蛇王恩 (Closed)

由細食到大，好足料，又好味，真材實料唔係落粉…. 所以食食下會變水咗，唔會好杰，但我就係鍾佢咁…. 蛇肉又多，食完次次都好暖身…今晚凍咗專登嚟想食，但竟然冇做啦，好懷念🥲

講到香港本土冬日美食，首當其衝嘅當然係蛇羹。現今賣蛇羮嘅小店已經買少見少，過多幾年可能已經不復存在，所以喺呢一日到來之前，更要好好食多幾次。今日食咗一小碗蛇羮，落足料啖啖都係蛇肉，一絲絲嘅蛇肉紋路比其他肉更深，更有口感，另可加上薄脆及檸檬草更香口。

見天氣凍，好想食返碗蛇羹，行過見到，就走咗入去食，叫咗碗細嘅，就咁睇，的確同我喺深水埗食嘅，好有分別，雖然啲料唔係話好少，食到尾都仲見到有肉絲同蛇絲，但係個羹我就覺得麻麻地，食到最尾，變咗稀水咁，我已經係細碗，食幾啖已經食完，但係都可以食到最尾三份一嘅時候，真係肉還肉，水還水(係好稀嘅羹)咁樣，不過啲脆脆都係脆嘅，但唔畀任攞嚟食囉，淨係畀少少一個碟仔嘅脆脆，實在太少啦，總括黎講，唔係因為呢度就腳，我都唔會再過嚟食，呢個價錢，呢個味道，嗯嗯🙅

好多年無寫過食評，太失望，蛇肉少，價錢貴，無所謂，最慘係成碗都係螞蟻，嘔。。。。我估佢只做遊客生意，真係貼錢買難受，以後唔會再黎，好多年無寫過食評，太失望，蛇肉少，價錢貴，無所謂，最慘係成碗都係螞蟻，嘔。。。。我估佢只做遊客生意，真係貼錢買難受，以後唔會再黎，

記得細個果陣去食過蛇宴，太耐已經唔記得係咩味，最近天氣開始轉涼，又醒起可以去食蛇喎，去開佐敦就在附近的店試吓啦～店面簡單，牆上貼滿菜式，有蛇羮（分大中小）、不同嘅蛇酒、蛇肉、糯米飯等應有盡有。我要了一碗中size的蛇羮，湯羮的味道不錯，食完唔會好口乾，有啲薑絲、木耳絲一齊煮，可能係冰鮮蛇嘅關係，唔太食到蛇味，不過就唔腥，另附薄脆一小碟。食到一半，體內開始有鼓暖流，當天天氣未算好凍，如果再凍啲去食就正，食到個人暖笠笠。一邊食緊，一邊聽到路過途人話食碗蛇羮都好喎，不過講完都係冇入嚟食。不過老實講間中補下真係好應該㗎！🤣

一向都喜歡食蛇羹，基本上openrice揾到喺港島區&九龍區嘅蛇舖，好多間都有食過，咁啱就無去過呢間。事發當日正喺隔離街，又想食蛇羹，就試吓買碗外賣返屋企吃吓。一見呢類舊店，心態上/情意結上都相信一定有保証。見到大/中/小碗，分別$98/78/49，舖內擺出堂食大/中/小碗作參考，見大嘅碗係接近一般食日本拉麵/連鎖米線嘅碗，咁咪要碗大，反正只係差廿蚊。點知攞外賣時，我覺得隻外賣碗仲細過堂食隻中碗，我問個阿叔我要大喎，佢好無嘢咁答呢個係大㗎啦，同嗰隻一樣咁多㗎(我相信我一定唔係第一個問)。如果唔係俾咗錢，我相信我會唔要就走。返屋企途中再睇吓呢間嘢嘅負評，原來都有人話外賣好唔抵。仲有啲comments 係豬肉多過蛇..........我屋企人食嘅時候我特登唔comment, 佢一睇就話點解咁白嘅&未食過咁多豬肉嘅蛇羹喎.............如果唔當蛇羹食，唔介意用蛇羹價錢食豬肉羹，咁都ok嘅。不過我就一定唔會有下次，幅相影得唔好.....有興趣就睇睇....

細個時見過深水埗街頭有人劏蛇攞膽，以前興食蛇宴我都不會吃，或經過蛇羹舖都過門不入……覺得冇必要食又冇話好想食……今晚去廟街本想食煲仔飯，但朋友已提過叫我試下食蛇，今晚附近就有間開咗好耐嘅蛇羹舖，有糯米飯食，所以便試下了……之前已聽人講蛇肉都好似同普通豬肉絲一樣，冇乜咩腥味，因為未試過怕食吾倒，所以我地叫咗一個細蛇羹及糯米飯share。個羹伴有似迭迷香的香草，話用來辟腥味，及脆卜卜的脆脆，第一啖入口，似係香草蓋掩住蛇羹的味道，又夾著脆脆一齊食，加上碗內有豬肉絲，所以都吾知自己係咪食緊蛇 😅……至於糯米飯，一般般，但吾係太多臘味味，吾夠香……第一次食蛇的經驗就是這樣，食吾到有咩腥味的味道

揸車到佐敦，突然好想去食蛇羹，所以去蛇王恩坐下來食午餐，足料份量無變，店舖保留住小時候望的裝修一樣。跟小時候媽媽帶我來食的仲保持到水準！值得一讚今年一定會再食多幾次

天氣好凍要食d補品呀，今次要去佐敦做野，所以揀左蛇王恩試下味！舖頭細細，傳統蛇舖裝修，大概得4張細枱，去到既時候都差不多坐滿！看看餐牌，價錢都幾貴，叫左中蛇羹$66同糯米飯加潤腸$43，其實都好細碗不過味道先至最重要，即刻試味！蛇羹材料足，味道不濃不淡，但無特別，即係唔會令人記住既一碗蛇羹！糯米飯做得不錯，糯米粒粒分明，雖然顏色很深，但味道不咸！潤腸皮太硬，餡料有濃濃酒香味，但肥膏太多，女孩子一定不喜歡！食完之後個人暖粒粒

小女子是慕名而去的。吃了中號蛇羮及糯米飯。蛇羮有蛇絲和肉絲，比例平均。有些店會有很多蛇絲，表面足料，但口感較不硬，黐牙⋯ 蛇王恩的味道則會較有層次感。糯米飯軟熟，多冬菇和臘肉，食落有香味，而且豉油色澤炒得均勻。可以再去⋯⋯ （如果薄脆多些再可加多點分）

黑食會前後都舉辦左四次, 而肥鄧同串爆先後揸莊, 終於輪到吹雞, 既然可以揸莊, 我吹雞當然要落區, 乘機睇下啲檔口撐唔撐我吹雞, 所以唔使諗好耐就已經鎖定左四川串燒佬為攻打對象! 響朵訂位一定走唔甩, 不過最重要都係想留番張靚枱啫!為左做得好好睇睇, 當日決定一早就閃, 落區兜下, 順便睇下有冇好野; 仲記得串爆兩個幾星期前話過想食蛇, 於是見仲有時間, 就撩下串爆不如先食碗蛇, 至再去搵四川佬! 當串爆聽到呢個建議, 直頭用行動黎支持, 由九龍灣飛的黎佐敦, 可見佢對蛇有幾大仇口! 由於事出突然, 所以大聲未能趕及蛇會, 但肥鄧和串爆已經促勢待發, 於是吹雞帶路揀左呢間蛇竇, 其實之前都未黎過, 不過見到呢啲老店企左咁多年, 應該都唔少料, 三條友就行左入去! 入到蛇竇, 人亦唔少, 不過老闆見到我吹雞, 即刻拿拿聲安排入座! 由於仲有下場, 所以三個人決定柯打兩碗細蛇, 再加一碗糯米飯!等嘅時間唔使好耐, 兩碗細蛇就已經擺左喺面前, 象徵式分下贓, 咁就兩碗變三碗, 由於對蛇嘅興趣始終唔太大, 所以已經有好多年冇食過, 是次入黎亦勾起好多童年回憶! 細蛇羹味道都幾討好, 不過由細

見早排凍凍地，所以約埋幾個『蛇友』去食蛇羹。其實我好耐好耐都冇食過蛇羹咖喇，所以都唔係太記得啲味道係點咯。『蛇友』們個個都叫咗碗中size蛇羹再加一個糯米飯嚟食。蛇羹一到，我就覺得同以前有啲唔同，或者係每一間嘅做法唔同啦。記得以前食嘅，係冇檸檬葉絲咖。不過唔緊要啦，試咗再講。碗蛇羹就真係好足料，但係同我以前食過嘅蛇羹比較，呢度就『水』咗啲喇，一啲都唔冇『羹』嘅效果囉。同埋略微腥咗少少。糯米飯就麻麻地喇，可能蒸得太耐，所以好『淋』呀。總抬嚟講，佢地用料真係好足，但好可惜，可能同我兒時食過有幾大出入啦，所以唔會令我會再去食囉。

成日聽人講食蛇好,朋友又話這間好食,甘咪試下囉。去到叫左大蛇羹一碗($60),臘味飯($17),燉龜湯($50)蛇羹上有檸檬葉預先放左上去,而薄脆就另上又見到整一片片檸檬葉,甘我就問下啦!原來整檸檬葉有好多工夫,甘大片葉變成一絲絲,好勁呀!蛇羹有好多蛇肉好足材,又冇水汪汪,好味。而臘味飯好香。龜湯都唔錯。真係值得一讚。

今個秋冬都未食過蛇羹, 昨夜一支公去左dinner.叫左個大蛇($60). 真係如下面食評所講, 豬肉好多好多, 仲多過蛇-冇咩蛇肉咋!好失望呢, 加左價, 反而唔足料.暫時唔會再去食了 : 冇咩蛇肉的蛇羹, 想點先!

呢間野d 蛇羹在肉絲的材料中有一半都用豬肉一半用蛇肉完全無雞, 我就覺得唔好味羅! 睇下我上載o個張相就會見到大蛇羹一碗裡有幾多豬肉(8成的豬肉畀我分到碗中), 鐘意食豬的人啱晒o羅!