添記麵皇 (Moved) New Location

又係添食既時候...lol久唔久黎食下魚魚都唔錯~呢日又同男友仔 2 丁人黎食魚魚麵 =)2 個人唔使點等就有位, 真好~男友仔揀左 - 香矛豬扒 拼 鮮桂魚片米線 配 凍檸茶我自己揀左 - 黃沙豬潤米線今日咁啱人唔多, 所以等左大約 5 - 8 分鐘就有得食嚕~香矛豬扒 拼 鮮桂魚片米線: 香矛豬扒好香, 炸得脆脆但無過火, keep 到肉汁, 而且.....係分開上, 讚!! 鮮桂魚片, 超滑, 魚味香濃, 讚!!黃沙豬潤米線: 真正黃沙潤, 又滑又爽口, 豬味濃, 讚!!至於米線, 軟硬適中, 唔過淋亦唔太硬, 讚!!凍檸茶, 茶味香, 濃度啱啱好, 無苦味, 讚!!唯一要彈既, 應該係舖位, 太細嚕~有一點點迫既感覺, 還好有老闆娘既熱誠搭救, 哈哈~

呢間添記好耐之前就試過，本身味道唔錯，但係之後有陣怪味我就冇再食…之後裝修後開左年幾舖面冇左陣怪味就即管再試，朋友話佢個魚片米線好好味，但我食過之後覺得魚片算鮮甜，最正係個魚湯，真係好正…至於佢有冇味精我就唔敢講，但係飲完湯冇好口乾既感覺，會再去食！而豬扒就比差左，唔係皮太厚就係咸過頭，鹵水雞翼尖16蚊得12隻，鹵水味好濃，但係食2-3隻就覺得好夠…

呢日 lunch, 男友仔話帶我去食魚魚....好好奇點解一個平時唔多鍾意食魚既人, 竟然帶我去食魚 = =+到步之後....店仔細細, 坐得比較迫, 不過唔想迫都可以坐路邊 =)坐低就叫個麵麵先...魚片豬扒米線!!米線大大碗, 豬扒係另上既.....先講魚片, 細細片, 滑滑的, 仲有新鮮既魚味, 讚!!再講豬扒, 香香的, 酥酥的, 夠入味又唔太喊, 讚!!最後係米線, 軟硬啱啱好, 適中!!佢既魚魚的確要推介!!!! 真係好好味 =>

回家途中，路過此地，平時都無諗住去吃，今日好似迷迷糊糊就入了去，坐了好耐都未想到食咩，又唔想食炸野，唯有食魚片魚湯米線，清清地，呷一口魚湯先，估唔到咁都撞到好野，一口魚湯已知道此店師傅是位魚湯達人，湯香、清甜、不腥，嗒得出係無用味精，師傅的心血同心力，我感受到。米線爽口彈牙，魚片份量少了些，味道無得頂，我連湯都喝清。店細，三、四個客人已覺迫，各位食完就好走喇......

有點事到附近找朋友聊聊天,見時間尚早,自不然四處找吃的地方.肥媽車仔麵實在太咸,食得多都傷身,少食為妙,還是逛逛踫踫運氣好了.老遠見到招牌,自稱麵皇,難得有自信,三幾十試下,衰左都唔肉赤.三併麵亦不過廿二蚊,聽老闆推荐牛’月展’,就加上生菜及腐皮配上經常要的粗麵,店方主打魚湯,呷一口夠鮮甜,師傅不多,合格,而腐皮浸入魚湯內,吸收了魚湯的味道,又幾匹配,牛’月展’咬落夠腍,不過似乎少了點質感,麵又是淥得太腍,少了一份柔韌的感覺,可能就如店主所講,配米線好得多.

正一係公司飯堂, 基本上日日都有同事o係添記叫外賣番o黎食~ 有時候, 見添記d 外賣員一個lunch time 就來回我地公司兩轉, 真係抱歉我地冇一個統一d o既system 去叫外賣...不嬲都食開米線, 對酸辣米線都算叫有d 研究~ 其實酸辣o既靈魂在於個湯底, 有d 地方o既湯底好濃, 反而唔好食~ 但係添記o既都算叫清, 但係味濃, 平時o係office 食, 一入門口就一定聞到佢o既湯味加上入面落左芽菜同木耳, 食落好爽口, 幾正~不過差就差在佢餸o既選擇唔多, 來來去去都係o個d~ 平時我就叫開雙拼雞翼或者香茅豬扒, 講真味道真係麻麻, 雙拼雞翼好普通, 香茅豬扒就炸到好硬~ 今日仲搞笑, 明明叫香茅豬扒, 但係唔知點解會搭多隻雞翼俾我.....價錢方面, 唔平唔貴la~ 米線+餸就$22, 外賣應該要+$1, 轉酸辣就+$3, 野飲最貴, 要原價咁叫ga!!! 所以冇必要都唔會叫埋野飲其實佢仲有車仔面, 但係我都未試過~ 下次試過再o黎寫食評

7點幾行過, 見無乜人, 就試下啦~唔想去路德圍果d餐廳排隊等...第一次黎, 唔知食乜好, 就叫招牌桂魚片米線啦, 最安全~~魚片比我想象中多, 而且非常爽口彈牙, 好新鮮~~但真係薄左d, 如果厚d會好d. 魚湯好甜, 又唔腥, 飲完唔口渴, 我信無乜用味精ga~~老闆話同幾斤魚(骨)煮的~~米線煮得剛剛好, 唔"林"夠爽口~~good~~ 暫時係我食過最好ga米線~~

同專業人士傾了大半天，之後也要找點易入口的湯水進嚼，雖然標榜無味精魚湯，但以門面格局，已抱著遇到「師傅」的心態而來。足足有廿四小時無熱量下肚，看過餐牌，各式「丸類」一應俱全，似乎被車仔麵做法感染了。快手叫人鯪魚球、桂魚片魚湯米線，雙拼的魚湯米線收卅六，魚湯要另加三元。淡黃色魚湯，色方面比不上魚魚魚生滾原尾鮮魚的專門店級數，伴有不少薄切桂魚片及鯪魚球，魚湯幾夠味的，除了用魚煲外夠味原因是有師傅成分，桂魚片不腥，是意料之外的吃得下，自家製的鯪魚球，打得鬆如魚腐，奇怪，下了大量調味料亦很腥，而最難當的是下了冬菜什麼的調味，放在豬肉丸還好，用在鯪魚上，是格格不入的怪。埋單卅九元無收加一，不是很差起碼叫做有「味道」，但以似收費不如到連鎖魚湯店，吃到的也是差不多的水準，後者下午茶亦不過卅元連飲品。

我係一個唔可以食味精的人, 每次食左有味精食物, 都會有一粒粒, 有時嚴重要睇醫生, 有一次經過添記麵皇, 門口寫住絶對不加味精, 姑且一試, 點知返到公司已經見起紅粒.離晒譜..........有味精又大大隻字寫冇味精. 出面馬路禁多車, 沙塵滾滾. 大騙子請各位都唔好去

琴日同女友來O左呢間店試試,叫O左一碗桂魚米線,一個三餸車仔麪,碗桂魚米線,D魚片OK新鮮,D湯都唔錯,OK.個三餸麫D拉麫煮得剛剛好,好彈牙,個湯底亦唔錯,好甜,應該都OK足料.但D餸分量太少,如墨丸得兩粒,仲要不太好吃,呢點應該要改下.

下午茶時間，本來打算不吃，就去Come Buy買杯珍珠奶茶飲便算。行到去見到條隊，知難而退。飲奶茶不遂，心有不甘，總要找點東西吃，見未幫襯過這新麵店，拜訪一下，隨便睇睇佢既水準如何。入去見到台台都係食米線，心知不妙。瞄一瞄個餐牌，原來真是以食米線為主，我最憎。幸好，除米線外，還有粗麵、幼麵、油麵等，總算放下心頭大石。要一碗豬潤麵，要油麵，服務生話下午茶時間送野飲，凍熱皆可。既然係咁，整杯凍檸茶。上菜速度較慢，即使凍檸茶也要等好一會才到。好在，質素有番咁上下，是真真正正冰凍的檸檬茶，甜度適中。就算日日飲凍檸茶的我，也好耐未飲過咁爽的檸茶，是因為我太口渴嗎？豬潤麵接著上台，份量不少的。先喝一口湯，幾清淡的，不是太味精；油麵配上芽菜和木耳，增加層次感，這點我倒欣賞的；可是主角的豬潤就唔係太出色，沒有起沙的感覺。同時豬潤頗韌，帶根，而且豬潤香味出不了來。若要同名店維記去比，水準差之千里。老豆鍾意食米線，下次帶佢來試試，睇下主打的米線又掂唔掂。

呢兩個星期都食得幾密, 因為信佢係無味精, 前前後後已經試過桂魚, 鯪魚球, 三併(木耳, 紫菜, 腐皮)車仔魚湯底, 韮菜水餃, 韮王水餃等等, 因為湯底加多了薑(可以驅寒), 亦比路德圍魚鱻濃一點, 次次都飲哂, 可惜前兩日飲完後, 有一點點味精反應, 是我心理作用, 還是被騙了?

近日發現居所附近有間標榜無味精既粉麵店, 今日行咗成日, 好攰, 唔想煮, 於是試下無味精既桂魚片湯米粉, $28 + 灼芥蘭, $5, 先講魚片...雖然鋪滿既部分很多, 但太薄啦..., 米粉是幼身的, 不太喜歡, 不過, 湯底真係幾清甜, 下次會選擇其他餸, 但另加魚湯底, $3!希望真係無味精啦!

可能因為魚湯底要加$3蚊，餐牌亦都唔明顯，所以冇人寫，咁我寫喇！因為住附近關係，兩個月去左4次lunch，次次都一個人去，所以冇點太多野，不過係去城市中心荃灣第2分店，地方大過舊鋪少少，又係有大LCD電視。人地寫過o既唔寫喇，試過6寶米線、鮮桂魚片米線(豬骨湯底同魚湯底都試過)、油菜、炸龍蝦丸。米線一般$26蚊碗，豬骨湯底唔錯，比起味千拉麵既豬骨湯，佢比較清，冇咁濃同咸，亦冇乜油；魚湯底就要加$3蚊，但絕對值得一試！完全冇腥味冇味精，一試即上癮，之後食幾次都係要魚湯底，每次都飲晒成碗湯，對於已婚甚少返老家飲阿媽靚湯o既我，算係一種補償。如果你係予會飲晒成碗湯，之前就唔好叫飲品住，試過唔鍾意湯底先再叫飲品。桂魚片好薄好滑，入口即溶，唔會"鞋十十"，份量就一般，如果多返少少就perfect。6寶、油菜一般，冇乜過人之處；炸龍蝦丸太多油，應該上檯前索下佢，味道又係一般。下午茶時段2:30pm後麵餐送冷熱飲品，奶茶咖啡豆漿，我鍾意豆漿唔太甜，恰到好處，冷熱飲品都唔加錢又大杯，抵！唔慣響食肆影食物所以冇相睇。

一個週末，試吃了這家店子。店舖面積不大，但以吃粉面的店子來說並不會令人感到很逼，而餐廳的服務都可以。兩個人要了兩碗米線，事實上都不錯呀。印象中，這店賣點是其湯底不加味精，門口及Menu都有提到，連侍應送來時都會跟你再說他們的湯底不加味精，請食客放心飲用全碗湯。話說回來，侍應送來2大碗米線，兩碗都係要豬骨湯底。想講一講個湯底，沒有加味精的湯都依然不錯，夠味得o黎又唔會好濃好heavy, 況且食太多味精長遠對身體應該是不好的。而兩碗米線，分別係桂花魚片米線同埋"九"王水餃米線。先講桂花魚片米線，用的是新鮮桂花魚片，而唔係炸o個d，d魚片入口爽脆而且滑溜，幾好味。如果可以加多少少魚片份量，或者加多d配料，即係木耳呀、菜呀等等，咁個賣相會更加好睇同抵食。至於個水餃米線，有4, 5隻水餃，我試了其中一隻水餃，幾大的，入口好有"九"王的香味，值得推介。下次應該會再去，如果下次去，會試黃沙豬月閏米線。