛此水餃。蝦米腸：不錯，多蔥多蝦米，蒸或煎都不錯。粢飯（$12）：推介，別看其貌不揚，我食完一次就經常番啅，好中意裡面肉鬆既味道，炸菜又爽口，油炸鬼軟左都吾肥膩，一舊做午餐剛剛好。豆腐花（$6）：滑滑的，有豆味，經常買。砵仔糕：老公話好食，佢成日買，我就無乜食。

下晝三點三又口痕，啱啱經過呢間鋪頭，原來佢有好多傳統嘅糕點買。有砵仔糕、白糖糕而且砵仔糕仲有好多口味選擇添。今次買咗綠茶紅豆砵仔糕同埋紫薯砵仔糕。就咁肉眼睇都見到佢勁足料，啲豆多到一個點，有密集恐懼症都可能會俾佢嚇親😂。值得一讚嘅係佢嘅紫薯砵仔糕仲要有紫薯粒，好有咬口。兩件糕都唔係好甜, 好味呀。

早前陪媽咪到街市買餸，見到這間店有多款口味的砵仔糕，先買了原味試試 ($10/ 3個原味)，想不到內裡有超多紅豆，軟稔稔的，砵仔糕甜度適中亦很實在，相當不錯. 農曆年過後，再次經過，現在所有口味都劃一 $12/ 3個. 精明的我當然會選擇特別口味啦!紫薯砵仔糕 ($12/ 3個)西式紫薯甜品不算稀奇，但中式糕點出現紫薯口味，可見傳統中出現小變化已能擦出新的火花，也沒有不試的理由.買回家用微波爐叮數十秒，有如新鮮出爐熱燙的. 咬下去，估不到能咬到大大粒的紫薯肉，不是用上紫薯粉而已，淡淡的紫薯弄成砵仔糕模樣，再加上紅豆，竟然是如此夾，而且甜度輕怡，個人很喜歡. 如果經過元朗，不妨買來試試~

元朗有兩間麥記糕品，一間係阜財街，一間喺同益街市附近，呢間都係賣糕品，例如砵仔糕、芝麻卷、糯米糍、茶粿、白/黃糖糕傳統糕，另有生餃供應。 砵仔糕款式不少，有傳統嘅黃糖，仲有抹茶、紫薯、椰子口味，原味$4/個；$10/3個，而其他特別口味定價$5/個；$12/3個。紫薯砵仔糕 $12/3個砵仔糕幾足料，紫薯嗰款面頭除左有紅豆，仲有唔少紫薯粒。紫薯味食得出，味道天然，唔會太甜，紫薯粒稍乾。呢款砵仔糕較椰絲嗰款煙韌啲啲啲，但都唔係我鐘意嘅口感，因為我鐘意啲軟軟腍腍嘅。