炳記茶檔

Open Now

Now Closed

假期難得到大坑一遊，見到茶檔外有長長的人龍，再上OpenRice查看，見到好評人數眾多，於是便慕名而排隊，排左差不多10分鐘，茶檔阿姐都是操普通話的。當時滿心期待，入座即叫招牌菜式：豬扒麵、雞翼麵、奶醬多、熱檸茶、熱奶茶。誰知，眼前的豬扒是用滾水煮完後沾上豉油醬的豬肉，吃下來根本是雪藏豬的味道！🙂‍↕️ 再吃埋雞翼，那種甜甜的味道像是瑞士汁，但又不完全是瑞士汁，總之就好奇怪，雞翼無味，咬下來一點也不彈牙，是雪藏了很耐的甜豉油雞翼，又不至梅淋淋。飲品方面，奶茶和熱檸茶根本是極之普通的貨色，奶茶入口一點都不香滑，我和同行友人吃完後只想趕快離去，亦異口同聲說：一定唔會再有下一次！價錢方面，那個豬扒麵的確只值$30，吃完也唔飽，唔來吃都唔會後悔，普通一間冰室的早餐也比炳記茶檔好吃千萬倍！

去開天后，突然想去埋大坑食下午茶。好耐冇去，走一圈，有D餐廳已經不在了，懷舊鐵皮檔茶記還在，幸好保留大坑特色之一。那天沒有之前那麼酷熱，加上有點風，那就來個懷舊一下吧。沒有叫麵餐，簡簡單單叫咗蛋牛治，油占多，還有必選的（凍）奶茶。多士脆，蛋牛治ok，奶茶唔錯，主要食（戶外）風味唔嘆冷氣，喝上一口凍奶茶都有涼快感覺。提一提此茶記下午3點收爐，眼見有一個三人家庭2點45分也到店吃東西。今天唔同往日了，埋單也可以用電子支付了

✔️三餸公仔麵，今日揀咗三個餸，分別有五香肉丁紅腸同埋雞蛋。非常鍾意食佢嘅雞蛋。每一次都係會煎到嗰邊燶燶地，咬落去有少少脆口嘅感覺，而且雞蛋每一次都知道半生熟，有流心嘅效果！唔肯入聲就係罐頭嘅質素，就冇話太大特別，但係加埋公仔麵食就別有一番風味，紅腸佢本身都煎得非常香，而且就算你這三個餸佢都會比4-5件，多到差啲食唔晒！另外我覺得大家可以試吓佢枱面嘅辣椒豉油，雖然佢哋指天椒，有少少辣，不妨可以加少少落個面度，味道更佳！

一直有聽聞呢間炳記茶檔既名聲，話未食過炳記等如無去過大坑，今日路過見落大雨無人排，就去試下。其實唔知食乜，凈係睇過YouTuber話豬扒麵同奶茶正，就點豬扒雞翼麵加奶茶，朋友點咗餐蛋麵，我仲笑佢唔食豬扒等如無嚟過。點知嚟到佢碗麵係default有豬扒，餐蛋只係加上去，唔知係搞錯定正常。豬扒同雞翼都入味，豉油味濃，好唔好食就好個人，但肉質就真係比較實，無咩鮮味，明白都係雪藏嘢，個麵就唔多掂，淋pat pat 食落似係用唔夠熱既水浸熟而唔係煮熟。奶茶偏苦茶味少啲，好一般。朋友就話佢杯茶走好正，但個豬扒麵就同我感覺差唔多，都係嗰句，口味好個人。招呼方面都可以，阿姐都有笑笑口打招呼，唔會好似一啲so called網紅餐廳咁西面。阿姐見我哋就講普通話，有啲人可能會覺得唔舒服，我就無咩所謂，而且阿姐應該係講開普通話既新移民，當時本地客都多，佢哋唔似係一心做遊客生意嗰種餐廳。埋單HKD 60，朋友就 50，午餐嚟講OK。整體感覺雖然無驚喜，不過唔使排隊既我會再嚟。

被稱為去大坑必食嘅茶檔，環境的確好有香港茶檔風味。綠色鐵皮屋嘅設計，摺檯同埋膠凳。唔少人因為有機會撞到明星而去打卡。放假嚟到大坑，決定試一試到底好唔好食。豬扒麵 $28 凍奶茶 $20豬扒有重黑椒汁味，食落豬扒都鬆軟。但係整體味道普通，同屋邨茶記味道接近，如果要專去到嚟港島食佢，會有啲失望。戶外露天茶檔，嚟到真係打個卡食個香港風味。如果要大排長龍，我會寧願食吓大坑附近其他美食。

上次聽到人哋嗌奶醬麥多夾心 記住咗今日同confirm一定要嗌呢樣嘢其實我有印象之前都有試過㗎，不過感覺好似麻麻哋（因為麥包有提子乾）所以之後又嗌返正常多士但係唔知係咪經歷咗啲嘢個人變咗？定還是我老咗接受嘅嘢多咗？ 今日再食返又好似幾唔錯喎，（老闆都講笑話我麻煩呀🤪，又要夾心又要開四，下次可以試吓奶油麥多夾心，應該仲好食啲😅😂連平時要搭份火腿煎蛋都冇搭到，慳返$12😙咁啱坐隔籬一位男士應該係內地人本身食緊一份豬扒蛋麵，點知佢再落order話要兩份蛋牛烘😱落單個姐姐都以為自己聽錯（以為普通話佢聽唔明）🫢老闆攞住兩份蛋牛烘行埋嚟嘅時候，佢都好搞笑咁話-食咁多？😂重聽到個客回應話-係呀，肚餓呀嘛😝😝🤣🤣開心就係咁簡單

明明自己目的地係要去沙田，但係唔知點解個心就覺得要去跑馬地，於是乎就諗住可以去炳記食完個早餐，再施施然行過去跑馬地。而家逢假日炳記都要排晒長龍，就喺我排緊隊嘅時候，嚇然發現原來我係要去沙田。其實之後都係約咗friend去沙田食嘢，心諗早知一早就直接去沙田，唔使兜咗一個大圈過咗海再去新界，又嘥咗車錢😮‍💨莫非我真係咁鍾意過海？定係真係念念不忘炳記？因為晏晝預咗要食豐富嘅午餐，所以早餐就食得輕擎啲-淨係多士同奶茶！趕頭趕命，因為仲要搭返車出沙田 唉😮‍💨臨走之前聽到另一個女仔落order（佢應該係超熟客仔）佢叫咗奶醬麥多夾心+大奶茶。下次都試吓先 😂

第一次中午黎排長龍試唔到，今日一早再黎試下有咩好食？呢d舊式茶檔真係已經好少，所以我好期待叫咗紅腸蛋麵同凍咖啡但。。個麵完全無味。。好難食😩點解可以咁難食。。真係咩味都無。。。真係好想唔食。。真係好難食不過又唔想浪費食物。。最後唯有食晒可唔可以話我知有咩好食？多士？包？唉～ 除咗懷舊風味，完全唔知仲有咩原因會再黎？！

今朝有事做晏咗少少去到（差唔多11點啦）條龍已經嚇親你，真係霸咗成條街😓平時去到即刻有得坐低㗎嘛，仲要凍冰冰，坐正路口位，食風都食飽咗因為飢寒交迫又加埋情傷，所以食咩都好似冇乜味道咁，我都係叫返平時嗰啲- 奶油多加隻雞蛋/火腿（其實我有諗過不如試吓新嘢，但結果都係跳唔出comfort zone 😑)成件事好似亂晒咁，平時煮開麵嘅少爺仔走咗出嚟捧餐，落開單嘅走去沖奶茶，整開多士嘅又做咗其他嘢，沖茶嘅走咗去食飯😩結果勁多事搞成咁「啲奶油多到你唔想要，厚厚嘅牛油加厚厚嘅煉奶 omg 」煎蛋火腿都唔會點差掛，係勁多油啫，平時都差唔多奶茶當然就跌晒鑊啦，是但一個人沖我都識沖啦咁🫣希望佢係因為多人搞唔掂先係咁啦，再係咁落去好難再去幫襯㗎喎！😩

每逢有咩活動喺港島區，我都會有意無意過嚟一轉，唔單只係銅鑼灣㗎，就連去到金鐘我都要專登嚟一嚟再搭叮叮先安樂！你話真係特別超好食咩又不至於⋯只係一種情懷同埋風味，因為大排檔嘅特色真係唔係度度都搵到。已經食到啲夥計都認得我，做到老闆都退埋休，做埋顧問，今日竟然得到佢嘅寵幸，專登走埋嚟搭一搭我膊頭添⋯⋯好溫暖呀！之後雖然我都唔係第一次一個人自己嚟，不過呢種孤單嘅感覺已經冇第一次咁強烈，可能已經真係死咗心。一如以往嘅例牌奶油多一開4+火腿煎一隻蛋同埋熱奶茶！聽到都有啲悶，決定，下次要轉一轉自己個Menu先，係時候要改變其實之前曾經都有諗過唔再嚟，因為事實上佢嘅質素冇一開始我哋去嗰陣咁好食，本身整開做開嘅又退晒休，做開茶水嘅就走出去整多士，本身落開單嘅就走去沖茶（而家好似係人都識沖奶茶咁）所以質素就好參差囉，明明佢係以奶茶出名㗎嘛 不過又咁講，比起Cafe佢都仲可以閑閑地食到兩餐，而家咩都要自己真係要慳啲💔

【大坑老香港茶記🇭🇰｜後巷懷舊鐵皮茶檔風味】🐨豬扒麵 $30推薦度：⭐️⭐️豬扒份量都好多都有六至七塊，用咗黑椒醃味道好濃，但係就覺得醬汁有啲傑身...佢本身好貼心切開咗細細件方便入口，正正因為咁煮得耐、有啲韌。麵質係普通公仔麵，當然唔係出前一丁啦～蛋味欠奉～反而麵就煮唔夠時間有啲硬身！不過以價錢嚟計，小編覺得已經相當唔錯🤪.🐨奶醬多 $14推薦度：⭐️⭐️⭐️⭐️奶醬多相當有驚喜，上碟時間非常之快～多士烘得外脆內軟，而且好厚身！奶醬嘅比例好多，佈滿晒成個多士嘅表面！一拎起就開始跌晒啲醬出嚟😂主要係煉奶嘅甜味，配以輕輕嘅花生醬香味～比好多茶餐廳都出色...🥜.🐨熱奶茶 $20推薦度：⭐️⭐️⭐⭐️⭐茶香順滑，色澤均勻～飲落去絕對唔會覺得鞋口！整體上茶味偏濃，令到奶茶多咗份少少嘅苦澀味，但係可以接受的～味道上唔加糖，反而更有傳統風味👍🏻——☼——☼——☼——☼——☼——炳記茶檔📍地址：大坑施弼街5號地舖🐨推薦度：😋😋😋😋/5 💰人均價格：$50-100🪸環境：👾🗣️服務：👍🏻👍🏻📸食物打卡度：💡💡💡

點了榨菜餐肉米粉，配奶茶。米粉方面，榨菜沒渣不死鹹，完整具咬口，裡面搭配少量肥豬肉，感覺香口；餐肉有厚度，不是「片皮」款式，邊邊煎得香硬，在湯裡放了一會也不變軟淋，口感能滿足愛煎脆午餐肉的人；米粉也不錯，不過軟不易斷，因為邊食邊和朋友聊天，最怕米粉索湯汁之後霉爛，所以米粉表現超乎預期。奶茶是典型港式奶茶，不算澀，滑但奶香不過濃，不會只求滑而過量加奶食物失去平衡，滿足。價錢可以，可惜可能太早（7am），未有豬扒。

品嘗炳記美食，簡直是這個周末的小確幸啦🍜🎉！一坐下就點了招牌的黑椒豬扒面，嘩，豬扒真係夠哂香口，黑椒味道撲鼻，辣得黎唔會太過，啖啖肉嘅感覺真係好滿足！面條爽滑，吸滿咗醬汁嘅精華，食落去真係過癮！跟住，我再配咗杯熱奶茶，香濃得嚟，味道得宜，齊齊湊一湊，真係正！平時以為茶檔嘅奶茶會好甜，但呢杯就啱啱好，唔膩口，仲有少少甘香，飲完之後心情大好！😋為咗試多啲嘢，我又叫咗份多士，真係滋味！🤤 鬆脆嘅外皮包住嗰份軟綿綿嘅內裡，啖啖都係幸福，花生醬同煉奶嘅甜，唔會過甜到膩，真係撈到寶了！整體嚟講，呢間茶檔給我的感覺就係「親民豪華」，既有平時茶檔嘅親切，又有小店吃唔到嘅質感。下次如果過嚟，我一定要試下其他嘅菜式，搵搵新驚喜！😉

其實同好多人一樣，被E神吸引，慕名而去，當然仲有CNN嗰篇報導，因為我本身係港式奶茶迷。。。OK入正題。我哋兩個人點了的東西逐樣點評：1. 熱奶茶$20: 大哥遞埋嚟倒咗幾啖落枱，冇俾紙巾擦番，要自備紙巾吸番乾淨個杯底。講番杯茶先，冇乜茶香，有明顯澀口感覺。小弟從小學開始飲港式奶茶30年，過百間就一定有，呢杯只能算係中等水準。為飲杯好奶茶嘅，其實去大快活同麥當勞仲好啦。2. 凍奶茶(少甜)$22：絕對冇做到少甜，所以都幾甜下，茶味同熱的差不多，冇咁澀，但都係冇咩茶香的，甜味掩蓋一切，似飲奶糖水。3. 咸牛肉蛋三文治(烘底)$15：面包入口好鬆脆，烘得有點偏乾身，味道冇咩問題，幾好。問題係：蛋同咸牛肉真係少到離晒譜，大概就3-4mm厚，蛋好薄，好少咸牛肉，所以冇咩咸牛肉味。4. 豬扒一丁面$30: 豬扒份量足，味道亦唔錯，帶些少肥肉香，唔會乾柴，味道唔知點形容，有啲黑椒汁味嘅感覺。至於個面，真係一言難盡，同之前某啲師兄評價一樣，係未煮夠時間就上，個面最多煮咗分半至兩分鐘，面條未煮熟晒仲白白哋，另外一碗(5)都係咁。冇一丁嘅味粉香，亦冇蔴油香，不過枱面有一支蔴油俾你自己落到夠，但一丁個味粉

今朝難得放假，約咗個老友特登揸車去食特色嘢，跟住嚟咗大坑十分出名嘅鐵皮檔-炳記。估唔到咁出名嘅茶檔竟然唔使等位，坐低後發覺枱面冇餐牌提供，侍應叫客人自行望牆上嘅餐牌。一望之下，原來唔似一般茶餐廳有唔同餐俾你選擇，飲品亦要另外叫。最後我同朋友都各自叫咗一碗餐蛋麵，一杯熱奶茶。碗麵味道非常普通，餐肉好似冇煎過咁，我食咗兩啖已經唔想食落去，朋友都話自己喺屋企煮可能仲好食過佢，好彩奶茶尚算香濃。雖然早餐非常麻麻，但下次有機會都會嚟試埋佢啲午餐同晚餐。