如果你身邊都有個Omakase 控，佢都會同你分享過Lunch 時段最抵食嘅心得，所以唔少人專登趁Lunch Time 約朋友食好嘢。呢間主打Omakase嘅「花晨月夕Kuno」，Lunch 時段同樣特別抵食，唯一唔同嘅係……Lunch 用嘅魚材都係即日空運到港嘅新鮮貨，絕對唔會沿用前一晚嘅魚材㗎。用平一截價錢食晚市質素，難怪Lunch Time 成日都爆場，想食就約定朋友預早訂位喇。
店內有L型壽司吧，仲有獨立房間可容納4至6人。
Omakase 最特別地方就係邊食邊同師傅交流，從中了解你嘅口味喜好再挑選食材。「花晨月夕Kuno」就好重視呢種交流。如果你有特別喜好例如食物敏感、唔食蝦或唔食貝類等，打嚟訂座時都可以講聲，咁你一定食到最新鮮又啱口味嘅料理。
壽司師傅會因應客人口味，選用各種魚材。
所有料理即叫即做，貫徹高級日本料理要求。
Omakase Lunch Set 共有4款，同場仲有「花晨海鮮丼」、「雜錦天婦羅丼」、「和牛燒」等，我哋今次就揀咗CP值最高同最貴嘅Omakase Lunch Set。
CP值最高Omakase Lunch Set— Omakase Sun
店家每日清晨由駐日本買手直接喺當地買魚，新鮮高質嘅背後就係師傅對食材嘅堅持與較為高昂嘅食材成本。而呢個僅需HKD$388嘅 Lunch Set 有壽司12件、卷物，魚材雖會因應當日新鮮貨有所改變，但充滿驚喜，今次lunch就俾我食到少見的目光魚。而且，lunch set仲一定有日本海膽、拖羅，絕對唔會令你失望，CP值極高。細食個朋友都有9件壽司餐set（HKD$288） 選擇。
Omakase Flower
私心推薦壽司
坊間好多餐廳會選用較划算嘅加拿大或韓國海膽，而呢度就一定用日本海膽，雖然價錢比較貴，但日本海膽零雜質、零防腐劑，無苦澀味又更清新。
呢度堅持用日本海膽，味道更清新，口感厚肉Creamy。
個人最鍾意貝類青木印壽司，略帶爽口並有獨特貝味，呢種清淡鮮貝味好獨特，係其他貝類未食過嘅味道，貝類迷值得一試。
(下方最右) 青木印壽司有獨特貝味。
目光魚喺香港較少見到，係油分重嘅閃令令細魚仔，輕輕炙燒逼出油分，入口好甘香㗎！而且一條只可做一件壽司，可想而知幾矜貴。
香港少見目光魚壽司。
如前文所講一定有拖羅，除咗拖羅壽司外仲有卷物！超爆料拖羅蓉口感軟綿、油脂甘香濃郁，最鍾意專業嘅Omakase 店係即叫係整，入口時紫菜仲脆卜卜。
拖羅蓉卷物。
最高質精緻Omakase Lunch Set— Omakase Dusk
呢個Lunch Set 無論質素同份量都係晚市級別！有前菜、刺身4款、壽司9件、料理、甜品等，全部都用矜貴食材，喺下晝約會、見客都完全上到大場面。
Omakase Dusk
長崎縣生蠔望落唔算好厚肉，但入口相當飽滿、口感Creamy，並有豐富海水味。以前好多人都覺得日本蠔蠔味唔夠，呢幾年日本已開始研發新品種，呢款蠔就係其中之一，仲喺日本蠔選舉評分最高𠻹。
日本清澈海水得天獨厚，特意培養出嚟嘅蠔海水味都偏濃。
紫海膽配三文魚子味道好夾，紫海膽清新甘甜、水分較高、肉質濃厚肥美，比香港常見嘅馬糞海膽更濃味。
三文魚子則係自家用日本豉油、味淋醃製，味道平衡偏甜，好啱為海膽提味。
紫海膽配三文魚子。
來自四葉縣銚子港嘅地金目鯛刺身，係日本高級刺身之一。比一般金目鯛厚肉甘甜得多，油分亦更濃香。
地金目鯛刺身。
壽司方面亦有好多罕見矜貴魚材，例如富山縣小白蝦、安康魚肝、北海道海膽，同埋Lunch 極少見嘅貴價喜之次等。
花晨月夕Kuno
地址: 尖沙咀赫德道2號金麟商業中心2樓
電話: 29555288