13
2
1
5-min walk from Exit A2, Yau Ma Tei MTR Station continue reading
Telephone
90790282
Opening Hours
Today
17:30 - 03:00
Mon - Sun
17:30 - 03:00
Payment Method
Cash
Other Info
Online Reservation
Open Till Late
Reward Dining Points
Spot payment
About Reward Scheme
Review (19)
Level6 2017-12-10
1333 views
同樣的人腳,兩個月前打完邊爐;兩個月後再來一次,只不過換了地點。本來想食雞煲 ⋯⋯ 講起雞煲,熱潮由大圍的「來來重慶雞煲火鍋」帶起,反而最早打入香港市埸的「重慶雞公煲」熱潮未起已𨦫羽而歸。「來來」逐漸為人認識及熱捧之後,分店越開越多,雖然不清楚是特許合作或同一個老闆直接經營或只是盜用名字,始終維持偏辣原味;由於大受歡迎,坊間爭相仿效,並為了迎合更多客人的大眾化口味,推出減辣變奏版,始作俑者「來來」則堅持四川香辣麻原味。也不知什麼原因,其他地區的「來來」分店相繼結業,現只餘下大圍總店,但熱潮仍在,雞煲火鍋店已在香港遍地開花。正因為坊間的雞煲火鍋店多不勝數,也不知道那間好吃;猶豫之際,朋友發現了「鵝大哥鵝煲專家」,夠特別,一於試試。「鵝大哥」開業只有一年多,位置有點騎呢,位於一座並非以飲飲食食而著名的商業大廈樓上,最耐人尋味之處,大廈外牆並沒有明顯的廣告招牌、地下大堂入口也找不到大大個廣告燈箱,如果唔係有人介紹,真的不知道樓上有間火鍋店。所以,雖然是星期六晚上七點的黃金時段,整間火鍋店連同筆者這一枱在內只有兩枱客人,啤酒小姐也休閒地站在遠處、百無聊賴地玩手機。一間沒有什麼裝修、甚至有點地踎的樓上火鍋店,火鍋醬料款式當然也不會多,只有最最基本的四款:辣椒粒、蔥花、生蒜及炸蒜蓉。以一間小規模的火鍋店來說,火鍋配料款式算相當多元化,當然也唔會奢望有什麼游水海鮮;反過來說,要食游水海鮮的話也不會來這裏了。先叫一個小吃鎮店炸魚皮($48)。炸魚皮這類香口小吃,近年深受火鍋店食客歡迎,一來等待湯底滾起之前醫肚,二來可以放進火鍋內滾兩滾,吸收了湯底之後又是另一種滋味。叫得鎮店炸魚皮,當然有其原因。睇見這一杯炸魚皮之後,也認同沒有誇大。只要比對一下旁邊那一隻正常大小玻璃杯,就知道魚皮到底有多大塊。坊間其他火鍋店的炸魚皮,通常都會切成細細塊,目的並非為慳錢,只是方便同枱一班朋友分享。如此一大塊炸魚皮雖然未能滿足這個要求,但食起上嚟實在十分過癮;最重要魚皮夠香脆,又沒有一陣重重的油膉味。叫得「鵝大哥」,當然不會食辣雞煲、麻辣雞煲、酸雞煲或其他普通湯底,一定要食秘製肥鵝煲(大)($238)。鵝煲配鵝腸也是很順理成章的選擇,要了一碟正宗鮮鵝腸($72)。一大堆黏連著脂肪的肥鵝腸,一定美味無窮;起初以為鵝腸只是食完鵝煲後食火鍋的配料,原來唔係咁簡單。一大個生鐵鍋內放了半鍋滿的秘製肥鵝,斬件鵝肉已經用大量葱頭、蒜頭、香葱及秘製醬汁預先炆熟,皆因生炆中國家鵝的話要等一段很長時間才能變得軟腍,沒有可能要客人等,火鍋店也想盡快翻枱。冚上煲蓋,等幾分鐘翻熱鵝肉 ⋯⋯開蓋。夥計加入秘制炆鵝醬汁,再加入生鵝腸。之後翻動鵝肉及鵝腸,以拌勻醬汁及所有食材。熱力已稍為淥熟鵝腸表層。再冚上煲蓋。再過幾分鐘之後,打開煲蓋。鵝肉及醬汁已經滾起來,香氣撲鼻;放在中間的那一堆鵝腸也已經熟透了,並因為收乾水份而縮水了很多。大部份的鵝腸脂肪已經溶化在醬汁內,殘餘少量鵝脂剛剛好,鵝腸仍然保留足夠膻香之餘、又不會太韌,咬落去爽脆冇渣。吸收了秘製醬汁的鵝腸味道濃郁,食完一條又一條,幾個朋友全部爭相食鵝腸,暫且將鵝肉放在一邊。食完鵝腸,輪到鵝肉。炆煮時間十分充足,鵝肉非常柔軟、完全唔嚡又冇渣,加上爽滑的鵝皮及香濃醬汁,食完一件又一件。嘆完秘製肥鵝煲,當然不會浪費鐵鍋內餘下的醬汁。與坊間雞煲火鍋店相同,接着夥計就倒入金華火腿豬骨清湯,準備打邊爐。招牌牛肉拼盤($338)共有六種不同部位:頂級本地肥牛、金錢牛𦟌、安格斯牛柳粒、美國肥牛、安格斯牛頸脊及爽脆牛白肉,大大碟、款式又多。很明顯在沒有豪華裝修及旺區高昂租金的惡夢情況下,可以用更平的價錢、兼提供更抵食的出品;但質素如何?試過至知。金錢牛𦟌爽口彈牙。美國肥牛就非常一般了,如果餐牌沒有寫明係肥牛,單睇外表的不可能同肥牛扯上任何關係。安格斯牛頸脊切得比較厚身、夠晒咬口。典型安格斯牛,肉味濃而甜(因為採用的穀物和粟米飼養的關係)、肉汁豐富、肉質柔軟;就好似食緊安格斯肉眼扒,只不過少了一份焦香,多了幾分火鍋湯底的味道及幾分油脂香氣。頂級本地肥牛肉色深紅,單從外表已經睇得出新鮮本地牛肉的乾水、膠身,這方面較安格斯牛頸脊優勝;只可惜油花分布並不平均,影響了整體賣相。更令人失望的就是缺少了本地牛肉的超濃牛肉味;又由於油花不多,肉質也較為粗鞋。一般情況下,相同級數的頂級本地肥牛較安格斯牛肉更加適合打邊爐,估唔到這一次竟然出現了相反情況。安格斯牛柳粒岩岩巉巉,賣相一向不好睇。不似得安格斯牛頸脊片只需焯十幾秒、切忌過火;牛柳粒反而需要烚較長時間才能變得肉質軟腍,但又不能夠烚得太長時間,否則會太乾太粗鞋。其實,安格斯牛柳粒都相當好食,只不過安格斯牛頸脊實在太好吃太出色,比較之下,安格斯牛柳粒就給比下去了。上一次同朋友打邊爐有食牛胸爽,今次這一碟招牌牛肉拼盤同樣有,不過名字改了成為爽脆牛白肉。這塊原本黏附在牛肋骨的筋膜,望落去白雪雪,但其實並不算是脂肪,更似骨膠原多一點。淥熟之後皺成一團,並不會溶化。食落口也絲毫沒有任何牛脂羶、甚至沒有什麼牛肉味,只是有一點爽脆、一點帶著膠質的滑溜。同上次的態度一樣,寧取其他正宗牛肉部位。原隻大蝦水餃皇($88)的名字一點都沒有騙人,真的非常大隻。淥熟之後,從薄透的水餃皮已清楚見到餡料脹卜卜;咬開之後,全部都是相當大隻的鮮蝦肉,並沒有蝦膠,而且味道相當鮮甜,肯定不是廉價急凍去殻蝦。唯一的瑕疵也是太多蝦肉了;作為一隻傳統美味的水餃,應該加入適量的木耳絲、筍絲、大地魚碎及蝦籽,味道才更完美。汕頭牛筋丸($40)外表太過平滑,已經覺得唔係好似牛筋丸;食落去果然同普通牛丸沒有什麼分別。只有牛丸的爽口彈牙,缺少了牛筋丸應該有的煙韌及咬口。精選滋補三寶($138)名字改得相當貼切,包括了野生竹笙、花膠筒、特級魚肚,三款配料也會出現廣東炆煮補品菜式。當然用來打邊爐的級數一定沒有可能及得上炆花膠炆魚肚所採用的高級貨色。特級魚肚之前的浸泡時間並不足夠,加上唔係靚貨,即使已經烚了一段比較長的時間,仍然比較硬身,未能吸收火鍋湯底之餘,也欠缺了魚肚應有的軟綿滑溜、似是一塊鬆軟海棉的質感。花膠筒賣相比較好一點,最低限度望落去似是比較好的貨色;但味道同樣非常一般,咬落去很乾硬,並沒有花膠應有的腍滑膠質。三者比較之下,野生竹笙味道最好。有爽脆口感,又能吸收大量火鍋湯底。與上一次尖沙咀的中高檔次火鍋店比較,環境及裝修毫無疑問遜色很多,但火鍋配料質素也相當不賴;部份配料可能不夠精緻,但勝在有一個特色秘製肥鵝煲,單單是為了這個肥鵝煲,已經值得幫襯了。 continue reading
(The above review is the personal opinion of an user which does not represent OpenRice's point of view.)
高質火鍋,價錢唔貴 Featured Review
Level4 2017-05-13
2479 views
早前見到有人喺網上介紹呢間火鍋,覺得幾吸引,週五晚相約朋友一齊再黎食,唔知道人流多唔多,所以一早預左位置。餐廳位置唔多,但都幾闊落,唔知係咪因為上左樓,客人就唔多,有少少可惜,因為呢間野質素唔錯,價錢又唔貴,同朋友一致認為好食換轉佢鋪位如果喺大排檔或者地鋪,相信生意會好好多!一行六人,因為想親密啲,唔想開兩個爐,所以店員幫我地開左個電磁爐放中間,好細心。因為有朋友遲黎,所以我地叫左幾款小食,食住先。佢地有好多小炒可以揀,我幾欣賞,打邊爐又得,炒兩個餸食下都得。椒鹽魷魚鬚 $48炸得香口,又夠脆,魷魚都煙煙韌韌,送啤酒一流!避風塘小炒皇 $88小炒皇係招牌之一,炒得幾好食,魚乾幾大條,唔會太鹹太油膩,但份量唔多。炸魚皮 $48炸魚皮有四塊,比平時火鍋店食到嘅大塊,薄身得黎勁脆,而且加左少少調味,唔會好鹹,可以即食,唔需要怕太硬要淥幾秒先食得果種脆炸魚片頭 $40新鮮做起,皮脆脆地,片頭都幾彈牙,即食仲正!初時都驚鵝大哥淨係得鵝煲食,因為有朋友唔鐘意食鵝,所以睇清楚食評先黎,知道佢地有其他鍋底都放心。除左鵝煲、雞煲($148/$188),仲有螺頭鍋、醉雞鍋、沙嗲鍋、胡椒豬肚鍋等,定價$68-$118,選擇都幾多。我地揀左胡椒咸菜豬肚雞鍋,好出色,推介豉油皇鮮鵝腸 $108以蠔油撈起鵝腸,菠菜墊底。鵝腸新鮮,唔會好韌,食落爽口,鵝腸都幾肥美,相對份量較少。菠菜都索埋啲汁,又夠淋,又入味!胡椒咸菜豬肚雞鍋 $128/半隻有驚喜胡椒味重得黎唔嗆喉,我地當湯飲左幾碗呀雞件都幾好肉地,而且唔會好鞋。豬肚唔韌,冇壓味,好正,配料仲有什菌同咸菜,整體都非常足料,推介呢款鍋底呀,之後落嘅火鍋配料都輕鬆入味。手切本地牛肉 $218/大牛肉有頂級手切本地牛肉、手切安格斯牛頸脊、手切本地牛、安格斯肥牛粒、新鮮牛爽腩、美國肥牛等。本地牛冇雪感,一塊塊切到薄薄,較細塊,肥脂唔多。有牛味,淥一淥得,都算腍身,唔會好韌當然如果想食靚啲,可能要點頂級果隻。原隻大蝦水餃皇 $88一共有六粒,幾好食喎!每粒都有三、四隻鮮蝦,大大隻,新鮮爽口,抵食呀手打流沙蝦丸 $88蝦丸食落就冇水餃皇咁爽口,流沙效果出色,輕輕一督,已經流哂出黎,而且蛋黃味重,可以一試手打墨魚丸 $66墨魚丸較為遜色,雖然食到有墨魚嘅口感,但整體唔夠彈牙,咬落比較容易散,可能打得唔夠新雲吞拼水餃 $51雲吞都有鮮蝦,雖然冇咁大粒;水餃都ok啦,不過不失。即炸響鈴 $48響鈴係另一推介,即叫即炸,超鬆化單食都相當唔錯,食落冇油益味,亦都唔會覺得成口油,鬆脆到少少似食緊蛋卷,鐘意食響鈴嘅不能錯過!冰豆腐 $22索哂胡椒豬肚鍋底嘅味道,入味,好好食!百花釀油條 $48好多火鍋店都有呢種配料,釀左啲蝦餃喺油條入面。油炸鬼索湯汁一流,輕輕淥幾秒,保持脆口,又可以有少少味道,配蝦餃夠新鮮,不俗。冬瓜片 $28唐生菜 $28油麥菜 $28三樣配胡椒豬肚湯底都好正。杞子洛神花茶 $33汽水 $12/罐啤酒 $16/瓶醬料 $10/位總括黎講,鵝大哥嘅食物都幾有水準呀,特別係個湯底,朋友都讚不絕口,其他配料都幾新鮮,而且價錢唔貴。一行六人,埋單都係230蚊位,食到咁多野,相當抵食!我地仲要坐左人地三個鐘,哈哈。 continue reading
(The above review is the personal opinion of an user which does not represent OpenRice's point of view.)
鵝大哥唔只得鵝正 Featured Review
Level4 2017-05-08
1943 views
呢間鵝大哥係朋友幫襯過幾次,覺得唔錯, 推介我地去試嘅!鵝大哥主打鵝煲,加上新鮮配料,定價合理,不過位於樓上鋪,客人都以熟客為主,我地喺樓上樓下食過野,都冇為意有間火鍋店。唔喜歡食鵝嘅人,都唔洗擔心,因為鵝大哥都有一般火鍋湯底,例如花膠龍躉湯底、雞煲、胡椒豬肚雞窩等十幾款,定價$68-$118。仲有小炒、小唔想食火鍋仲可以選擇點菜食飯,都幾多選擇。咁我一場黎到 ,當然係食招牌鵝煲~鵝大哥面積唔算好大,裝潢比較簡單,一般火鍋店格局,但座位間唔會好逼狹。當然好似我地穩陣啲,就預約左先啦。醬料每位收$10,但免加一。秘製肥鵝煲 $148/份首先將鵝斬件,加上鵝大哥自製醬汁炆過,一上枱已經聞到好惹味同食雞煲一樣,都係先食鵝,再加水繼續火鍋。因為我地人少,點左一份,鵝肉份量就唔係好多。秘製醬汁鹹淡適中,食落冇坊間嘅雞煲咁重口味,唔會太辣或者太鹹,至於鵝肉炆得相當入味,雖然稱唔上嫩滑,但唔會好韌或者乾柴鮮鵝腸 $68好多時喺其他火鍋店食鵝腸,遇著唔係太新鮮嘅話,一係就一陣味,一係就唔夠爽唔夠肥。鵝大哥嘅鵝腸完全冇以上問題,基本上好新鮮,帶少少肥脂,食落爽口微脆,配合鵝煲嘅醬汁,好食!果然係招牌鎮店炸魚皮 $48先黎一份新鮮厚塊炸魚皮,大約有四至五大塊,上枱都哇聲四起。問過店員,炸魚皮以大門膳嘅皮即炸,幾乎每枱都有點,同其他火鍋店嘅炸魚皮有少少唔同。第一佢非常大塊,第二較為薄身,食落好脆唔油膩,似食薯片嘅感覺!咁香口嘅小食,配啤酒一流深海北寄蚌 $80/隻 (火鍋用)北寄蚌新鮮,灼一灼食得,鮮甜爽口!呢個價錢都幾抵食原隻大蝦水餃皇、手打流沙蝦丸 $96/雙拼原本兩樣各自定價 $88,但我地只有兩個人食唔到咁多,所以選擇加8蚊雙拼。水餃皇真材實料,一隻裡面大概有三至四隻大蝦,食落非常爽口,滿足。至於蝦丸有流沙效果,蛋黃味道唔算好強烈,蝦丸都幾彈牙,未至於驚喜。另外有啲手打丸類定價 $42-$66,可以接受。因為人少少,就唔係點左好多火鍋配料,而且見佢仲有小菜、小食,我地留左肚點左個小炒皇試下。小炒皇 $88鵝大哥嘅小炒皇都幾出色,以魚乾、蝦乾、韭菜花炒成,魚乾相對其他酒樓菜館大條,連同蝦乾炸到好脆口,調味恰當,唔會太鹹,會愈食愈想食,當然啦呢個點都會熱氣少少。杞子洛神花茶 $33/每渣飲品方面都有一般啤酒汽水,另外有幾款自家製竹蔗茅根水、洛神花茶、紫貝天葵等,味道夠天然,唔會太甜。食完火鍋,小炒,飲下涼茶點都好過飲汽水嘅。總括黎講,鵝大哥嘅鵝煲幾有特色,配料選擇多,我地點嘅幾款食物味道不俗,價錢唔貴,特別係宵夜時段仲有更多優惠,適合一班朋友聚會,既可以打邊爐,亦可以有小炒食。特別推介佢地嘅鵝腸、炸魚皮,好出色呢!餐牌: continue reading
(The above review is the personal opinion of an user which does not represent OpenRice's point of view.)
Level2 2018-04-01
128 views
我們公司又聚會!今次收工黎到鵝大哥度食鵝煲⋯其實之前都黎過一次!好好食~再黎返食⋯帶埋同事朋友們一齊去食好西!煲一定係食鵝煲~再加配鵝腸新鮮鵝腸,乾淨無多餘油脂~職員又好好幫我地整好曬⋯夠時候食上枱俾我地!仲有既係我地一班9個人book左10:3010:30之後先有 discount 職員無計我地時!早左到都俾我地入去坐地叫野食都有折頭~係好好既~食牛既又想咩都試下!記得叫返個牛拼盤牛肉粒煮太耐都吾會「銀」👈🏻吾識打果個字其他肉滾兩下就食得⋯都好有牛味加完湯再滾起~職員又會幫我地格油!服務相當好讚甘開心緊係要啤啤佢!仲有 tower 1664叫!有張私家枱放酒~吾會阻住食野由於叫太多野食!無逐一影相!其實仲有其他野食未到掛住食無影⋯必叫必試可以試下鵝肝 , 滾30秒就食得!好香~黎左兩次都有叫黎食!真係都幾好食架!蛋黃蝦丸(我吾係好記得叫咩名,正確個名叫)食果陣要小心「會爆」架粟米(係好甜既)又好食喔小食炸魚皮、魷魚🦑酥都好岩送酒!整體係好好!老闆介紹話佢地既小菜都相當有水準⋯等我下次去又試下!再同大家報告 continue reading
(The above review is the personal opinion of an user which does not represent OpenRice's point of view.)
Level1 2018-01-12
278 views
今晚又再來鵝大哥,老闆依然熱情招待我們,食品質素维持水準,啤酒夠凍,炸鱼皮即叫即炸但份量好像比以前小了些。最重要汁料仍然好味,冇味精,吃完不口渴,座到幾點都可以。 continue reading
(The above review is the personal opinion of an user which does not represent OpenRice's point of view.)