Tso Choi Restaurant (Closed)

山楂骨山楂是用對了，味道亦正常。但上菜時排骨不香不脆，食指難動，恐怕是週日夜晚人多，大量製作之后翻熱吧？梅菜扣肉小煲上菜，味道一般而已，汁稍多，梅菜稍嫌細碎。扣肉厚薄肥瘦比例對頭。欖菜肉碎四季豆三菜之中以這最像樣。肉末与四季豆吃得出是即炒，味道正常，非大量製作。豬油撈飯色香味不足。蒸飯碗上。”豬油”在飯後清枱時仍作油狀，是混入其他油太多以致未能在室溫凝固？豉油色味亦不足，非老抽。這招牌作令人有點失望。番薯糖水薑味足，番薯份量亦足。不錯。…Read More

早排經過九龍城，見到有一間叫粗菜館的地方，問下人八卦下係食D乜，原來呢間係出名食豬油撈飯，搜尋到港島區有分店，今晚去開炮台山，所以想試下。這裡應該係新開的，環境都好乾淨，服務員態度友善，在嚟之前已經SEARCH咗呢度有D咩招牌菜式及人家D食評，我今次想試下炒魚腩同涼瓜炒蛋先。可能時間早，不用等位，一坐低，揭一下餐牌後就好快落ORDER，可能個侍應聽錯咗，所以開頭送錯咗碟蝦仁炒蛋來(我見都炒得好靚)，不過佢知道搞錯後都即刻攞走，不久炒魚腩到，D魚腩趁熱食，D皮係脆脆的，熱辣辣好好食，豬油飯呢，其實吾加豬油、豉油都好好食，因為我鍾意呢種飯的質地，吾似有D地方的白飯腍到似冷飯，我都有加油同豉油食，試下咩味同感覺，油其實聞到有少少香蒜味，不過吾知係咪用肥豬肉炸出來，但又吾見有白色膏狀喎，應該係改良咗了。。。食到一半時涼瓜炒蛋嚟，聽就聽得多呢個食譜，但未食過或煮過，今次係第1次食，賣相好又好食。今晚餐飯雖然係好普通的家常餸菜，但要煮得好食都吾容易架！好滿意啊！…Read More

平時好少出港島區，呢晚飯接老婆放工順便食埋晚飯，見到附近間<粗菜館>幾多人食下，應該唔錯見到有豬油撈飯，好耐冇食過，因為唔係周圍都有，豬油及醬油分開裝係小碟，再配白飯，d豬油仲溫溫底，撈埋白飯好香，竟然一人食晒一碗。小菜點左個爽滑脆魚皮，炸的魚皮就食得多，呢個又幾特別下，用左豉油、葱薑絲，加熟油再撈埋魚皮，爽口~見餐牌特別係推介的<梅、蘭、菊、竹>，點左老婆最鍾意的左(蘭)西檸脆脆雞， 外皮炸到好鬆脆，雞肉仍然鮮嫩幼滑，淋埋個西檸醬汁，令人胃口大增。 招牌炒豬什我覺得做得唔錯，有豬腸、豬心、豬肚、豬肝，冇內臟的腥味，配埋薑蔥、再用酒猛火大炒， 岩岩好!…Read More

我係通過網上外賣平台外賣叫左兩個餸一個炒麵同埋白飯， 唸住蔡瀾介紹，menu又多選擇先試下，但係完全大失所望。我點左一個麻辣水煮魚腩$176，魚腩煎完再煮，咁都叫水煮魚？完全唔係個回事咯，'鞋十十' 一d都冇水煮魚個種又嫩又滑既感覺...唔講都唔知係魚腩⋯⋯ 食左兩舊已經唔想再食，仲要一大半都係芽菜。個白飯16蚊仲少過平時屋企飯碗裝一碗飯既量，普通一間餐廳外賣白飯8蚊都有一大個飯盒咁多，想話淨係食白飯都食唔飽！另外個煎魚餅$102同埋個炒一丁$115極普通，得個貴字，應該唔會再食呢間嘢..其它餸我唸都唔敢試了，真係粗菜冇錯...…Read More

好多年沒有吃過粗菜館，當年見到蔡灡介紹過，曾經吃了一餐，覺得味道都可以，只是偏甜，另外因爲大部分菜色膽固醇都幾高，所以很少想到要吃，不究健康最重要。細佬生日飯話要食呢間，生日大晒，他話事。原來粗菜館近年在北角開了分店，就在七海中心附近，近我細佬屋企，而且有地下及二樓兩層。當晚叫了九個餸，有梅菜扣肉煲，釀豆腐，𦍑蔥炒牛肉，煎魚餅，炸魚腩，椒鹽鮮魷魚，南乳燜豬手，炸大腸，𦍑蔥炒豬雜。所有菜色都好味，而膽固醇非常高，因此只能很久吃一次。…Read More

係炮台山附近食lunch 食到悶悶地，決定去粗菜館試下！餐牌有好多款餸揀，最終揀左鹹魚醬茄子，再配豬油飯！第一次食豬油飯，原來好'流'，到放工仲滯緊:(但店員好好，知我食左豬油飯不停加熱水比我話咁樣消滯,讚！而個鹹魚醬茄子味十分濃，但鹹魚醬有d鯹，但勝在大碟，好送飯！…Read More

雖然本人對中餐沒有什麼偏好，平時出街食飯首選都是西餐日本餐，可是今天卻口痕想吃小菜，可能也是Chinese的關係吧。於是便找了附近的粗菜館吃個午飯。兩個人點了兩個送，一肉一菜加每人一碗白粥。山楂醬排骨排骨煎的非常香口，多肉少骨；山楂醬味道開胃，清甜得來帶點酸味，跟剛炸好的排骨很配，用來送白飯或是白粥都一樣好吃。這碟排骨分量十足，應該夠四個人吃的，不過我們只有兩個人，唯有多吃一點吧。蔡瀾鹹魚醬蒸豆腐吃過一大碟肉之後，實在要吃點蔬菜清清胃口。青菜在家吃很多，來個蒸豆腐就最好不過了。豆腐大大件，滑身香甜，加一點鹹魚醬非常惹味，配一口白粥真是無得彈。其實粗菜館我已經吃過兩三次，每一次點的小菜品質都不錯，實而不華，是開飯好地方，不錯不錯。…Read More

某日同一班新入職既同事一齊去放晏啦去左附近一間粗菜館食野不過，裝潢方面就絕不粗糙啦，有種古色古香的感覺。 呢間餐廳就係廣東菜，即係住家飯啦。 我地叫左咕嚕肉同埋炒通菜份量唔算好多，午餐都還好，晚餐的話就差好多 。 咕嚕肉啲醬汁都入到去啲肉度，味道甜甜地，好可以引起到食客的味蕾。 通菜炒到收晒啲水，有少少太乾身，多啲汁好啲。 埋單每人60將，講真係偏貴，偶爾一試亦無訪，但是日日都去就唔多明智啦…Read More

開張已一段日子，終於來到一試。點了3個Lunch set小菜，份量比較少。咕嚕肉（$66），越吃越覺得跟平時吃的味道不一樣，原來加了彊來炒，但是那個菠蘿可以要多一點嗎？😅 咸魚醬蒸肉餅（$66），餐牌上說要等20分鐘，結果不用10分鐘就有了。大愛咸魚醬，不過份量真的太少了吧？很薄很薄的一塊肉餅😅翠玉瓜炒豬頸肉（$66），不太夠味道，瓜很淡，肉很老。例湯好像是佛手瓜，沒有太多味精，及格。…Read More

食晚飯時候經過總係見倒有人等位，今晚就試一試佢蜆介炒牛肉 - 大大碟好多牛肉，薑蔥蜆介炒香，非常惹味；牛肉有冇"乸"過就唔係好識分，食落嫩滑咁囉山楂骨 - 味道討好，唔太酸，如果肉質鬆軟啲就好，稍稍韌咗啲但唔鞋金沙軟殼蟹 - 咸香咸香好惹味猪油撈飯 - 視為全晚主角，飯粒 粒粒分明，撈埋猪油同頭抽後嗰股甘香好耐冇食過喇； 唔知猪油撈飯啲白飯係咪原碗蒸熟，見隔離枱就咁叫白飯望落係唔同呈飯煲飯狀後記：清爽嘅一餐晚飯，下次再試炒猪雜…Read More

今晚收得夜，九點半都未食飯，走去粗菜館，諗住粗菜淡飯簡簡單單一餐。望望餐牌， 嘩！雞乸咁大隻字: 少鹽，走味精，少油。有誠意到咁，抵讚，搞到我霎時覺得好似同清洪食緊飯，因他去到任向餐廳，例必囑咐伙記“ 少鹽，走味精，少油” 哈哈！嗯，Menu有味新菜好吸引喎，就係“香煎梅香馬友件”，要碗白粥送鹹魚我就夠啦，其他餸菜你地隨便叫。馬友來了，飄來陣陣鹹魚香，煎得好靚，廚師有心機。呢條梅香肉質又碎又軟，又夠鹹香，以這種質素，來貨價一定不菲，賣$188，我覺得唔貴。呢件梅香馬友冇得彈，高班貨，在粗菜館食粗菜再配靚梅香鹹魚，夠哂風味。鹹魚食梅香好過實肉，製作過程都複雜啲啦。面對如斯美食，我吃出懷舊風味，重拾兒時感覺，我無言以對，我真的感動了！…Read More

有點名大於實，唔係唔好味，但未至於~去食都係因為一個字，”近”~預祝父親節，同爸爸，媽咪同埋男友去左呢間平時排隊排到傻既試下~其實樣樣都好食，不過平時大排檔都係食呢d,樓下菜餐廳食飯又係食呢d,不過佢係好味既~凍魚皮，呢個出晒事，硬到咬唔陏~招牌炒魚腩，冇咩味，媽咪煮得好食過佢一千倍~招牌炒豬雜，普通，豬肝唔係想像中咁鮮嫩，係粉肝，本人唔中意~不過d蔥好惹味~魚香茄子煲，呢個得!好香唔咸，味道岩岩好!芥末炸蠔，呢個係我最愛，佢d蠔好大隻好新鮮，炸粉唔厚而且隻蠔會爆汁~大大隻乳鴿，好大隻既乳鴿，個汁好味但隻鴿好老~豬油撈飯，um....我記得細個d豬油係白色一舊舊，可能熱左變左油，都香既....總結來講都算好食，不過冇咩鑊氣~…Read More

一聽到粗菜館呢個名，就諗起「粗茶淡飯」，就嚟食下睇下佢D野係未真係咁粗先。話明粗菜就叫個粗粗地嘅菜先，於是就叫咗呢個鹹魚醬炒生菜。$72生菜大大碟，而且加上鹹魚醬鹹鹹地，又夠鑊氣，唔錯秘製煀乳鴿 $70都幾正喎，食落似鹵水鴿咁，汁又香濃，肉鮮嫩…Read More

自從去左港島區返工之後就經常找朋友食晚飯,呢晚朋友帶左去一間連蔡生都大讚的中菜館,一聽到有豬油撈飯已經超興趣, 就算減肥中都一定要食! 打開餐牌見到好多選擇,特別係推介的<梅、蘭、菊、竹>可惜我地得3個人, 唯有點最想食的幾款~先黎2個冷盤小菜,<(竹) 麻香辣篙笋>涼伴小菜, 師傅特別用左初生的䈑笋,配上秘制高湯輕灼, 再加上川味醬油咬落清新爽口, 帶微微的麻辣感覺怕辣的朋友都可以食!<爽滑脆魚皮> 平時食的都係炸脆左的魚皮, 又乾又熱氣呢一食左呢一道之後就停唔到口用左、豉油、葱絲，薑絲以上熟油撈埋魚皮簡單又美味!<杞子清湯豬腦>好清甜甘香, 豬腦入口即溶主菜最後選擇左<(蘭)西檸脆脆雞> 同平時食的西檸雞唔同, 外皮炸到好鬆脆但又唔會乾珍珍內裡雞肉仍然保持鮮嫩幼滑再配上一碗西檸醬汁, 令人食完一塊又一塊! <招牌炒豬什>蔡生都推介的名菜又點可以錯過,烹調內臟菜式最重要係清理的過程和手法,呢度的廚師做得好好,所以完全唔會有內臟的腥味配上薑、蔥、酒以猛火大炒, 唔會太生或太熟有豬肚、豬肝、豬腸、豬心雖然我只食豬肝, 但真係好正!有禁好味的菜點可以冇飯呢?! 最期待的<豬油撈飯>滿滿的豬油及醬油, 配上一碗白飯豬油預先預熱左, 白飯又熱哄哄,一邊撈一邊香氣四溢,食完整整一碗好滿足!…Read More

Step的舊公司在銅鑼灣威菲路道，今晚約了2位舊同事食飯，同事們毫不猶豫約了Step在炮台山地鐵站附近食飯；他們說最近那裡開了一間新的中菜館，除了地方寛敞整潔乾淨，還有食物質素不俗，是一個聚舊詳談的好去處；Step聽後大感興趣，一問之下，原來這一間就是粗菜館新開的分店:)。粗菜館Step在少時候也幫襯過，記得大約是1995年，年少的Step住在新蒲崗，時常到九龍城和家人吃晚飯；當時粗菜館在九龍城開了第一間總店，Step和家人也會來粗菜館食晚餐，但後來Step搬去沙田之後，便很少再去九龍城食晚飯 (九龍城總店已經結業搬遷)；粗菜館往後愈做愈出色，分店除了分佈在全港九之外，而且還遍佈內地和日本；今晚能夠再次來到粗菜館享用晚餐，Step未去到已經想到很多粗菜館的撚手名菜，一陣一定要order食夠本 。------------------------------~室內裝潢~粗菜館門口裝潢一灌平實，除了一個金漆招牌外，最吸引到每一個人眼睛就是一張由蔡瀾題字的『天下美味炒豬什』毛筆字；炮台山店有2層，下層店舖很深，在門口望進去有一望無際的感覺；行進店內時又現了一張由金庸題字的毛筆字；在店的中間位置有樓梯可直上2樓閣樓， Waitor說2樓擺放著多張10人的大枱；而下層大多是4-6人枱，座位與座位之間空間感不俗，沒有壓迫和不舒適的感覺。------------------------------~美食佳餚~粗菜館的菜式，主要以家常小菜為主；菜式當中，除了有清啖健康選擇之外，也有極度邪惡的煎炸內臟等菜餚；但Step很明白『美味的東西通常都不會健康的』，今晚和同事難得來到粗菜館，甚麼健康、減肥、瘦身，一齊都要先拋諸腦後，『食完先講』啦…(竹)麻香辣䈑筍($48) (8♥/10♥)Step看到現在有試食價(原價$58)，當然先order一個來作前菜啦；Waitor說這個前菜，師傅用上了剛剛初生的䈑筍，再用上秘制高湯輕輕灼燙以保持鮮嫩；之後再將灼過的䈑筍用接近零度的秘制高湯冰封冷藏，這樣做可以令䈑筍保持清新爽脆，再用上帶點麻辣的川味醬油放在䈑筍上即可食用。䈑筍已經被師傅切成長條狀，最令Step印象深刻的就是䈑筍那個晶瑩剔透的青綠的翡翠顏色，非常漂亮；入口時清甜爽脆，清新可口，咀嚼時䈑筍裡面還有一點上湯的味道，加上川味醬油令口腔有點麻麻辣辣的感覺(辣味點到即止)，這個麻香辣䈑筍絕對是醒胃好味道!!招牌炒豬什($82)(8.5♥/10♥)雖然食動物內臟對現在很多人來說，是邪惡不太健康的，但來到粗菜館，怎可能不吃這個被蔡瀾推介的八大名菜之一呢? (Step不理了，食完先再算吧!!) 據Waitor所講，這一味招牌炒豬什是由蔡瀾親自親筆撰寫的菜式，而且在這家粗菜館開張當日，蔡瀾也是開張嘉賓之一，也要求大廚煮這味招牌炒豬什讓他品嘗回味一番；所以話，怎可能不order這個招牌炒豬什呢?這個招牌炒豬什用的內臟部份也是很講究，例如豬肚要用大豬，豬肝則用上中豬，至於豬腸和心要選用小豬；而這個炒豬什可以說很考師傅功架，首先要讓不同的內臟同時間熟透而不會太生或過熟，已經是一個大的考驗；師傅先將不同部位的內臟進行獨立處理，之後再同一時間放入鑊中炒；為了辟除內臟的異味，師傅在上碟前會用上了大量的薑蔥和老酒炒熟兜亂；急不及待，Step立即把每一種豬的內臟放入口中品嘗，果然一點內臟的味道也沒有，而且香味撲鼻令人垂涎；其次就是每一種內臟真的炒得生熟剛好，例如豬肝入口時依然鬆軟嫩滑，沒有『鞋』口的感覺；腸潤腸的腸羶味依然保持，但內裡已經被清洗乾淨，爽口彈牙，咀嚼感十足；而豬心豬腸則炒得香脆爽口，口感一流；蔡瀾先生真識食，這碟炒豬什令Step和同事們都食到停不了口，果然是人間美食!!香脆辣魚腩($82) (8.5♥/10♥)食完邪惡美味的招牌炒豬什，Step延續邪惡美味的另一菜式，order了這個也是被蔡瀾推介的八大名菜之一 - 香脆辣魚腩；這個師傅用上了鯇魚的魚腩，配上秘製香味醃制，再將魚腩炸至金黃色令鯇魚的淡水草味去掉，Waitor說這個很講究師傅炸時的時間和火喉…但大家不要因為這個菜名有一個『辣』字而怕辣而敬而遠之，本身炸魚腩並沒有辣味，而辣味全來自小碗上的秘製川辣醬汁，而Waitor也說這個魚腩就算不點秘製川辣醬汁，本身已經有味道了，可以單獨進食；好，那麼Step先不點秘製川辣醬汁，吃一口魚腩，魚腩被炸得金黃色的，香脆可口，而Waitor真的沒有說錯，這個魚腩因有秘製香味醃制過，魚腩的表面甚至肉質都已經有味道，吃起來口感與味道也有點類似食椒鹽魚柳的感覺，但這個肉質嫩滑鮮甜，入口鬆化魚香味不俗，一點啖水魚的草味也沒有，令人愈食愈想食!!  (煎炸食物果然也是美味可口的!!)不過要小心就是魚骨比較多，進食時要打醒十二分精神啊!!而這個秘製川辣醬汁，開始食時並不算太辣，但如果因為這樣就愈點愈多來進食的話，那就出事了，因為這個秘製川辣醬汁妙在辣味會慢慢地從胃開始辣上來喉嚨再辣到舌頭，可以說是由內再辣到外，辣得令你滿頭是汗，非常過癮 ；川辣醬汁和魚腩一起進食，會中和了魚腩醃制過的味道，令口感變得香辣而非香脆，可以說是2種不同食法，師傅果然想得妙，怪不知也是蔡瀾推介的八大名菜之一!!(蘭)西檸脆脆雞 ($88) (8♥/10♥)這道菜也是因為有試食價(原價碼98)，食肉獸Step 當然不執輸order!!看起來感覺平平無奇的酥炸雞扒，原來也用了獨門配方烹調；師傅因想令雞扒更為甘香鬆脆，結果不用煎炸用粉漿，而改用一般茶餐廳製作法蘭西多士的蛋漿，黏附著上等鮮嫩的雞扒酥炸而成；而西檸醬汁也是師傅用新鮮檸檬調制而成，取其清新自然的酸酸味道。(法蘭西多士已經很邪惡，還用這個方法來炸雞扒，邪惡指數爆升!!)Waitor也說雞扒因有醃制過，加上香脆蛋漿，單獨進食味道也是不錯呢；Step又先食雞扒而不點檸檬漿汁，這個蛋漿脆皮口感果然非同凡響，入口時脆皮傳來絲絲的蛋香，口感香脆鬆化，香脆程度可以用『卜卜聲』來形容；而且雞肉依然保持嫩滑多汁，肉味香濃，只是這樣食已經足夠好味，但多吃時會有點膩… 這時只要點一點西檸汁即可，天然檸檬所制的西檸汁，酸味清新自然，味道一點不造作，而師傅為了就大部份食客的口味，醬汁已經調得帶點甜味；而西檸汁可以即時中和了雞扒的油膩感，味道變得清爽醒胃，也是停不了口的美味菜式!!惠州梅菜扣肉 ($82) (8♥/10♥)講到邪惡之首，真的不能不提粗菜館的另一名菜 - 惠州梅菜扣肉；據Waitor所講，師傅用上了惠州上等梅菜，再以秘製方法製作，而扣肉方面一定要用上最少5層的五花腩肉，再以一日時間配以醬油等炆調而成，這樣不但令扣肉可以更為入味，也令五花腩的肉質鬆化得來帶點質感，提升口感和層次。Waitor送來時，可以看到整個煲都是油淋淋的，無論是扣肉或是梅菜都是反著油光，邪惡到極點!!用筷子夾起扣肉，肉身依然保持實淨不會散開，也可以清楚看到脂肪和豬肉層次分明，色澤在經過一日的烹調下變得深色； Step二話不說放入口中，立即明白為何邪惡之首也有這麼多捧場客支持；在口中扣肉的脂肪慢慢地在口腔內溶化變成了香口的豬油，而腩肉肉質本身已經被煮得酥化，兩者咀嚼在一起口感豐腴層次不俗，豬油的香味加上梅菜的甜味，實在好味得令人難以抗拒!! 惠州梅菜也是亮點之一，味道甜中帶點咸味，加上豬油香味的加持，用來送飯或是送白粥，簡直是一流之選；可惜這味扣肉不能吃多，始終多吃還是會膩，以Step來說1塊起2塊止，其他餘下的扣肉還是交給同事們吧!!老火湯 - 番茄薯仔湯(一窩)($98) (8♥/10♥)吃了這麼多不同等級的邪惡美食，還是order一個湯水來潤肺潤喉；Step order了這個番茄薯仔湯，這個湯很有屋企的味道，原因Step的媽子定時也會煲這個番茄薯仔湯；不要以為這個湯只有番茄薯仔，裡面還有雞肉、雞腳、豬展等材料，這樣令湯的味道更為清甜可口；湯色仍然保持清澈，雖然材料內有不少番茄，但番茄味未算濃郁，薯仔並沒有煲到散開令湯變得混濁；湯味道在雞肉和豬展等材料加持下鮮甜美味，最重要是湯面只有少量的油份，感覺清淡健康；而個湯足夠3個人每人飲2-3碗，老火湯來說這個價錢可說是物有所值。豬油撈飯 $20 (8♥/10♥)豬油撈飯並不是很多地方可以食得到，Step看到餐牌有又order了每人一碗；豬油撈飯可以追溯到6-70年代的香港，那時人民收入不多，很多家庭都不能負擔價格高昂的肉類，唯有買一些便宜的肥豬肉，回家後炸成豬油再冷卻凝固後作長時間儲存，在吃飯時才加入一點豬油，和醬油一起撈勻食用，美味可口，就算不連餸菜一起吃也可以；豬油撈飯可以說是以前貧窮社會的恩物美食，現在社會豐衣足食，又怎會知道豬油撈飯原來也有一段艱苦的歷史呢?!:)這個豬油撈飯並不像其他飯店般用砵仔碟上或是用水樽倒出豬油豉油撈飯，而是很精緻地一個一個小碗裝著豬油與豉油；豬油清澈透明略帶點黃色，香味不俗，但卻令人感覺這個豬油不夠原始，Step覺得奶白色的豬油才是最為原汁原味 ；將豉油、豬油和米飯撈勻後，入口時豬油香味豐厚口感加上豉油的甘香咸味，配上質感十足的米飯，這個邪惡的美味，令人情不自禁地大口大口地吃呢!! ------------------------------邊食飯邊詳談大家的近況，時間眨眼間過了2小時，有小朋友的同事要回家和家中老虎報到，埋單每人大約200元，Step覺得物有所值…粗菜館每一款餸菜都是獨當一面，令人留下深刻的印象，除了可以看得出師傅的功架外，也可以看得出他們對菜餚認真製作的態度；加上價錢大眾化，不難理解為何粗菜館可以衝出香港，甚至遠到日本也有他們的分店，現在還能夠逆市在炮台山開新店擴充!! Step下次來炮台山針灸時，除了可以食西餐外，也多了一個中菜選擇；粗菜館這份邪惡的美味，雖然真的很邪惡，但Step真心不能抵抗這份美味誘惑!!!粗菜館 (炮台山)地址: 北角炮台山英皇道125-133號月明樓地下味道: 8♥/10♥環境: 8♥/10♥服務: 8♥/10♥衛生: 8♥/10♥抵食: 8♥/10♥整體評價: 8♥/10♥是次消費: HKD594 (人均消費HKD198)…Read More