Fungsteak (Closed)

見到佢午餐幾抵食，$38蚊起，最平嘅牛扒$55，出邊有自助吧任食，有飯、沙律、湯，自助吧幾衞生，沙津分好一罐罐，自已加汁，但飲品要加$7罐，叫了一份魚柳及肉眼，炸魚柳有兩塊，大小適中，幾脆下。肉眼扒大約有150-200g，肉質唔錯，上碟時全生，自己係石版上面煎，肉質唔會話好鞋，幾有牛味，佢個黑椒汁味道幾濃，幾好食，醬汁出面自已任攞。埋單唔使加一，如果呢個價錢係旺角有呢個質素同食得飽，真係幾抵食，Cp值高。…Read More

閒日晚上9點，望入鋪頭見拖緊地，以為收鋪，原來都可以食到12點。鋪頭完全冇人，心諗可能係伏或者係新鋪，不過唔緊要，新鋪要支持，伏就當咩都試下。 p.s 坐咗陣都有其他客人。一坐低，放低menu望咗陣，想叫肉眼扒同封門柳，cashier 哥哥即刻有咩好食，拖地姐姐就介紹有湯同沙律任食，服務相當到位。叫咗肉眼180g (~6oz) , $78女仔夠食啦。的確唔係好重肉味，哥哥提我哋唔好太熟，所以冇overcook , 口感都不錯。朋友叫咗封門柳(300g~10oz) ($158)標榜肉味重，肉味係重啲啲。另外重有沙律任食，一個個樽咁都衛生，醬有和風，沙律同千島。自己揀湯係羅宋湯，冇牛粒，個人鍾意濃啲傑啲嘅，不過佢唔係稀到水嗰隻，係正常嘅，都好飲。飲品加7蚊任飲，有冷泡茶，韓國蘆薈汁，烏龍茶，汽水同支裝啤酒，好足夠。白飯就差少少，乾得滯，應該真係太夜，飯煲剩番5/6碗。…Read More

石板燒唔係新鮮嘢，但係玩下都幾過癮嘅。呢到一睇，應該出名牛，不過我唔食牛嘅。又要試石板燒，其實選擇不多。飲品要加錢，是但啦！試下嘛。麵豉湯任飲，一般，一碗夠了。仲有個羅宋湯，都好一般，可不理。沙律菜出得幾慢，要等佢出，正常沙律菜囉，又係任食，都要食多幾次掛。而個飯又係任食，可自由加飯素，咁梗係落多D啦！仲有叫左個炸魚柳 夠脆口，都新鮮。而重點來了，就係石板燒肉。主角出場了，叫左個西斑牙腩肉 ，上菜就慢左D，因為下午人手唔夠喎。燒之前記得問佢攞定膨脹400斤圍裙呀，D油真係彈得好勁嫁。燒肉過程超好玩 你問我肉好唔好食，其實都算唔靭，都有肉味，叫新鮮肉，夠肥得夠又唔覺油膩嘅，不過其次了，黎自己燒下肉，熱辣辣咁食，已物超所值啦！至於我飲左個自家制蜜桃烏龍冷泡菜，真係有蜜桃味。想燒住食，又唔想去郊外燒嘢食，石皮燒係一個選擇。…Read More

見網上有優惠券，咁就一抱心態試吓啦。網上買左98蚊個劵， 點知最後比左幾塊肥牛質素既牛肉片我，份量又少，如果係男去食就一定唔夠飽啦，味道我就覺得麻麻，求其響超市買塊牛肉可能都靚過佢。飲品仲要唔包要自己加錢，因為太口渴最後叫咗桂花烏龍同蜜糖烏龍， 但都好難飲。同埋間餐廳嘅環境好差，除咗油煙味，我都理解，因為係燒鐵板牛，所以我唔 mind。但我竟然聞到除咗油煙味嘅臭味，真係一坐落其實就想走，不過事先訂咗劵，焗住食，一食完拿拿林就走。對呢間店完全失望，中伏餐廳，要環境差食物質素又差，不過一不可再。…Read More

真係相都廢事影鋪面唔大，差唔多9點去食，成間鋪得4枱人左右。大部分牛肉嘅選擇已經售罄，最想食嘅M7同M9都已經冇晒貨，唯有揀美國牛。同朋友一齊落order, 朋友都食左一半，我嗰塊都未嚟。一嚟到賣相已經唔得，幾塊薄肉就咁放左喺塊石板上面，唔明點解要等咁耐。平時食石燒，300g都食唔晒，今日肚餓諗住食多啲，叫左個360g。食完仲食左兩碗飯，都唔覺得飽，個人認為啲肉係唔夠360g, 如果唔係唔會唔飽。肉質方面，我係食牛肩胛肉眼，分左4塊上。幾塊肉都好薄，馬上醒水將幾塊肉搭起，等佢唔好韌。但食第一塊時就已經韌晒，唯有咋咋林將其餘3塊都即刻切開，擺落隻碟度，如果唔係真係韌到食唔到。牛肉方面亦無咩牛味。全店唯一叫做好味嘅係佢個珍珠飯，食左兩碗……Read More

近呢幾年香港越嚟越多呢款啲食石板燒既店鋪出現，呢種食法最早應該係日本做起，係近年先傳入香港，而今次係旺角有呢間豐石板燒，見有啲時間就入去試下啦～佢門口係有部自動售賣機既，你可以先揀左想食既套餐，佢既價錢由70幾蚊起，最貴既牛幾百蚊都有，而今次就揀左個最平既試下，嘟左比錢之後就可以入去坐啦～入面佢有一個區域係半自助區，可以係果度拎飯，味增湯同沙律，飯就係珍珠米，而沙律就係一樽樽，可以自己拎同加沙律醬同芝麻醬，感覺上都幾唔錯～而主菜都要等左一陣先上菜，佢既石板燒到好熱，然後牛扒可以自己決定幾熟，想熟啲就燒耐啲，而牛扒既份量都大份，足夠一個中午飯既份量，絕對係夠飽既👍🏻但牛肉既質地就比較韌左小小，有幾舊係完全𡁻唔開😂呢個就一般啦，可能係揀左最平既餐既掛😂總結呢間餐廳都算抵食既，尤其係有得任食飯果啲，而牛肉既質素就還好啦～…Read More

牛一般，飯一般，湯一般，沙律還可以，嘢飲十$10,一句講完，唔會再來食，一路石板燒，一路呢油周圍弹，唔會享受，大家要諗清楚，價$唔算貴，真係試一次唔會返轉頭，點解一定要80字，真係一般到沒嘢可寫，一切自助服務…Read More

今晚黎試下呢間石燒牛😍😍😍去之前記得要係OpenRice到買優惠券😆😆咁先最抵食😆我就買左個優惠券67折個餐黎試下麵豉湯-當晚我去到無咩人食，唔知係咪因為咁個湯只係微暖味道係好飲既，但唔夠熱都唔會想再飲多碗沙律-睇相都睇到唔多新鮮，好多都乾乾地，所以都係食一個碗唔會再食飯就正常，上面既野可以加或唔加，隨你喜好當日同朋友叫左兩種排既美國M9金裝錢級個優惠餐-但我唔記得影相我記得只有十小塊，但肉質林身都好食既，但係得100g，完全唔夠食而呢塊係封門柳200g都係好細塊，肉質都好食既珍寶帶子$40一粒，佢燒完出黎即食，無咩特別肉係一定唔夠食，但佢地最多只有200g叫，所以其實叫400g先至係叫夠食…Read More

喺旺角想食石燒牛，就搵咗呢間，價錢平，質素唔錯。我叫咗美國牛肉牛小排，份量都算唔錯有200g，佢會比塊石燒板你，首先塗上牛油，之後再放上肉，塊板都算幾熱，一放上去已經開始自己燒緊，燒緊嘅時候味道好香，我覺得個肥肉份量比例唔錯，所以燒完都唔會好乾，好林，幾好食。如果燒到一半覺得唔夠熱，可以要求更換石板，個套餐加$7可以換罐裝飲品，本身個套餐跟咗任食沙律，任食白飯，任飲湯，我當晚個湯係麵豉湯，聽講前一晚係羅宋湯。坐低之後，如果比現金可以食完先比，如果比信用卡就要落單嘅時候一齊俾埋。…Read More

行完山，落咗旺角， 諗住食乜好😏， 忽然想起之前睇過youtuber 介紹，豐石板燒專門店。即刻喺openrice訂位， 帶位姐姐好有禮貌咁介紹有啲乜嘢食，我哋最後嗌咗 安格斯西冷，美國肩胛肉， 同埋西班牙黑毛豬柳。 落完 order 拿拿林去攞嘢飲同埋有沙律湯。 今日個湯係羅宋湯，好正 點知通知西班牙黑毛豬冇晒貨，仲免費升級日本穀飼黑毛豬 燒肉中職員拎左塊圍巾幫我地遮住個袋，免得d油4射先講肩胛肉，油香牛味重西冷顯然落敗。 日本豬邊有得輸這間店必定會再幫襯…Read More

1. 圍裙、手套欠奉，以前都會有張廚房紙鋪喺舊牛扒上面，依家就彈到成身都係油2. 封門柳比較喺開張期已經大大唔同味噌湯咸左少少 應該係煲太耐 少水所以咸3. 放熊寶寶俾人噴又叫人唔好係店入面噴出門口噴，一噴就吹哂入眼😑4. 差唔多食完，塊板凍哂都叫人唔好放刀叉上去。講真，d待應唔好咁多管閒事，做好自己要做既野，出少句聲咁你俾刀叉我係咪要拎係手?台面已經油到不得了🙄5. cashier個老細連枱號都唔知，係度打機就快唔提佢收錢連錢都唔識收隔左差唔多1年再返黎幫襯下，記得以前有個老細個朋友嘅服務好好又細心，同啲客有講有笑諗著越做越好，點知.......…Read More

美國Prime肩胛肉眼(200g)🥩$78美國Prime封門柳(200g)🦁$98首先放上牛油響石板上🧈然後就直接將牛肉放上去煎😝牛肉相當厚身，睇住佢煎煮，確實好吸引☺️牛肩胛肉眼，肥瘦適中，牛味濃郁🤤封門柳亦相當唔錯，肉嫩多汁😋芝麻雞翼🐔$20香芋丸😀$20藍青口😎$20佢哋仲有小食供應😛芝麻雞翼即叫即炸，香脆可口😏香芋丸同青口，味道都唔錯😇自家製桂花烏龍冷泡茶🍵$10樽裝冷泡茶，茶味濃🤓飲唔曬仲可以拎走☺️…Read More

喺旺角行完街搵野食，呢間真係好味又抵食好玩，一人一個石板慢慢燒🤗石板燒套餐包自助沙律吧、白飯、湯任食。這個價錢假期來食，無論肉質，份量，處理都唔錯，職員服務都好好，性價比超高，十分推介👍🏻👍🏻會再encore😋😋牛肩胛肉眼（$78）肉上碟前會預先煎香左兩面，透氣，再放落石板度燒就唔會出血水，好欣賞肉係切左2塊，份量好足，配一大嚿牛油，好快熟，好香又唔易痴底，唔駛煮好耐燒焦都唔熟😋封門柳（$98）封門柳我第一次試，肉有彈性d，牛味好出，雖然同樣是200g，但肉質較多👍🏻😍加小食芝麻雞翼（$20）雞翼煎得卜卜脆，新鮮炸起，加上芝麻好香口😆香芋丸（$20）這款首推，有驚喜😆好好食，好香口🤤🎉餡多唔會好油淋曬。…Read More

呢排興石板燒，鐘意食幾成熟都係自己控制~豐石板燒專門店價錢大眾化，而且牛肉質素高，整體係石板燒界算優越呀~餐廳會提供圍裙給客人，以免燒肉時彈到成身都係，另外，走個陣仲可以噴返啲熊寶寶，唔洗驚食完燒肉👍🏻👍🏻👍🏻成身味餐廳真係好體貼！餐廳嘅沙律菜、白飯、 麵豉湯係自助同任食嘅！✨沙律菜係一杯杯放係雪櫃，夠曬衛生！✨ 麵豉湯粥麵入面有海帶、豆腐等，而且味道都唔錯！⭐牛肩胛肉眼牛肩胛肉眼肉質較堅實，而且油脂豐富比較適合用啲煎！先有牛油查上鐵板，再放牛肩胛肉眼上去煎，大約煎到6,7成熟就食得啦！完全自己控制熟度，食落肉汁豐富，肉質軟腍不韌~可因應自己鐘意加鹽、 黑椒汁、燒肉汁等😆🌠封門柳封門柳幾珍貴就係人都知啦~打邊爐就食得多，但拎嚟燒我就未試過😆鐘意牛味濃嘅，就真係要點呢款，肉味較重，油花較少，燒完點小小鹽，已經可以食！🌠 榴槤炸彈一見到呢個小食即點，咬落好夠脆，內餡香濃幼滑，味道甘甜可口！食完令人回味😏🌠芝麻雞翼雞翼外皮金黃酥脆，咬開入面雪白嫩滑嘅雞肉，香口非常，而且好鮮味，作為前菜小吃的確唔錯😆…Read More

豐 - 石板燒專門店石板燒牛肉算是近年本港興起的一款料理，在港九新界都有不同的石板燒專門店，按照自己的喜好去選擇不同部位、份量、品種的肉類，放在熱石上燒烤，今日這間也不例外。白飯、熱湯、沙律也是任添的，一定可以吃到飽，另外醬汁也有很多選擇，有燒肉汁、豬扒汁和黑椒汁。美國Prime肩胛肉眼 200g的厚切的肩胛肉眼，油脂豐盈，肉質扎實有咬勁。美國Prime封門柳比起肩胛肉眼，封門柳的肉質更加軟腍，牛味較為濃郁，可以吃到牛肉的原汁原味。芝麻雞翼、香芋丸小食也有提供，我們點了香脆的雞翼和甜甜的香芋丸。…Read More