深井陳記燒鵝 (Closed)

呢排多左番上環寫仔樓，知道深井陳記燒鵝在附近開咗分店，見未到晚飯飯局時間，於是捉阿J 同我去嘆番隻深井燒鵝脾。堂食座位設在上層閣樓，一室簡潔光猛，阿J 本想叫鵝脾 ($100)，店負責人Chris 建議不如試下"下庄 " ($150)，可食肉之餘亦試埋鵝背。ok，一於咁話。阿J貪玩話不用切，成份上，食得豪邁d。一上枱，份量大到嚇一跳，差唔多成半隻鵝，我見到阿J雞手鴨腳唔知點入手咬佢，唯有叫師傅幫手將鵝背位斬件，但要留番原隻脾俾豪邁的阿J。阿J 終於可以一啖咬落去，但又好快隊俾我，因為佢唔食皮的，叫我先消滅層皮。嘩，不得了，塊鵝皮香到呢，不過略為太油，加上隻鵝的皮下肥膏都幾多，我成口都係油，用來餸飯撈麵就一流喇。終於到阿J 食，鵝肉重鵝味亦有嚼勁，但唔算肉厚。鵝背則油脂甘香，唔錯。我同阿J 都覺得這燒鵝 "雄糾糾" 的男仕應該會較喜歡，因脂肪比例偏重，加上鵝油豐富香口，啱哂餸飯餸酒。服務態度一流的Chris 跟我們說深井燒鵝只有他們可衝出香港，今年他們會在東南亞 3 個國家開多間分店。希望在香港已有70年歷史的陳記可做有水準的過江龍，為港爭光。