呢一日買完嘢，順道起附近呢間食店食早餐，望下個餐牌，見到單併麵連飲品都要$45，問咗店員可以將煎蛋轉炒蛋之後，決定用同一價錢，叫附圖上呢個餐：沙嗲牛肉麵配腸仔、炒蛋及多士，熱飲叫咗熱奶茶。碗麵同奶茶好快嚟到，多士、炒蛋同腸仔就耐啲，等齊之後，照完合體照就開餐。奶茶雖然用瓦杯裝住，但好普通，比老麥好些少，但茶味唔夠突出，香味亦欠奉，我就唔太滿意。半塊多士幾厚身，唔知係唔係因為咁嘅關係，所以即使烘過都唔脆，當然亦可能擺得太耐亦唔出奇，因為咬落一啲都唔熱。腸仔唔鹹，但偏硬，而且食過有些少酸味，唔掂，唔會係過期卦？炒蛋亦差，既香唔滑，賣相亦差，毫不吸引，應該係無落牛奶或牛油嘅緣故，呢碟嘢，大家樂或一粥麵做得比佢出色太多。至於碗牛肉麵呢，先嚟一啖湯，嘩！正！好少茶記嘅沙嗲牛肉麵係用沙嗲湯底，雖然花生香味差些少，但絕對收貨，加上牛肉亦醃得夠滑，更重要係無筋，呢樣非常難得，所以理所當然地照鏡，雖然個麵質唔係太好食，麵係煮得夠腍嘅，但唔夠爽，所以有啲人食麵會轉出前一丁唔係無原因。$45呢個餐，真係食都好飽好飽，食物質素如上面評論所講好壞參半，至於抵唔抵食，各人自有自己嘅評價，對我嚟講，係起可接受範圍嘅邊緣位置。順帶一提，呢間食店只收現金，所有電子付款方式一律沒有，所以起香港，無論買嘢或食嘢，一定要帶現金，唔好學嗰件所謂旅遊達人咁，嚟咗香港幾十年，舖頭白紙黑字寫明只收現金，不單只強人所難，仲放上網公審對方，結果適得其反，被圍攻之餘，更成為城中一時熱門話題。…Read More
嗌咗個鮑魚片火腿通粉+煎雙蛋同牛油厚多士,湯通粉口感正正常常,味道適中,湯唔太濃唔太淡,厚多士的確幾厚,如果多啲牛油仲好,熱檸水都有4大片檸檬都幾慷慨😆家人想食飯叫咗粟米肉粒飯（當日午餐menu)有例湯同野飲咁啲阿姐比較進取,未坐夠1分鐘已不停問想食咩🤣啲野食亦上得好快
