富盈廚坊雞煲．海鮮專門店 (Moved) New Location

今日爸爸要出旺角整電話，咁就順便去飲茶，真係千祈唔好去。絕對係，貼錢買難受！門口侍應已經無乜禮貌，同佢講3位，佢係無反應既，我再同佢講，佢仲好似嫌我唔耐煩咁叫我坐低等等喇。😒我再問佢，下，唔洗攞飛架？佢話唔洗架，等陣喇。好似講到我好煩我唔識野咁。蝦腸係第一碟到，我食嗰舊無乜特別，屋企人食到有啲蝦霉左。雖然我食嗰舊啲蝦無變，不過啲腸粉好厚，好似食緊河粉咁。然後到紅油炒手，食左一啖，嘩，勁大陣薑味。我淨係食到薑味，同埋食到啲肉勁唔新鮮。流沙包，係最正常既點心。係真係流既，不過個包有陣少少嘅怪味，但都叫做食得，至少無變味。蝦餃都叫做ok，都係至少無變壞無怪味，但唔叫做好好味，啲蝦係無味既。因為食蝦餃想點辣醬，我前後一共問左三個人，都唔拎比我。自問態度無特別差，正正常常咁問「有無辣椒油呀唔該」，第一個唔知答左乜然後無左回事。第二個叫我等等然後行左幾個圈都無左回事。到第三個仲要話返我咁既態度叫我等陣，我燥左話返佢，我叫左兩次都無人攞比我。佢就叫我自己去睇下推車仔嗰啲有無，我問佢咁係咪姐係自己去攞？佢又話唔係，一陣攞比我，不過佢最後係無攞到！呢個馬拉糕不知所謂，未見過發唔起既馬拉糕仲要攞出黎比客食

早已計劃到上水陳六記，一人不來，四人頹廢，改變初衷，旺角火鍋。臨急找店，一桌難求，任食火鍋，胡混過關。樓下拉架，廣告簡陋，舊式酒家，不予期望。到達餐廳，驚覺企理，規模備至，清潔亮堂。BB辣雞煲，起初味淡，加水煲煮，味道越濃。雞滑乏味，肉質彈牙，惟味欠鮮，僅屬一般。丸類凸出，彈牙爽口，素來少吃貢丸，味道奇香，甚覺驚喜。肥牛羊肉，碎絲萬段，無法盛載，羊肉微羶，勝過牛肉。豬下青肉，碎片瘦小，浸湯越縮，難以品嚐。鵝腸鮮美，爽口細片，味道還好。手工麵線，新奇有趣，像阿宗般，驟然想起台北感覺，不彈牙而糊狀。任飲任食，食品選擇欠廣泛，缺響鈴餃類；飲料搭究，可樂啤酒、茶類涼茶、樂怡新地。價錢公道，便宜自助；不另收費，童叟無欺。

連雞煲都係無限添🤣！平時食任食雞煲火鍋，通常雞都係只有一煲冇得任添，但呢間唔係☝🏻任食雞煲(無限添)及火鍋 $138+$8(醬油費) = $146(需加收10%)第一煲上枱既雞煲愈滾就愈濃味！由於SK同成班朋友都比較食得辣，點左中辣😌，一食係正常辣味，但夠哂濃味，不過雞肉質感就一般，有部份會食到冰鮮味，加湯小小咁加，因為唔想咁快溝淡個湯。食左一半就開始加火鍋料打，肥牛,羊肉片,丸類,蔬菜類，正常任食火鍋既料佢都有。飲品方面，有樽裝康師傅,汽水，啤酒都有！以呢個價錢黎講，可以任食2款都算係咁有得任添雞黎講，仲有任食邊爐，係抵既，每人都係$160

今日下午我們同姨媽仲有表姐去咗旺角奶路臣街嘅「富盈廚坊」飲下午茶！我們叫咗韭黃鮮蝦腸粉嘅腸粉都幾軟滑，但蝦肉就唔係好新鮮！薑絲海蝦粥煲得都幾綿，海蝦都幾大隻，肉質好鮮甜彈牙，而且份量都幾多！籠仔臘味三寶飯嘅臘味味道非常芳香，米飯亦好軟熟，而且吸收晒臘味滲透出嚟嘅精華，令到味道更加惹味！川芎百芷燉魚頭湯相當足料，魚頭好鮮甜嫩滑，湯底嘅味道非常鮮甜濃郁，所以我們叫咗每人一盅！富盈蝦餃皇嘅餃皮好晶瑩剔透，質感都幾煙煙韌韌，蝦肉好爽甜彈牙！流野流沙包嘅包質好軟熟，撕開一半啲流沙蓉就流晒出嚟，真係做到好流沙嘅效果！花膠灌湯包嘅湯底味道都幾清甜，灌湯包都幾大個，餡料有唔算好多嘅花膠絲、素翅同蝦肉同鯪魚肉，都幾足料豐富！

食物都還可以，但員工態度不能接受。飲早茶到十一點半 ， 個收銀走過來在我身邊好大聲咁叫我先埋單，我覆佢ok 嗰次係第一次叫我埋單然後佢即刻再好大聲話宜家要即刻埋呀!唔係要計正價呀我同佢講：我會埋，唔好意思呀 你可唔可以細聲少少？我講緊電話個收銀就好似癲左咁樣，繼續好大聲話：我做好人先提下你炸 乜你呢d人咁樣架 我做好人仲要比你鬧下刪100字 我就即刻收左線問佢咩意思 在場其他樓面走過來叫大家唔好嘈 一人少句 其實由頭到尾得我比人鬧唔通收銀埋單結數不是責任嗎？隔左十幾分鐘 佢又行返轉頭鬧我鬧完又周圍好大聲咁同人講話做好人無好報行過又比說話你聽

話人太少無得訂台，只有wak in等位，接近等左一個鐘先入得, 企門口個阿姐真係超級無禮貌！真係好似欠左佢咁！明明我比錢黎食野😶!講明係2小時 10點已經叫你埋單 話要埋數🤔咁早就要埋數？好似仲有人等緊位🤔🤔今時今日咁嘅服務態度真係，唉對此餐廳有點不滿意結論係以後唔駛再去 比錢買難受！

一早知道會多人等位，所以預早Book定8點，本身5位但有位朋友突然病左要轉4位。7點30分有個好冇禮貌既女人打黎confirm booking，好聲好氣話比佢知要轉4位，點知佢就好冇禮貌咁話「4位咁唔該你黎門口攞飛啦！4位冇得book！宜家取消左你booking啦！」。。。cut線！😑算！咁照去門口等位啦 企門口個阿姐真係一絕！超！級！無！禮！貌！真係好似欠左佢咁！明明我比錢黎食野😶好啦 算啦 入左去就算啦 諗住開開心心食。。8:30坐低。。9點就話冇哂雪糕雪條。。。員工既解釋係「因為雪糕係雪糕供應商送過黎，佢送幾多唔係我地話事，所以冇都冇辦法」講緊我地係peak time入都可以冇貨。。仲賴供應商😓9點半有部分款既野飲又冇。。。說好既任飲任食呢？講明係2小時 10點已經叫你埋單 話要埋數🤔咁早就要埋數？好似仲有人等緊位🤔🤔結論係以後唔駛再去 比錢買難受！

從讀書時期開始，我和同學經常到這間富盈廚坊打邊爐和吃雞煲。因為這間餐廳的食物性價比非常高，唔使200蚊便可任食雞煲和打邊爐。另外飲品，雪糕和雪條都係任你食同飲。我建議一開始先食雞煲。雞煲既辣度可以由客人自己選擇，我覺得小辣同中辣已經好夠，太辣會影響雞既味道。食完雞煲，大家就可以轉打邊爐，肥牛記得一定要點，另外多數時候都會有凍豆漿提供，大家記得要試，我本人覺得幾好飲，因為我唔鍾意好甜既豆漿。另外提提大家，任食係有限時，記得把握時間食同飲，唔好掛住講

香港冬天凍都唔凍下，無晒心情打邊爐難得心血來潮想食雞煲，又咁岩係旺角街頭，梗係食番食開既富盈廚坊啦！呢間既特點係除左係火煱任飲任食之外，最重要係連雞煲既雞都可以任加！今次真係雞全部都係雞啦！～部份配料需要加錢～食雞煲最重要係咩，梗係雞啦一開始叫個小辣，等左陣，雞煲就開始滾，先試個雞胸肉，小辣唔算太辣，但佢個特製醬非常狂野惹味，而且好入味，愈食愈想食！唔夠辣，加雞既時候可以叫個中辣都得飲品除左一般汽水之外，仲有鮮豆漿！唔知係唔係豆漿有解辣作用非常搶手，如果食宵夜時段隨時會比人拎晒貼心？（定雪櫃壞左唔整）有唔凍既野飲食完雞已經6分飽，之後加湯底打邊爐，火鍋配料質素麻麻地，無咩特別。打邊爐必食肥牛質素亦比較一般。食呢間最重要都係食佢個雞煲同無限任加雞！如果重點放錯左係打邊爐到會絕對失望！另外要有心理準備服務係絕對差的，雖然有講明係食2個鐘，佢亦都會早15分鐘提你加鐘，但係一夠鐘佢地會唔理你仲食緊，會立即收野同比說話你聽，態度好差埋單 每人約160 抵食

除夕夜完全冇諗住去倒數只係想簡簡單單食一餐飯以前細細個就會出尖沙咀倒數 😩但係完全唔好玩又多人又攰 😖😖😖所以決定食住倒數🎉🎉排隊攞位 過咗九點入席唔限時食 佢好嘅地方系做到凌晨一點 又係任食其實我一向對雞煲麻麻 👉🏻👈🏻因為我覺得個湯底唔夠清好濁 不過今次我叫左中辣雞煲 其實我幾想叫大辣嘅 因為我好驚唔辣 佢呢個雞煲啲雞夠多 😏啲雞大大件唔似出面嗰啲係一粒粒嘅 當然出面嗰啲都有大大件嘅啦 不過佢呢個好香😋有黑椒嗰啲 同埋佢落單係有雞件叫嘅 D雞件系好食 佢係有辣到嘅 👍🏻👍🏻我朋友就覺得好辣 我就覺得可以再加辣落單嘅時候佢哋都會落漏單 其實食到第二轉已經飽 佢啲嘢食都係咁 好推介叫雞件 肥牛就麻麻啦 好硬 唔夠肥 唔夠薄 牛柏葉都唔錯 仲有佢個芝士丸啲芝士唔芝士其他都冇咩特別 每人＄160 其實都唔算特別平 可能係因為今日係除夕掛 不過呢間好適合一大班朋友食飯 雖然佢限時兩個鐘👬👭👫👫👭👬

今天是第一次去旺角富盈雞煲專門店吃中午飯，酒樓是位於二樓，但只得一部升降機，中午時份，要排長龍等𨋢。叫了一個精選午市套餐，包括一款蒸飯、兩款點心及一款甜點，只是80元。鹹魚肉餅鈑👍👍鹹魚又硬又腥，只得死鹹，肉餅太林又冇鮮味。蟹籽燒賣皇👍👍內𥚃的肉與肉餅飯的肉一樣，很滯。鮑汁鳯爪👍👍👍👍這是唯一較好吃的，鮑汁雖然不是鮑魚汁，但調味適中，雞腳也炆得恰到好處。黑榶蜂巢糕👍👍味道稍甜，而且很濕，口感奇怪。

$160 雞煲連火鍋，其實呢個價錢好多地方都做緊，呼籲大家唔好去呢間，免得貼錢買難受。事緣一行三人，話人太少無得訂台，只有wak in等位，接近等左一個鐘先入得。雞煲D雞睇落係唔差，但食落好咸，建議唔好加佢D湯，我地之後叫佢加水，沖淡少少咸味。食到咁上下，有個男侍應行埋黎話叫我地埋單，仲話淨番4個字食，我地當時仲岩岩黎左成牒火鍋配料未食，已經拿拿聲一鋪過倒晒落去淥，諗住唔好晒野食埋先，當時9:30PM見到出面已經無人等位，諗住埋左單，應該可以等到食埋先走掛，點知又係個男侍應行埋黎，仲用一D好似趕客同惡既態度叫我地要即刻起身走，佢話: "仲食，叫你地走呀，夠鐘喇，仲唔走，仲食，走喇" ，之後已經有人黎收野，你要客走都唔使咁惡劣態度呀，蝕唔起就唔好學人做任食火鍋喇，仲有個男侍應做得咁勞氣，你不如唔好做喇，返去練習吓d廣東話，學吓點serve d客先好入行喇!!!今餐真係食到一肚火，咁既服務態度，真係睇你間野做得幾耐。

今日下午我們去咗旺角奶路臣街嘅「富盈廚坊」飲下午茶！我們叫咗點心蒸飯套餐：籠仔北菇滑鷄飯嘅米飯好軟熟，北菇好軟滑厚身，鷄肉嘅肉質好嫩滑，而且份量相當多！四寶滑鷄扎嘅鷄肉仲未蒸熟，仲有啲鮮紅色！鮮蝦菜苗餃嘅餃皮比較厚身，但都幾煙韌彈牙！黑糖蜂巢糕嘅糕質煙煙韌韌，黑糖嘅味道好香甜濃郁，但味道唔會過甜！蒸飯燉湯孖寶：蒜蓉排骨陳村粉嘅陳村粉質感好軟滑煙韌，排骨嘅肉質好爽滑！川芎百芷燉魚雲嘅湯底味道好甘甜濃郁，魚雲好新鮮，肉質好鮮甜嫩滑！另外再單點咗北菇棉花鷄嘅棉花好腍好入味，質感好爽滑！黃金流沙包真係好流沙，輕輕撕開小小嚟影相，啲流沙已經流晒出嚟！

之前多數食雞煲都係食重慶，但雞煲只有辣冇麻的感覺。尼間雞煲免費添加，六個人食兩個煲，一個專食雞煲一個打邊爐。九點半後食較少人，服務態度尚可。都算係不錯的雞煲火鍋之選

今日中午我們去咗旺角奶路臣街嘅「富盈廚坊」飲中午茶！我們叫咗脆皮燒腩仔嘅脆皮唔係好香脆，脂肪比較多，而且肉質亦有啲霉！豉油皇肉絲炒麵炒得好乾身同幾夠鑊氣，但味道就鹹咗啲啲！越式米網鮮蝦腸係用嫩滑嘅腸粉包著酥脆嘅米網同爽甜嘅蝦肉一齊食，令到口感相當豐富！韭黃鮮蝦腸粉嘅蝦肉唔係好新鮮，肉質有啲霉！香滑雷沙包嘅包質都幾軟熟，雷沙嘅味道好香甜！富盈蝦餃皇嘅餃皮好晶瑩煙韌，蝦肉好爽甜彈牙！鮮河蝦菜苗餃嘅餃皮都幾煙韌軟滑，菜苗亦好鮮嫩！潮州蒸粉果嘅好煙煙韌韌，餡料相當惹味！