悅來老朱小食 (Closed)

这是我经常外賣早餐的地方，选择多多。他们的巨型燒賣好大粒，是用豬肉做馅料，包以黃色的燒賣皮，弹牙有口感。牛肉球也很大粒內裏加入了馬碲，爽口得來林滑。又有炒面、炒米，最好吃的就是炒銀針粉，加上一些菜絲，非常可口，一盒也是十多元。他们的糯米雞也不错，夠足料。…Read More

大家都知道龍門居多好野食 好多人都比老朱小食店的大大粒人手整燒賣吸引而今次就想介紹下其他小食老朱手打牛肉球都好好食 今次去食~~ 就買左6蚊豬腸粉加6蚊魚蛋豬腸粉加甜醬麻醬芝麻醬油等等一齊食真係冇得輸!仲要老闆唔會比得小小醬 全部都多醬 真係好好人💕 仲有大大盒炒米粉 有牛餐肉 蛋 菜等等配料 再加甜醬!! 港式早餐冇得彈Total 都係20幾蚊 去大家樂食個Tea都唔得 如果大家去龍門店 記得多d光顧小店就算屋企唔係新界個頭都可以光顧多d小店!! 經濟又好食 !!大家多多支持小店啊!!! …Read More

十分推廌這家街坊小店的足料炒米粉。早上吃完一份炒米粉絕對飽，甚至lunch 也不用吃，可以直接食 tea。這裏的炒米粉用料豐富，有午餐肉條、椰菜絲、胡蘿蔔絲，口感味道都很好。十分推廌各位一試！…Read More

每次去龍門居都很想試悅來老朱小食的燒賣，但我都吃了別的，今日午餐我決定一定要吃悅來老朱小食燒賣和牛肉，所以我下車立即飛奔去悅來老朱小食。這裡的燒賣和牛肉都是店家自己手打而成，每天賣完就沒有。魚肉燒賣6元2顆，牛肉6元1顆，就這樣說大家可能覺得很貴吧，當你看到真身就會認超值，每顆燒賣，牛肉蠻大球的。電視，報章都推介這裡的手製魚肉燒賣，我一口氣買了六顆來試，買完自覺有點瘋狂。魚肉燒賣吃得出確實是手製，但略嫌過於軟腍，欠缺彈性，魚肉與豬肉味不太顯然，說真的挺失望的。不過手製牛肉球卻有意外驚喜，早知我多買幾顆牛肉球，少吃幾顆燒賣。牛肉球不是平日那種實實的嚼感，而是彈性十足，一咬內裡就是粉嫩的牛肉，味帶牛肉的香甜，還有肉汁，有時候酒樓也做不到這水平。…Read More

牛肉球大粒，味道好，彈牙又鬆軟，4元一粒好抵，反而我覺得加豉油辣油，比喼汁好食。而燒賣雖然係主打，但我覺得比以前差了，唔夠實，比較鬆散。另外炒粉炒麵都只係12元盒星洲米很好食，炒銀針粉，其實買少見少 ，味道都不錯。我中環的同事成日叫我買返去比佢地做早餐，因為真係很抵食。…Read More

呢間小店真係歷史老店！多年屹立不倒，一定有佢既原因！最近佢地仲係隔離街開分店，專做宵夜時段(下午都有，但唔旺)另一分店就賣夜粥為主老朱就做早上到中午左右，賣粉麵腸粉魚蛋等早餐小食是日諗唔到食咩，望見老闆娘坐係門口乘涼我走上前問仲有咩食老闆娘表示只剩一點炒粉麵，仲話不如比盒 雜錦既我我都好奇，姐係咩呢？於是話好呀原來，老闆娘將炒麵，星州炒米，炒米粉都夾落飯盒比我！！！ 個下真係好開心！！因為我真係好怕揀野！！ :( 我以為會收貴小小，點知！！只係$10！！！！同淨買同價！！真係抵到爆 雜錦你問我好唔好食？我會老實講：夠味，唔會食完好口渴，材料好豐富，椰菜，雞蛋，紅蘿蔔，芽菜......等既配料樣樣有！你話同有名既鋪頭比，老朱未必同佢地有得比老朱未必係最好，好平凡，好普通，但係呢D老店絕對有佢獨特既味道與價值…Read More

小弟甚少食寫評，文筆亦唔好，但遇上有誠意的食店，都希望能夠略盡綿力為該食店發揚一下，希望愚見對會大家有幫助。:)一直都係住係屯門長大，但以前唔發覺龍門居有咁多野食，地方雖小但食店都頗多，有機會再品嚐一番。昨日在某論壇見有人提起老朱的粥及燒賣很不錯，收工後二話不說衝去會一會它。其實屯門愈來愈多連鎖食店，真係睇見都厭。所以都希望屯門人自己多啲支持一下本區有誠意的小店食肆:)唔好凈係幫襯晒所有大財團食肆。入正題，今次慕名而來是為了品嚐自家制魚肉燒賣及生滾粥。老朱只是一間很細的鋪，多數見人外賣，或者係門口開台坐低食。魚肉燒賣　－　＄６／３粒，開頭以為同平時食的燒賣差不多大，怕唔夠食所以叫了兩串，點知埋到黎原來比平時食既大粒，佢地既燒賣口感唔會好似平時食既感覺落左好多魚膠去溝稀，呢個價錢我認為係抵食，另外提一提大家記得加埋喼汁，因為會好味啲！（老闆人很好，朋友係隔離買碗糖水過黎食都無問題）生滾粥　－　佢門口有個雪櫃，入面放左好多自選食材，我就點左一豌蠔仔加蝦，因為蝦要貴Ｄ（成本貴掛）　海鮮粥單拼$25 雙拼$40, 而我個碗就$45, 不過真係好足料, 有3隻蝦同十幾粒蠔仔, 我覺得價錢尚可接受, 佢地都有艇仔粥之類, 當然無咁貴。不過粥身有點稀，如果能夠''結''番啲就會比較好，食到尾段變得水汪汪，佢煮得碗粥好夠味，唔會好似用白粥是但滾熟啲材料咁。…Read More

平日放工之後有時未必想直接返屋企, 有時就想先係其他地方行下先返去. 我就好鐘意早兩個站係龍門居落車, 之後行返去散下心做下運動希望可以KEEP下FIT不過我應該KEEP唔到FIT, 因為龍門居落車位有條食街, 好多野食…通常都只有更肥既份…有時候食物吸引人, 除左色, 香, 味之外, 價錢都係一個吸引人既因素, 今次我就係比價錢吸引睇圖估唔估到我今次叫咩食呢? 圖細左D睇唔到呢? 哈哈, 其實我比佢既晚市炒粉麵吸引到.晚市炒麵$11一大盒, 真係可以食到你飽飽! 滿足到我呢隻大肥牛既胃口, 上圖或者睇落似只有單調既淨麵, 其實裡面都有火腿, 菜等等配料, 唔會覺得淨麵咁齋既感覺...不過話講得好似好正好抵食咁, 不過可以好老實講, 味道真係好一般, 唔會熱辣辣, 不過唔凍, 雖然有唔同材料帶來既口感, 不過味道淡味, 一D都唔美味, 但是就係一D都唔難食. 如果以飽肚為目的就沒問題.喂喂喂, D燒賣另外買架! $11大盒麵送燒賣, 邊有咁SO阿?成個$5銀仔咁大阿一粒, 佢係一粒魚肉燒賣, 自家製唔係大家係7-11食哥哥種口感, 雖然外表認真麻麻, 口感都幾唔錯, 又大粒, 所以都OK.香港已經好小地方可以賣到平價食物了, 就算係屯門, 而家D野都好貴, 食一餐無40都落唔到樓, 老麥特價餐都要$21, 呢度既麵雖然味道麻麻, 不過勝在夠抵, 相信吸引左唔小以經濟實惠既人幫襯 (包括本肥牛)…Read More

屯門街坊三人掃街團,決定橫掃區內比得上幾十年前大興車仔檔陣容的龍門居"小食街",集合點就是著名的悅來阿朱,順理成章在此位置擺下咱們的龍門陣首站。本在廚房裡忙著的阿朱老闆得知咱們堂食,即時在店前放置小桌給我們,我們也大膽地一問能否在其他店舖買東西回來吃??得到他的允許後,我們也分別在其他食店買小食回來吃,真好耶!馳名燒賣($6/粒)早前已試過,不過一場來到當然也不會錯過,自製燒賣仍如上次般偏軟身而豬肉味也較上次為輕,不如一般或自己想找到的那種彈牙魚肉感覺,看在老闆自家製的堅持,未試過的也可以一試難得的自製魚肉燒賣。豉油王炒麵($10)源源不絕地從廚房送出,出售次數也是正比,熱騰騰的炒麵很受街坊歡迎,我也提議來一客試試。幼身麵條其實只以豉油撈過上色,基本不算是炒過,平價麵條的麵身似爽還淋,配料反而很重手,甘筍、椰菜還有丁點肉絲,比只以幾絲芽菜的版本已是很足料,加甜辣醬就像早餐所吃的,意想不到橙色辣醬竟是堅辣,令本來只有豉油味的炒麵刺激,那個寒風陣陣的晚上也可驅寒。阿朱除了魚肉燒賣外,生滾粥也是曾在電視飲食節目中出現過,看到店前那展示著各種新鮮粥料的雪櫃也覺滿足,除了一般豬肉、豬臟、魚片外,還有不少如花蟹、瀨尿蝦、花甲的海鮮,以這些食材來煮粥是想像得到的鮮甜。為怕吃蟹太麻煩,選了較容易處理但同是海鮮的花甲粥($25),外賣比堂食還多的生滾粥在店員有條不紊的情形下,稍等一下就有粥吃了。大大碗的花甲粥有著六至七隻的大型花甲,花甲肉爽甜有鮮味,只是我吃那隻剛好有點砂,咔一聲的咬砂感覺是有點扣分!煲得綿滑開花的粥底有點鮮甜,加有薑絲僻腥令粥底更為可口,難怪店員煮粥煮至不停手了。在主場試了其馳名小食後,樂於助人又熟路的食友開始為我們張羅其他食品,下回分解。 …Read More

那天，我跟兩位屯門街坊屯門龍門居到掃街！ 居住屯門區的我，卻是首次踏足龍門居。好幾年前，我曾去過龍門居附近的富健花園，為舊同事做姊妹！ 今次，真是要多謝她們帶路！:)不是她們帶我到這裡也不知道有那麼多小食店！ 龍門居居民真有口福！第一站來到 <悅來老朱小食> ！我們不客氣地叫老闆在門前開張摺枱給我們慢慢食，方便得多！:)聽一位屯門街坊講，這間小店早上也有營業，真是勤力！在這裡，我們買了炒麵、電視節目介紹的生滾粥及招牌燒賣！自家製燒賣 $6/ 3粒雜誌、電視也有介紹過的招牌貨！ 自家製的燒賣並不是單單只有魚蓉及粉漿，除了魚肉之外，還有混入豬肉，真材實料！而且，大大粒絕不欺客！質感軟腍欠彈牙口感！:( 質素只是不外如是！炒麵 $10配料包括：紅蘿蔔、椰菜，炒麵炒得不算油又夠香口！ 伴上甜醬或辣醬更增添風味！花甲生滾粥 $25這裡生滾粥的材料真不少！粥的份量比預期多！ 粥煲得很綿！質感恰到好處！花甲起碼有5、6 隻，大隻鮮甜彈牙！ 令粥底鮮香濃郁！…Read More

入夜後的龍門居，其中一條街的地下商鋪，雖然只有十間八間，但全部都是賣食的，而且款式及種類均多元化，加上價錢平，份量大，很多街坊也會在這裡吃個小食﹑來餐晚飯或買餸加料。(突然想起以前有兩店是賣潮式腸粉及炭爐串燒，不禁回味起來。)外賣之外，亦可以立食，更可以請老闆在門前開張摺枱慢慢坐住食，這份感覺，尤如置身台灣夜市﹗經我觀察多年，每一間食店的"生命"大約一年起﹑兩年止，結束後，便好快有第二間食店接手。而今次介紹的老朱小食，是我記憶中在龍門居這裡是最有歷史的了。如果大家早前有看過J2節目，介紹屯門食店的，其中一間便是老朱了。其實老朱早上也有營業的，早上的出品我食過不少次，賣的是魚旦腸粉燒賣，還有超勁大份的炒粉麵，不過只是我懶寫。直到今次屯門之友小組的聚會，回到大家的地頭，繼而深入龍門居，為的是掃街~吃多幾款野，便的起心肝寫一寫。被雜誌電視介紹得最多便是自製燒賣，6元有3粒，看來好似好貴﹖並不﹗因為每粒的SIZE如同乒乓球。燒賣的賣點在於真是用上魚肉，再混入豬肉，真正的魚肉燒賣呀~並不是周圍碰到粉漿燒賣。不過燒賣蒸得太耐，質感勁淋，入口感覺一劈野，魚肉味不覺出位，只嚐到甜豉油帶來的味道。所以，自問不多欣賞，吃過便當見識過。早上有炒米﹑炒銀針粉(限定版)﹑炒河粉和炒麵，怎料晚上只有炒麵一款，有點失望，還想介紹食友們吃炒米粉呢﹗炒麵味道和粥麵店吃的差不多，除了紅蘿蔔和椰菜，竟然有粗粗的肉絲，量也蠻多呢~至於麵條很夠爽，食起來不覺油膩，豉油味夠濃郁，之不過...為什麼堂食份量比外賣份量少一半的呢﹖(用眼量度下...)所以我推介炒米粉，除了椰菜和紅蘿蔔，還有餐肉和蛋，是否好特別呢﹖雖然我不食餐肉，但看到餐肉以厚粒形態出現，又多到不得了，愛好者一定吃得更歡喜~﹗米粉爽口兼少油，而吃著的蛋絲又散發濃濃蛋香，實在好吃﹗如果大家早上經過阿朱，實在不能錯過哦~(PS:外賣盒會被塞滿米粉，看到也樂透﹗)如非電視節目介紹有生滾粥，我真的不知道﹗今次來我主要想試試生滾粥，店前放了一個凍櫃，放有大路的豬肉﹑雞肉﹑魚片﹑粉腸﹑魷魚等等外，最估不到有花蟹﹑泥鯭﹑瀨尿蝦，甚至是花甲﹗在一間街邊店的也提供海鮮粥，實在令我驚喜呢。價錢方面，由$18-23，最貴的海鮮粥都只是$25，平到不相信啊~~~~經相議後便來一個花甲生滾粥，下單後，期間老闆要處理超多生滾粥的外賣單，但爐頭只有兩個，我們唯有耐心等下。粥的份量是超出我所想。米白色的粥底香綿幼滑，質地不是傑到似糊仔，但也不會稀到像水。白米的味道中帶微微鮮甜，但沒想像中濃，加上少少薑絲和肉絲，吊起些味兒來，而且我最欣賞的是，整碗粥是完全無油份在內的。這個價錢怎估到花甲數量會如此多﹖至少有七粒花甲，花甲肉大大件，彈牙又鮮甜，無他，只因新鮮。不過最後一粒花甲只開了半個口，唯有放棄不要。習慣了早市的先付後食，原來晚市(竟然)是食完後付的。經查問後，老闆和店員很大方又不介意我們買來其他食店的食物，然後坐在他們店前門口進食(當然不是此店的垃圾，臨走前就自動波執走掉哦~)，否則我們的掃街行動要邊食邊站，未免會有點狼狽了。…Read More

尋找美味的魚肉燒賣一向是我的搵食目標,每當知道有自家製魚肉燒賣的話一定找機會去嘗試,這家位處龍門居的老朱一早是我的目標,只是那次時間不合,始終未能一試屯門版自製魚肉燒賣。某晚在輕鐵中玩遊戲玩得太落力,結果過了站也不知,既然如此多坐幾個站到龍門居看看老朱吧。龍門居停車場後的一列小店夜晚超級熱鬧,港式小食琳瑯滿目,說得出的都幾乎可以在此找到,不過個人首選始終是阿朱。小店也主打生滾粥,多款海鮮肉類配料都放在雪櫃裡,感覺較只放在店面衛生很多,要讚!巧合地上星期在電視飲食節目裡也介紹這裡的燒賣,節目中示範包燒賣的"老朱"在廚房裡面打點也不住招呼這生客,好進取的態度,顧客也不怕沒人招呼。不但燒賣是自製,連牛肉球($6/2粒)也同是自家製,買一串給愛吃牛肉波的大人一試,這兩個牛肉波被大人評為下得不太多粉,不是一顆粉團似的牛肉波,以小食版牛肉來說蠻好吃了。魚肉燒賣($6/3粒)比坊間的昂貴,但每粒也是老闆自家包的,人工也值錢了! 燒賣包得比一般的扁平,早就知道魚肉燒賣是有加入豬肉,這裡的也不例外,看似雪白魚肉餡其實也充滿肉香,可是卻不太像心目中那有魚肉香的燒賣味道,魚肉餡不是很有彈性的,吃來軟軟的不加豉油也算可口,在魚肉燒賣來說也算有點水準,只是不是我想要的燒賣味道,願望又一次落空了。店前的豉油王炒麵好像蠻好吃,只是整條小街也是有著不同選擇,要試勻每一家也花好幾天啦! 龍門居和富健花園的居民真幸福!…Read More

龍門居呢頭出名小食宵夜選擇多，除左煎釀寶寶、車仔麵、夾餅雞蛋仔、師奶方便小菜、即炒粉麵飯、粉仔碗仔魚翅、炸雞印尼串燒乜都有。咁多年黎好多唔同既小食店出現過，但唔係間間都做得住腳，主要原因就係好多都缺乏新意冇賣點，又或者客路少。呢間老朱o係呢度都差唔多有十年，算係老店之一。老朱以前淨係賣早餐，主要賣豬腸粉、炒米炒麵，同皮蛋瘦肉粥；呢兩年可能經濟差左，或者毛利少左，依家做埋午市夜市宵夜市，夜晚就主打賣生滾粥，見幾個老細由朝做到晚真係都幾佩服。見佢地通宵咁整幾百粒燒賣肉牛第二朝賣，都真係唔敢再同人講自己返工辛苦。呢間舖頭無裝修可言，舖頭大部份空間都係廚房，食物就o係門口賣。門外望入去，話好衛生就講唔上，但考慮到間舖做左咁多年，都好正常，最梗要就係食左咁多年都未試過有肚痛，所以都冇問題！舖頭冇堂食，只有外賣，o的客多數都係買完趕住搭車返工，所以唔覺有咩問題。不過舖仔雖小，但服務真係無得彈！買腸粉買炒麵，佢實會問駛唔駛加甜醬辣醬芝麻等等，要多要少，個個客人都問足呢幾句。有時間o的熟客o黎買，佢仲會記得佢地o的喜好。要知道你只係買梗 5蚊 7蚊野食，所以佢地呢種服務態道真係無得彈！腸粉最梗要係腸粉夠熱夠軟，醬料好味，佢完全乎合到（但晚市可能去貨慢，有時會蒸耐o左硬身o左少少）；而炒米粉炒麵方便，佢既正常份量係會爆滿一個飯盒，攪到我每次都要同提佢幫我「扣底」，而佐料都好豐富，有好紅蘿蔔絲、椰菜、炒蛋，仲有大大粒既午餐肉！咁都不特止，佢仲要比個飯盒你裝住方便食，都$7 ，抵到宇宙大爆炸！另一特式小食係佢既自家製燒賣同牛肉球，燒賣$5 三粒，用料口感味道都好過平時街買o果o的，牛肉球就大到好似個乒乓球咁大，一串兩粒都係$5，基本上四粒就夠飽。自從上開市區o的茶廳餐o的早餐脹價超過廿蚊心理關口位之後，早餐我就多數幫襯佢。正當出面舖頭都仲大幅加價，佢仲維持梗幾蚊幾蚊既價錢，就有咁好既服務態度，真係無得彈，難得難得！係現今大財團既攏斷底下，呢類小店真係藉得大家多多支持。咁多年o黎o係 Openrice 都冇建樹既我都覺得係時候做番o的野，寫番篇食評去表揚一下呢間老朱先得！…Read More

今朝冇向屋企食早餐，所以又向老朱買個米粉先。:)佢哋啲服務真係幾好，好有禮貌嗰啲嚟ge，同埋佢哋做嘢好快，朝早唔怕遲到。咁多隻麵當中，米粉係感覺最健康，冇咩油，而且炒得幾香。米粉七蚊咋，但就唔會騙你，通常材料有菜, 蛋, 蘿蔔絲, 午餐肉，午餐肉可以令一碟淡淡的米粉加一啲鹹味。:) 同埋佢哋會怕你食唔飽咁，放滿全個飯盒，真係男仔都食到飽死。米粉仲可以加醬ge，不過我通常唔加，加辣椒醬/ 甜醬其實都好好味。我不時會幫襯架，如果試其他嘢，再同大家講下。…Read More

响屯門返工，如果冇食早餐就返嚟的話，我通常都會幫襯老朱。老朱我最常食ge喺︰粥 (10元)，腸粉 (5元)，米粉 (7元)。佢樣樣嘢都幾好味，同埋係足料，唔會粥冇豬肉，米粉得粉咁。 米粉—通常有蘿蔔絲 (我個人麻麻地，覺得太多)，午餐肉粒，椰菜絲，幾好味，入落一個盒度，之後用紙包住係好多好多的，而家用盒就定量啲，女仔可能食唔哂。其他粉都有，河粉、麵咁，不過我都係鍾意清淡啲，食米粉最滿意係佢哋好有禮貌，同埋幾快買完，唔會怕遲到。同埋佢哋一定問你要唔要醬，唔會偷工減料，真係抵我成日幫襯你。相比同屋村的麵包店，個女老闆收錢時你問佢幾錢佢都扮聽唔到，找完錢又放响枱面，咁無禮貌同unpleasant，呢度我一定行遠啲都幫襯買早餐！…Read More