Victoria Harbour Supreme

蟹王薯爺收到風，利舞臺22樓最近新開咗間中菜廳「海港薈」主推阿拉斯加長腳蟹，週三雀局終於斷咗其六連敗嘅戰績，週四晚即相約肥肥家族去拆蟹慶祝！佔用面積全層嘅餐店以雲石裝潢嘅門面好有氣勢！接待處旁大大個魚缸啲水好清，展出多款游水海鮮，實在吸睛！用餐大堂樓底唔算矮，間隔開揚，舖上厚厚嘅地毯有助吸音。據悉，店內另有三間廂房，分別最多可容納上八人、十四人及十八人，對應嘅晚市最低消費為五千蚊、八千蚊及萬五蚊，其中唯一設有私人廁所嗰間十四人房就最多人訂。每位席上都擺有齊備嘅自用及公用餐具。網上已有人上載厚本餐牌，其首頁先道出店子「金齏玉饌」嘅理念。最後一頁列明茗茶$18/位及其他雜項收費詳情。開瓶費$100/枝，實屬良心價，不過新張期間暫免開瓶費，酒鬼們有福啦！如相所示，經理Roy哥哥架生齊備，開酒斟酒都絕不馬虎。場內嘅貴客大多選食原隻阿拉斯加長腳蟹，另加孖寶海鮮。人數唔夠多去拆一隻蟹，所以就選擇咗唔洗自己郁手嘅「長腳蟹の盛一人前」套餐，$498/位。服務生不忘告知此套餐於推廣期間買三送一，更表明歡迎五口子叫四客黎分，所以就另加咗兩款散點項目。金磚滑豆腐（$98）：豆腐粒當真如餸名般呈金磚狀，食落外層香脆心嫩滑，微辣惹味，送酒一流！金蠔法國鵪鶉生菜包（$298/四隻）：薯爺大讚半乾濕嘅金蠔飽滿肥厚，濃甜軟嫩，不過如果可以熱啲就更加理想。長腳蟹の盛一人前（$498/位）之長腳蟹肴肉：套餐第一道頭盤勁似「鎮江餚肉」，只係豬肉部份變咗做長腳蟹肉及蟹膏。兩件半晶瑩嘅點心清涼輕巧，連埋頂面細細粒嘅甜醋波波食，酸甜嘅調味於口中滲入蟹肉啫喱度，效果醒神又醒胃。長腳蟹の盛一人前（$498/位）之蟹肉文思豆腐羮：豆腐羮個湯底好清香，蟹肉鮮甜易入口，切成幼絲嘅豆腐亦細嫩順滑，一人一碗羮都唔溜，份量恰到好處。長腳蟹の盛一人前（$498/位）之蔥油煎焗蟹腿：兩件半煎炸嘅蟹腳肉厚身得黎外皮香脆唔油膩，蟹肉極之軟滑，黏上碟上翠綠嘅蔥油及點綴嘅魚子醬即倍添芳香及鮮濃，個人覺得係套餐中最正嘅一味！長腳蟹の盛一人前（$498/位）之京燒蟹肉和牛：一口一件嘅和牛鬆潤多汁，又唔會太肥，撈入蟹肉碎令惹味嘅菜式多咗份鮮甜，海陸組口毫無衝突，簡單味佳。長腳蟹の盛一人前（$498/位）之蟹肉炒長旺配蒸雲腿龍𧄌球：兩件龍𧄌球皮潤肉軟嫩，雲腿竟然超甜冇咸味，長輩欣賞廚師選配桂花粉絲夠清爽。長腳蟹の盛一人前（$498/位）之蟹籽蟹肉炒絲苗：炒得夠乾身嘅黃金炒飯鬆香有彈性，混入新鮮蟹肉尤其鮮香。長腳蟹の盛一人前（$498/位）之流心楊枝甘露布甸：成餐飯最差嗰味係不含蟹肉嘅布甸，唔睇餐牌仲以為自己食緊有芒果味嘅蛋白咁，好膠囉！長腳蟹の盛一人前（$498/位）之燕麥紫心番薯：好彩微甜嘅紫薯粒軟糯暖胃，芳香淡雅，輕盈可口。銅鑼灣新店「海港薈」環境光猛開揚，服務生好客有耐性，新張期間免開瓶費之餘仲有其他優惠，性價比都好高！家人已決定下次黎要叫原隻阿拉斯加長腳蟹自己拆，務求可嚐到靚蟹最鮮甜嘅原汁原味！…Read More

今日一行五人專登去銅鑼灣利舞臺新港薈食帝王蟹，見佢新分店，而且係集團式經營，明碼實價，點知都係失望。一心去食帝王蟹，第一時間梗係揀隻靚蟹先，我哋又想食龍蝦，經理就介紹咗一個套餐，龍蝦+海魚一條，我哋見都係自己喺魚缸揀龍蝦同游水魚，值得一試。我哋揀咗一隻西澳龍蝦，跟住再揀一條靚魚，揀嘅時候專登講明唔要畸形歪嘴同怪身嘅魚，最終自己揀咗一條靚仔白身嘅老鼠斑。第一道菜花雕蒸帝王蟹，完全冇投訴，第二道菜上蟹膏炒伊麵都冇問題。跟住再上龍蝦加條老鼠斑，經理幫我哋開條魚，開完佢都講咗一句條魚骨彎咗嘅，我哋試咗龍蝦先，還可以啦。一食條魚驚喜就嚟啦，一條白身魚開出嚟已經見到有啲啡色，夾上嚟食啲肉質死實、冇味，根本唔似我哋揀嗰條魚，真係奇怪？俾啲咁嘅嘢客人食，真係冇晒信心。我哋本着留港消費，可惜又係失望！我哋反影咗俾經理聽，最終取消咗條魚錢。我哋見到個廚房總廚係度，好想話俾佢知，睇實廚房，唔好俾佢哋亂咁嚟啦😤…Read More

利舞臺頂層的海港薈新開業兩個月，裝修雅致寬敞，環境舒適，侍應服務亦十分貼心，整體用餐體驗相當令人滿意。這次點了招牌的阿拉斯加長腳蟹(三食)， $1200的長腳蟹大得誇張！分三種吃法：15年花雕雞油蒸長腳蟹身、燒汁煎焗蟹腳、法國黑松露蟹膏燴伊麵。蟹身蒸得極為鮮嫩，花雕雞油香氣十足，蟹肉啖啖鮮甜多汁，而且廚房細心預先將蟹腳開邊，省去吃蟹時開殼的麻煩，讓食客可以輕鬆享用。煎焗蟹腳燒汁味道濃郁，火候恰到好處，每隻蟹腳都是肉嫩飽滿。最後的蟹膏燴伊麵香氣迷人，帶出蟹膏的濃郁鮮味，風味十足，完美收尾這道海鮮盛宴。另一道金蠔法國鵪鶉生菜包，以金箔點綴，看得出擺盤的用心及氣派。鮮味十足的金蠔配上嫩滑的鵪鶉肉，包裹在爽脆生菜中，口感層次豐富，令人回味。黃金鵝肝素鵝也是招牌之一，鵝肝的香濃和鵝肉的嫩滑形成完美組合，濃郁不膩，為味蕾帶來極致享受。酥蔥鮑魚質地彈牙，配合蔥香，口感絕配。一道必點的煙燻黑毛豬叉燒更是令人印象深刻，煙燻味十分濃郁，香氣撲鼻，甚至在用餐結束後許久仍能感受到那份獨特香味，叉燒肉質鮮嫩，肥瘦相間，極具層次，堪稱這餐的亮點。此外，我們還點了百香肉浦團，酸甜開胃，極具特色；海港薈燒鵝皇皮脆肉嫩，是地道港式味道；原盅雞燉海螺紐西蘭花膠公、原盅雞燉翅湯水濃而不膩，湯底鮮甜，花膠軟滑，養生又滋補。餐廳服務態度非常好，員工十分細心周到。從坐下點餐到上菜期間，店員不時關心用餐狀況，反應迅速。總括而言，海港薈利舞臺店以其優秀的食材質素、精緻的烹調手法和貼心的服務，營造出高水準的海鮮中餐體驗。…Read More

有足夠服務員服務，態度佳，長腳蟹的質素很好，很新鮮價錢剛好做優惠，很合理，我們四個人食都食唔哂，推薦👍👍👍👍，其他陳皮蒸鮑魚也好好味，最後的蟹膏炒飯有驚喜！要試！…Read More

本人同好多朋友都喜歡吃原隻清蒸活長腳蟹，所以一直期待銅鑼灣會開設海港集團的餐廳，剛剛新開業海港薈，已經急不及待去試試，環境寛躺舒適，各式各款活海鮮應有盡有，加上上菜很有儀式感，請客食飯大方得體。必食原隻清蒸阿拉斯加長腳蟹，上枱時很震撼，拍照時，餐廳會安排打燈，非常專業有Heart ，當品嚐長腳蟹時，端上紅醋我要求改為黑醋及詢問蟹膏問題，即時介紹一個新吃法，啖啖有質感蟹肉配上矜貴魚子醬，令我非常驚喜更覺完美，後來發現原來這裡的主理人大有來頭，是入行經驗豐富20多年的行政總廚謝江生師傅，我實在感到榮幸！小吃方面，椒鹽鮑魚仔很不錯，一口鮑魚椒鹽沒有蓋過鮑魚鮮味，非常欣賞金沙南瓜，當吃到太飽的時唔想再增添肉類，金沙南瓜一定是一個不錯選擇，鹹蛋黃美味甘香，外脆內軟，非常匹配上紅白酒。有高要求的行政總廚坐陣，相信銅鑼灣海港薈一定越做越好，能夠滿足大家口味。…Read More