Yue Cuisine

佐敦的童軍總會，名字及地點我不陌生，但就從來沒有在其中菜廳吃過飯，今晚朋友攪局，藉此到訪一遊。從前的金陶軒已經結業了，換上了粵品滙，以前的飯店我沒有來過，但大膽估計，裝潢及間隔不會有什麼大改變。會所向來都是提供平實的粵菜晚餐，今晚的菜色亦不例外。菜單上的第一道是雲南董蛋，真令我好奇，什麼是董蛋，哈哈，其實只是打錯字，薰蛋來的。這個薰蛋又真幾有煙熏味，蛋黃外表不完美但都夠滑。接下來的朱洪武豆腐，特色是豆腐內有片火腿。出水芙蓉明蝦球樣靚蛋滑，蒸得平滑有水準。脆皮牛坑腩有水準，炸漿酥脆肉鬆軟，配備的咖喱醬更出色，香港式咖哩，香滑味濃。和味豬手煲炇得腍嫩入味，豬手大件皮厚，骨膠原非常豐富。砵酒焗桶蠔味道濃郁帶甜，桶蠔極之大隻肥美有點脆。蝦子柚皮、蝦糕啫啫唐生菜、油脆皮雞皆煮至恰到好處。明廚炒飯，鑊氣都夠，但味道有點淡材料不夠豐富。不過不失，每人＄310。…Read More

悅媚大力推介此酒樓點心好得，但未知晚飯如果，適逢阿媽節將致，就設宴款待一番啦。睇地址及地圖一直以為係龍寶國際裡面，原來係隔離小小的童軍會門口進入，做您唔到。步入大廳，已有半場被包做公司 annual dinner，幸好地方大好寬落，而且食客不算多，還算寧靜舒服，空氣流通，甚有私人空間添。翻弄菜牌幾次，不考慮家常菜喇，來個燉湯，有魚有菜有肉有海鮮有甜品，搞掂等開飯。侍應姐姐、嬸嬸、叔叔們都招呼有加，和謁友善有禮貌，感覺良好舒服。杏汁燉白肺湯，我飲開厚厚湯汁，黏黏滑滑，實實在在的杏白色。而面前依碗就真係似湯，較為水汪汪，雖則其貌不揚，味道蠻不錯。淡淡的杏汁味道散發點點咸香，亦有雞湯的鮮甜味道，還有菜甜味喎，好豐富飲得過。竟然美女忘記自己不喜歡杏汁白肺湯既味道，無緊要，我地幾個飲得晒啦。杏汁燉白肺湯，湯渣都唔好浪費。白菜膽半腍帶爽，味道清新。白肺不腥不嗅，乾淨勁彈勁滑。雞腳已完全被湯汁滲透，啜一啜骨肉分離，油香還在，沾點豉油吊吊味仍是可口。茶燻糖心蛋，當然要一氣呵成，原粒掉入口啦。清爽的茶葉香氣，入口不濁不咸，加上甘甜糖心蛋，食一隻剛好，滿足。蔥油海蜇花，跟我想像的原全不一樣，以前係翠園食過非常美味，蔥油香噴噴，一條條爽爽的海蜇花呢。撩撩個汁，只不過是陳醋、蒜片、青辣椒，那來的蔥油？好采唔難食，一片片的海蜇花爽脆有咸香，跟雲耳齊齊捲上陳醋，酸咪咪夠開胃。鹽酥豆腐磚，平凡的豆腐烹調得如此令人唾涎欲滴，新鮮出爐剛炸起的白滑豆腐，薄薄的脆皮，用筷子要巧妙地才能夾得起呢﹗先來椒鹽鬆化的外層，再來滑嘟嘟的豆腐，豆香芬芳，不用其他調味已十分可口。蒜蓉粉絲蒸貴妃蚌，不是熱辣辣蒸起的嗎？怕燙傷我地所以攤段時間才送上？溫度微暖，這種溫度已經可以直接全數倒落口咯。蒸得耐左少少，幸好還保存鮮甜微彈微爽，似乎洗得太過火，海水味沒有了，螺咸味沒有了，蒜蓉豉油味最突出，整體合格的。麵醬蒸大魚頭，睇落份量係半隻大魚頭，用子薑做底非常有創意，麵醬混子薑出黎既味道十足十梅子醬呢，酸酸咸咸的，中呎碼的大魚頭，肉不是太多，啜啜味道過過口癮還不錯。辣汁煮花螺，完全無酒味，應該只係用辣汁煮，唔係辣酒煮。湯汁淨水沒什麼香料或配料，十分單調。花螺肉已炆得軟軟腍腍，只剩下微弱的螺味，其他全部是辣汁的味道。微辣而充滿醬油香，平實樸素，沒什麼驚喜。脆皮雞半隻，香脆薄雞皮不肥不膩，雞仔細細不黐肥，身材適中無肥膏，髀肉還嫩、胸肉略鞋，邊位乾到柴皮，少少的雞味、少少的咸香，平凡炸子雞。招牌菜就只得這種程度？大埔樂天漁港做得更加好喎﹗美女最愛食燒雞皮，開心開心。蒜蓉炒白菜仔，衝刺一大輪濃味肉食，係時候來點清清的，簡單便是美。炒得香甜欠點鑊氣，蒜蓉剛好，再多就會澀喇，白菜爽嫩可口，食到唔停口。忘記影牛奶燉椰皇，還有牛奶布甸新地。…Read More

自從轉咗手後，我對昵間餐廳失望到一個点！厄錢！自己上錯菜又唔認，明明叫咗$480一份花錦鱔皇，点知上菜時比咗舊斑我地！叫埋經理出來都唔認！睇都無睇過就話我地唔信可以打包攞去驗！唔洗錢都唔會再黎！…Read More

姨丈生日宴，屋企人選擇去童軍總會食，之前都幫襯過，聽聞轉左手，裝修後第一次去，感覺環境同食物比以前好好多，成家人都食得好開心，食完又可行出空中花園，欣賞夜景，屋企聚會不錯選擇。大蝦大隻夠爽，配搭藍梅等生果，開胃清新。乳豬不太肥，皮夠脆，但欠d賣相。燉湯非常足料，冇味精，值得一讚。鮑魚夠淋夠滑 花菇又厚又大隻。店長特意替我們找了一條游水黃皮老虎斑，咁大條都好耐冇食過。店長大力推介我們這味脆皮蔥油雞，果然皮脆肉滑，冇介紹錯。姨丈生日，當然唔少得壽桃包，這個姨媽一早預訂，相當驚喜。…Read More

一行九人搵間坐得舒服啲嘅中菜酒樓，老人家生日食飯， 最緊要環境乾淨，唔好太嘈， 啱啱新裝修完，童軍總監俱樂部嘅中菜廳，確實係唔錯地方，環境光猛，服務員態度殷勤有禮，欣賞。先來個意大利黑醋 一字排，新口味， 肉排醃得入味 ，酸甜度啱啱好!燒腩仔~燒鵝，新鮮燒出嚟，媽媽讚不絕口。四川麻辣雞煲~麻辣感豐富，唔算太辣，公公都啱食。羊腩煲配生菜~廚師用咗羊件，好大嚿，如果炆耐啲會更加淋更加好!清蒸龍躉仔~公公最鍾意食魚， 條魚蒸得啱啱好， 由頭食到落尾，唔錯!蝦醬啫啫芥蘭煲~未送到上枱蝦醬嘅香味已經飄到埋嚟，熱辣辣嘅芥蘭，好吃!鮮淮山翠玉瓜木耳，OK脆麻花~用咗新嘅油炸， 鬆脆，口感唔錯。仲有表弟最鍾意嘅紅豆糕，賣相唔錯， 但三個唔係好夠，最後店員送咗每人一碗木瓜雪耳糖水，潤呀！…Read More