BLZ Restaurant (San Cheung Street)

呢間野真係極品，無心做不如唔好做。D雞斬到手指頭咁大，碎骨多到每一口都係，呢d都唔係問題，因為味道真係好食，值得去繼續幫襯。但一次比一次差，落單已經講左唔洗斬咁碎同走頸頭屎忽，偏偏每次情況依舊。今次仲勁過以前。就係叫半隻雞，可以出到2隻雞腳，完全無雞脾肉，稍為好少少既就係好碎好細粒既雞胸肉，背骨都係好少。反而見到雞頭，一小舊雞頸同埋一個雞屎忽。成餐食個洋蔥 配菜多過食雞，請問D肉去哂邊？出左餐手機無提示，現場又唔會嗌，要人自己走入去問。浪費時間，望到幾條友吹水過日子，唔係食你服務都唔洗咁差既。…Read More

想叫一個酸菜魚飯，姐姐話無得食，因為廚房唔得閒煮！👍🏻暫時兩次食態度都非常差，都完全感受到鋪頭唔憂做…所以以後都唔會再去幫襯，去到買氣受，感覺就唔係太好，佢鋪頭既野食又唔係唔可以去第二度食..無乜巴閉…Read More

至從上次外賣之後，我都係選擇返堂食，雖然今次都係叫佢既泡椒雞煲，但個質感真係好唔同，啲雞滑好多，唔係上次咁鞋咁老。不過真係要推介，佢個泡椒雞煲加冬瓜，蘿白，金茹個啲真係好正，超級吸味👍👍👍👍👍今次整體感覺比上次好好多，所以得出結論係只可以堂食，外賣就真係唔好🤣🤣🤣🤣🤣…Read More

個人好鐘意食辣，而家佢又做緊外賣有八折，所以買左佢既泡辣雞煲同烤魚返屋企食，由於本人試過堂食，所以都幾大期望，不過原來唔係咁嫁😢外賣啲雞老啲，啲肉好鞋，唯有寄望條魚拉，好彩都叫住有堂食既7-8成水準，之後如果再食真係只會揀堂食。…Read More

諗成晚早餐去采華食福麵，忘記逢星期三休息，浪費我精神。放假可以來個拉肚子爆菊火燒後欄特辣麵，放假可盡情食辣盡情排毒拉肚子！食飽飽留家休息。巴辣仔真係深得大媽歡迎，前後左右重重包圍。隔離檯傳來禾黎左生巷咁耐都未痴過嬲麵呀，滛心粉呀，巧抄嗰啲呢！我聽緊乜膠野呀？都係塞返住耳仔聽歌較好。何解要將電子探熱器綁係門口？要麻煩員工同食客行出行入探熱係咪傻架呢！幾千蚊部機嗎？熱檸茶走甜，清香紅茶不濁，帶著微酸熱熱灌入舒服舒服。高質通透靚紅茶，清香陣陣鮮檸味，處理恰當。凍檸樂，冰凍透心涼，醒醒神！馬尾肥妹發現我食到頭頂冒煙額頭滴晒汗，立即開冷氣調埋風向對正我，真細心要加分加分！中辣藕片牛骨髓韮菜百頁米線，轉新師傅嗎？以往我拍手掌大讚色香味俱全，賣相靚仔整齊骨子吸引喎。眼前依碗大兜亂求其烚熟倒出黎，外觀肉酸過車仔麵無誠意！米線煮到腍劈劈，不滑不彈不嚥韌！羊肉二十成熟乾硬鞋羶味濃，無下次！特辣豬紅大腸羊肉片米線，肥嬸嬸我都專登同您講走蔥走芫茜，您要提醒廚房及出菜同事麻。見您服務態度殷勤兼親切，我免強原諒您，平時我真係要換過碗或者連湯連蔥倒晒係檯面架！我都話米線唔要太腍，睇黎師傅話知您軟定硬、蔥唔蔥！擺盤比早前有改善，擺到靚靚先出貨。特辣都未夠辣啊，而且完全無麻的感覺。豬紅水味無醃無浸，羊肉嚥韌微乾鞋帶羶，大腸豉油味濃兼彈牙，米線太腍斷到一截截碎濕濕。中辣大蝦冒菜出前一丁走蔥花芫茜芽菜，突然想食辣，隻碗真係超大，湯太多賣相水汪汪唔好睇。中辣好甜唔夠辣，就係因為落湯太多嗎？雖然我都食到出晒汗。醃蘿蔔乾脆脆咸咸，出前一丁半爽半脆，還未熟透有點黐牙，整體可以的。鮮魚皮彈到似白鱔，肥美濃濃魚鮮味滑滑高質。大蝦細細隻中蝦仔來的爽甜多汁，墨魚仔強勁雪藏味，松葉蟹柳鬆軟吸盡辣汁，包心菜即係椰菜，豆腐皮即係百葉？平傭無感覺，金菇極爽甜帶小小辣。特辣豬雜冒菜讚岐烏冬，專登勁多湯遮住亂七八糟既賣相嗎？見唔到就無需擺盤無需排得靚靚嗎？以為我唔知您既目的咩，師傅實在太天真喇。特辣厚厚紅油，遠遠已聞到極香炒辣椒香料氣味，連飲幾啖香辣無比，先辣後甜，越飲越想飲！豬紅滾熱辣爆水無味微腥，粉腸細細兩粒仔韌韌的，豬膶硬掘掘乾爭爭過熟，鮮肥腸油潤嫩滑豬甜味濃，豬肚彈彈帶甘味。讚岐烏冬只得半個，份量太少邊夠飽架！米香彈滑拖著辣湯大大啖啜勁暢快，忍不住灌入大量美味辣油湯，等待副作用發作火燒菊花。特辣豚肉冒菜薯粉加萵筍粉腸，真心無當年初開檔時的辣度，現在溫和很多。特辣湯汁非常香口，飲得到醬汁香料炒過的鑊氣及香味，辣味沉實內斂而回甜，飲落舒服不野蠻！黑豚肉嚥韌豬味甜，貢丸巨波要分兩啖普通肉丸，鮮肥腸極彈極肥美油脂十分香甜，粉腸滑嘟嘟先甜後澀，包心菜頭大大舊似廚餘不吃了！萵筍大大碌削皮不夠深有渣喎，金菇一大抽自撕慢慢食爽爽爆出甜汁跟辣湯。薯粉滑到跣來跣去，非常嚥韌充滿彈力，吸盡辣湯大啖啜再大啖湯，美味全部清掉！熱力才開始由胃部運行全世，額頭滴汗爽啊！手拍青瓜，鹽醃咸味不夠，青瓜原味最特出，爽脆爆汁！味道撈得非常不平均，芫荽切碎撈勻味道會更出更香。不需要那麼多辣油，緊緊每粒包著就足夠。整體合格，夠清新無澀味。特辣丸子冒菜加蟹柳魚皮餃，師傅作品！師傅似乎完全無擺盤賣相慨念，求其倒出黎食啦！懷念第一代宗師擺到靚靚齊齊整整藝術品一樣，現已不復再，而且全部丸仲係白潺潺無上色架喎。牛丸貢丸芝心丸魚皮餃，雷奧作品！執靚少少再影相。芝士腸火鍋外賺質素平凡，普通無特別。墨魚丸勁腥，腥到我以為係魚蛋。蟹柳金菇，吸辣湯濕濕特別好味。特辣湯汁緊色香味俱全，但米線偏腍偏短，啜到疾住疾住一截截，我用羹食算喇！大辣涼拌肚絲，還以為係牛肚，竟然係豬肚。醃汁有少少澀，即撈味道只留在外不在其中，彈彈的豬肚，單調悶悶的求其清掉。涼拌皮蛋，如果有軟綿黏黏蛋黃就更好咯！賣相一流晶瑩剔透，蛋黃甘香無窮，辣汁醒腦醒神。大辣涼拌豬手，溫度涼浸浸入口舒服，食得到剁椒花椒油，每啖完完全全骨膠原，爽膽豬皮及筋肉。手毛勁粗插到我條脷喇！咬掉繼續食。特辣牛肉冒菜湯手打烏冬，肥牛沒有驚喜，有牛味有嚼勁不過不失。牛柏葉竟然比黑柏葉索辣惹味嚥嚥韌韌，牛丸火鍋邊爐外購平庸質素。大大啖辣湯盛著烏冬夾埋金菇蘿蔔乾，添多點趣味，跟不同食材齊齊嘆，過癮過癮。特辣雜菌冒菜出前一丁加娃娃菜，擺盤用心一點可以嗎？都係要我執靚少少。師傅是否一向唔食出前一丁架？次次煮到出前一丁脆卜卜半生熟既？還是師傅煮慣傳統意大利粉要艾丹提呢？反而米線煮得太腍太散太短囉！萵筍條、鮮冬菇、雞髀菇、秀珍菇、金菇、雲耳、娃娃菜，天然新鮮味道配惹味辣湯。清湯蟹棒豆卜鮮魚皮海帶米線，成堆紙巾隊出黎想點呢？求其輕輕執靚少少影低張藝術照。次次食特辣濃湯可以淹蓋好多缺點，黎個清湯米線，食物係高清下就無所遁形！蟹棒轉左牌子？食得到鞋烚烚略硬一條條的纖維。粗糙酸菜葉不喜歡，豆卜嚥韌索盡濃湯爆汁不油益。鮮魚皮？以往配特辣湯非常惹味可口，依家配清湯腥腥地仲要有魚鱗。海帶諗住起碼切絲，竟然打個結就出，寬過寬條麵，原味健康天然，不過味道忍真不討好。終於遇到第一次無過腍，尚算彈滑，拖著大量濃湯美妙和味！特辣雲吞墨魚仔娃娃菜薯粉，鮮肉雲吞無蝦的，墨魚仔依舊爽脆雪藏味濃。娃娃菜最美味，爽甜嫩食得滋味，特辣湯底無可挑剔！竟然連水魷都界花，師傅您好野！從未遇過，格外索湯索味。薯粉可以腍到一夾即斷！完全不彈滑不嚥韌，都係首次遇上！食落質地似足狗仔粉，腍到筷子夾唔到唯有全部用羹連湯灌入。…Read More

好耐冇食酸菜魚同埋四川菜，行過見到新祥街有間餐廳有得食雞煲、烤魚同酸菜魚，就不坊入去試一下－－－－－－1. 手拍青瓜 $30 6/10青瓜切成粒狀，口感不及條狀咁好，不過食落都爽口同入味，味道偏辣多過偏酸，作為開胃菜幾惹味2. 麻辣豬肚絲 $34 7/10豬肚份量都幾足同埋都幾大舊，豬肚爽脆，帶點麻辣咸香，送飯食唔錯3. 酸菜鯇魚鍋 $168 6.5/10同我想像中酸菜魚有點出入，湯一黎就相對地較油膩，而且辣椒唔太多，我朋友好鍾意食辣，就覺得泡椒湯底唔夠辣味，不過鯇魚食落啖啖肉，骨比較少肉多，但口感有點粗糙﹐唔係太滑，一般…Read More

係疫情期間，其實真係好少出街食野。😷每次都見到食肆冷冷清清。大部分人寧願叫外賣都唔會係店舖食。而我⋯難得嘅假期，選擇出去食個lunch。曾經熱鬧嘅上水，周街都係大陸人。而呢間食肆更係水貨客摯愛。而今日黎到，份外多咗一份寧靜同親切感😊可能因為少人幫趁咗🥰💁🏻‍♀️介紹一下，呢度晏晝係食魚湯麻辣粉夜晚係食冒菜，好似麻辣魚喎，酸菜魚嗰啲嘢而我今日要介紹嘅，就係平民麻辣粉啦🔹豬雜冒菜米線套餐（微辣）$45 🐷🐷呢個餐有豬紅，豬潤，豬腸，粉腸同埋豬肚。全都是豬🐷真係料到多個米線呀，食完個米線仲有好多餸剩低不過就略嫌所有配料都係白灼，完全係靠晒個湯打救個豬潤仲有少少蘇味添，完全食唔到落口啊而個湯底都不得不讚，鮮甜嘅魚湯🐟加上麻辣味，簡直一流呀👍🏻🔸牛肉冒菜薯粉套餐（中辣）$45 🐮🐮配料相對上比較少，有肥牛，牛丸同埋牛柏葉雖然配料少啲，但係就比較出色👍🏻同樣都係魚湯湯底，但中辣搶晒個鮮甜味🌶而薯粉亦都好Q彈，係好粗嘅薯粉嚟㗎晏少少落嚟都冇晒薯粉呀！🔹麻辣豬肚絲 $34雖然話係豬肚絲，但舊舊都勁大嚿而個調味都唔錯，仲有得自選辣度分量都好大份，算係不過不失啦💬以街坊餐廳來講，呢間餐廳都算唔錯都幾特別，可以去試吓啊！…Read More

某日同事帶左我黎巴辣仔食酸辣粉，試過一次之後就愛上呢度個湯底了，之後又黎食過，每次都係lunch time食，一時爆場等位，一時又無乜客，好唔平衡呢，哈哈。餐牌都幾多款式揀㗎，但懶得諗都係揀款套餐算，咩都有啲夠方便。第一次試左牛肉套餐，有肥牛，牛丸同牛栢葉，爽口而且份量也不少，湯底鹹香酸辣，揀BB辣對我而言剛剛好，好啱口味飲哂啲湯咁濟。第二次的豚肉套餐，有豚肉，貢丸同豬大腸，同樣的份量不少，豬大腸清理得乾淨無異味。再黎就試左豬雜套餐，有豬紅，粉腸，豬大腸同豬潤，豬雜餐平啲得黎更多款餸，感覺更抵食，呵呵。豬潤無化學味噃，豬紅嫩滑，好味呀。套餐不包飲品，要另外加錢要，6蚊罐汽水都合理嘅。同事加凍奶茶要8蚊，都ok嘅雖然唔大杯。 50蚊個人左右，好味又抵食，會常來了。…Read More

天氣凍左 相約友人黎食烤魚 魚係先煎過然係先上鍋 所以好香口 今次叫左條深海大斑 無乜骨 啖啖肉！$368 揀左d容易入味既配菜 （准山 菇 薯粉）辣度方面 今次叫左小辣 但愈煮愈辣 下次可以叫番bb辣 💥呢到既飲品 ie 檸茶 可樂 全部都係大大杯 （1L size) 唔怕食完d咸野口乾 但我地一人一杯其實飲唔晒🙈見到隔離台係share 飲唔止烤魚 餐廳都好多人叫雞煲 打邊爐但有樣野唔好 個爐好難控制 一係太滾 一係唔夠滾所以成程 掛住控制火喉😂😂😂😂 唔知係咪我地唔好彩…Read More

今日同亞妹去咗食巴辣仔，個湯底真係好好味！😋 佢要咗讚岐烏冬拼黑豚肉、貢丸同金菇，我要咗薯粉拼雲吞、貢丸同雞脾菇。仲有叫了小食「涼拌皮蛋」👍🏻 碗麵好大碗，味道一流！好抵食！而且店員姐姐嘅customer service 也很好！We will be back! 😻…Read More

星期六同男朋友2人渣車到上水覓食，之前朋友介紹巴辣仔必食酸菜魚，諗緊食咩之際，見到餐牌有雞煲，就揀左了！雞煲等左10分鐘到，雞煲就黎啦。我地要左半份雞，枱上會有個漏斗，啲沙倒哂就食得。呢到啲姐姐會幫你攪勻啲餸就完雞就可以加水，打邊爐。另加左一碟肥牛同鴨血…Read More

好耐之前，新開張無耐，我黎食過，味道係唔錯，夠辣又料足，之後都食過幾次，水準一直都算維持到。但最近一次食完全唔同講法，首先，我上次黎係俾我叫半份，我地2個人想試多點唔同款既食物，但今次竟然唔俾，服務都幾一般，係叫左勁耐先有人應你，好失望。最失望係雞煲以前整既味道係好嫩滑，唔知點解今次食係勁老又乾，雞煲失望之外，佢地既肥牛我真係大跌眼鏡，一望落去已經唔新鮮，好似放左好耐咁，肉既邊邊好「梅」既感覺，食落去當然唔好食，仲要勁貴。…Read More

上星期電話訂座，準時到達都要我兩企係門口食住二手煙吹住寒風等五張檯，無留檯給我的嗎？眼見地下有好多吉位留起，呆等十五分鐘連一張檯都未郁過。突然六個大媽殺到，遲黎先上岸，即時入座﹗神州職員們夾路歡迎，掙在未揮旗仔！交談甚歡，您地都係同鄉嗎？我要爆喇，火都黎！大媽優先？成條街得您一間火鍋咩！即刻轉場過隔離東記食好過，可惡！老遠親臨上水陪我食飯，感動萬分。門口堆滿食客，人山人海，我地兩口子照問問有無位，幸運女神跟食神都有照住我，有檯可以即時上樓喎，感激不盡。雖然要坐係侷促的閣樓，樓底勁矮，生得高少少都頂頭膇﹗全場美女如雲，成檯都係美少女，最衰係我後面，睇得好唔方便！另一邊廂成檯大媽跟叔伯阿姑高談寬論，吵耳非常，好采十幾分鐘後已完事埋單離去，終於可以安靜地嘆我地既晚餐。泡椒雞腳，辣味完全滲透，香辣兼備還有雞甜味道。爽滑雞皮包著脆彈筋肉，食到咯咯聲，損得開心愉快。雷式混醬，打邊爐必備秘汁，金銀蒜青蔥指天椒豉油，配任何食材都係百搭催化劑，將味道推到頂點。巴辣雞半隻中辣，先將所有食材兜得均勻再蓋上焗焗，滾開出味香噴噴，機會黎喇！色香味陰沉平凡，雞肉髀滑胸鞋，醃味淡淡的，陣陣隔夜雞異味。賣相平平，單調靜蠅蠅。大肥雞厚厚雞皮，肥膏處處，醬汁有麻有辣，味道只留在外，雞沒有味道的。聞落香氣不錯，髀滑胸乾，不過不失。白牛柏葉，每次必須 Albert Au 出場，小敏係絕對的粉絲。外觀明亮雪白好靚仔，灼十秒即起保持爽彈震騰騰。已浸發到沒有任何味道，掛上大量巴辣雞汁，蠻喜歡。水魷，身肉麻麻韌韌，觸鬚爽脆夠過癮。脆鯇片，切得薄薄晶瑩剔透，沒怎麼的骨碎食得安全方便。半透明立立令泛著油光，掉到湯中浮沈半分鐘，爽感微弱，魚脂窮脊不肥美甘香。天煞的揀飲擇食，不吃淡水魚的小敏，所有鯇魚歸我處理。特級蟹棒，還以為什麼特級，幻想會係帝皇蟹柳，原來只不過係細細條的日本蟹棒。已經對我非常好了，不是神州紅卜卜膠感蟹柳。我愛烚到完全透徹在散掉邊緣，每絲纖維都要滲著湯汁，滾熱辣濕潤瀡入口。清甜魚肉味夾雜香辣湯汁，鬆軟綿密的口感，幸福滿足。脆鯇骨腩，脆鯇片使我極度失望，深深不忿！立即點多碟脆鯇腩搏多鋪。色澤明亮照人吸引力十足！厚薄適中更能保存魚脂肉汁，肥美甘香，爽脆彈彈，正是我要的！萵筍，即油麥菜的莖部。翠綠亮麗綠寶石一樣，略烚爽嫩甜美像筍，給點時間烚得透徹像瓜般濕潤軟腍，兩者同樣清新美味。美國桶蠔，感覺不到有洗過，似乎直接倒出送到。係屋企我會用粟米醃一醃再溫柔地沖水去潺，捽掉裙邊的黑漬，要雪白如新才會端出飯檯。跟親朋戚友們開開心心享用，渡過打邊爐歡樂時光。裙邊及帶子位均起渣，吃不到就直接吐掉。蠔肚結實，咬開充滿蠔汁，淡淡然的鮮蠔味道，不腥不嗅，免免強強無驚喜，勝在大大隻啖啖肉。手切肥牛，無比嬌嫩滑滑，泛著牛脂乳甜，牛味極淡扣點分數。餐牌印著手打雪花肥牛，如何手打呢？打到隻牛出雪花嗎？非常殘忍，笑死我咩。黑豚肉片，還以為羊片，好采無比錯。第一次食無味黑豚肉，不香不甜淡如水，不彈不嫩鞋烚烚。浪費我寶貴胃部空間，可惡！虎蝦，雖是雪藏貨但還微彈微爽，有蝦甜味不過無鮮味，蝦膏腥腥不夠新鮮。海鮮當然食游水，生生猛猛才有保證。鮮蝦水餃，質素比預期高檔，包得結實不空盪，蝦爽肉甜，肉汁滴滴。大大粒整隻啪入口，塞得脹脹夠滿足。粟米，飽滿超甜粟米粒，粒粒爆汁卜卜脆，滲進微量香辣湯，別具風味。手切安格斯肥牛，永遠最好食都只有本地肥牛。此碟空運雪藏貨不過不失，涮兩涮 5 秒起菜。粉紅色可遇不可求，微弱的牛味，淺淺的滑感。好采有我的雷式混醬，金銀蒜青蔥指天椒醬油，味道躍升不少。醉雞子，沒有本地鮮雞子，退而求其次，雪藏火雞子照殺。賣相有點可怕，浸到變成灰白色，夾落塌晒腍劈劈扁撻撻。完全感受不到半點酒香酒味，跟原味不相伯仲。皮脆肉嫩多水爆汁，難得無腥味無異味，處理得真的不錯。美女的第二次，不太熱愛，淺嚐兩粒還可以，其他都由我一力承擔，所有都收歸肚裡去。黑牛柏葉，未經加工天然純樸，比白柏葉更健康更鮮甜更鬆軟。在滾湯拖行幾秒，清香微爽帶嚥韌，釋出微量甜味，好好食喎。鮮肥腸，唔覺好多油脂及好多肥膏喎，外觀似剪開一段段的豬小腸。掉大半落湯一鑊熟！不用理會讓她們自由自在地暢泳，時間差不多，起動！兜起大量烚好的肥腸，大堆大堆地塞入口，油脂甘香無比，不肥不膩，滑溜溜吸盡湯汁，每啖水潤湯濃，果然食得下喎。手打墨魚滑，已點虎蝦，那就不要手打蝦滑了。馬蹄粉過多，彈彈而硬實，味道有點混濁不鮮。何解會有濃厚肥豬肉味道？油油得似乎咬得到，跟蝦膠做法？鮮淮山豬骨鍋，次次都食魚悶悶的，雞都叫過兩次，玩得偏僻一點，黎個豬骨鍋先。贈送生菜一小籃，意料之外的爽甜，尤其淺綠色的生菜心，超嫩超甜啊！鮮淮山何解會急速溶解？完全溶掉看不見，只隱若見到一絲絲殘渣。剛剛滾起呷兩野頭啖湯，非常清淡，微微豬骨味，輕輕豬肉甜，中規中矩，不是特別濃郁厚厚黏膠質素。跟埋爽甜粟米及清甜萵筍，多謝多謝。整個鍋有八大舊桶骨，非常巨形塞得鍋仔滿滿。啖啖肉加骨膠原，越食越靚仔，但美女覺得好夠喇，不需要再進補，那就等我食晒去啦！黏在骨的嫩肉特別濃味，特別嫩滑鬆軟，淋少少辣椒豉油，食得停不了口。…Read More

上水其實都多小店，可以慢慢試。呢間店，除左酸辣麵之外，仲有雞煲，烤魚食。因為係午餐所以先食酸辣麵。佢麵食套餐分逐樣餸叫同preset 既餐。我叫左個preset既麵，唔止腐皮芽菜金菇所有麵都有既餸之外，個牛麵餐仲有肥牛，牛肚，牛肉，有薯粉米線選擇。個薯粉就比較淋身，但個湯底其實好鮮甜，有酸辣味都仲食到個湯底。啲餸係幾多，味道正正常常。作為午餐，係好滿足。…Read More

依間鋪由開鋪食到依家，老闆娘平時係度睇場服務就好好，老闆娘一唔係度d服務即刻超級差！今日去食嘢，d職員叫極唔睬你！特別叫職員斟杯茶，前後叫左兩個唔同既職員，一個當你透明，一個叫佢4次，佢係幫你斟，不過d態度差到呢！飲食嘢服務真係好重要，要老闆娘係度你先有服務，咁⋯⋯⋯真係幾失望下X⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯…Read More