2025聖誕除夕夢幻中東菜: 地道炭火烤肉/爆脆酥皮/黃金餃

轉眼嚟到2025年尾，想趁年尾試多啲嘢，不如試吓地球另一邊嘅菜系!? 擁有幾千年文明古蹟嘅黎巴嫩，首都更有東方巴黎之稱。因為地理位置近地中海，所以當地人都習慣健康嘅地中海飲食文化。料理有豐富烤肉，同時又用穀物、蔬果、香草、橄欖油入饌，難怪被稱為中東菜系之王。

呢間由真·黎巴嫩人開嘅「Shahrazad Lebanese」，廚師團隊都係外國人，並堅持由外國引入高質食材!! 所以就算望落簡單嘅沙律、烤肉都好有驚喜，食材原始味存在感強。今年推出咗聖誕套餐「Shahrazad Xmas 2025」同除夕套餐「Shahrazad New Year」，有超豐盛肉料理外，仲有唔少黎巴嫩人好鍾意嘅Mezze(開胃菜) 㗎。

而且餐廳環境好夢幻，有種阿拉丁世界感覺！特別係一整排梳化位，攬住彩色咕𠱸同朋友傾偈飲酒好有Feel。

【聖誕套餐】Shahrazad Xmas 2025

聖誕套餐主菜有酥皮手撕雞肉(Mewarak Dajaj) 或摩洛哥燉羊肉(Lamb Tajine) 揀，兩款主菜嘅肉量爆多，兩個人嚟食試晒兩款主菜幾吸引。因為黎巴嫩人幾著重Mezze(開胃菜)，所以套餐嘅Cold Meeze(凍開胃菜) 都好豐富，有風乾牛肉、中東芝士(Shanklish Cheese)、鷹嘴豆蓉、茄子蓉等，最後食埋有「小月亮」之稱嘅甜品(Katayef)，溫熱酥脆嘅甜品好有異國風味。

凍開胃菜(Cold Mezze)

「Shahrazad Lebanese」嘅靚環境同地道食法，有一瞬間真係好似飛咗去黎巴嫩食飯咁，咁樣過聖誕節幾有新鮮感啊。一開始我哋食啲凍開胃菜(Cold Meeze) 先，聖誕套餐會有風乾牛肉、中東芝士(Shanklish Cheese)、鷹嘴豆蓉、茄子蓉。平時喺香港食到嘅風乾肉主要係豬肉，今次食風乾牛肉會覺得肉味再重啲，鹹鹹香香好啱飲酒。

另外鷹嘴豆蓉、茄子蓉質地好綿滑，而且豆香同茄子味好重，食得出係靚食材!! 如果鍾意食中東薄餅嘅話，好推薦夾埋一齊食。

烤香料大蝦串(Gambari Machwi)

大蝦用咗摩洛哥綜合香料醃製，有層次又唔會太濃味，食落依然好重蝦鮮味。第二啖再蘸埋檸檬蒔蘿Taratour醬食，醬身滑順薄身幾開胃，幾鍾意淡淡香草味。

栗子濃湯(Shorbat Kastana)

冬天係屬於栗子嘅季節!! 特別喺聖誕氣氛下，飲碗暖笠笠嘅栗子濃湯好有儀式感。自家用栗子煮製，最後加埋核桃油。未飲已經聞到好香嘅甜栗味，入口幾重堅果味，最後有種微甘甜餘韻。

主菜2選1｜

酥皮手撕雞(Mewarak Dajaj)

酥皮嘅酥脆同牛油香，真係令人無抵抗力!! 呢道主菜嘅酥皮存在感好強，將酥皮同手撕雞肉一齊食撞出兩種口感幾過癮。有時又會食到松子嘅堅果香，同埋焦糖洋蔥嘅甜辛，層次好豐富。

摩洛哥燉羊肉(Lamb Tajine)

摩洛哥好經典嘅陶瓷鍋料理(Tajine)，獨特嘅錐形蓋設計，慢燉時可以令蒸氣上升後流回底部，鎖住食材原汁原味。呢道摩洛哥燉羊肉就用咗呢款特製陶瓷鍋慢燉，飯粒都吸滿羊肉精華，並有李子乾、杏仁同摩洛哥堅果油風味，好值得大家嚟試吓北非嘅地道料理。

黃金餃(Qatayef)

最後甜品有月亮餅之稱嘅黃金餃(Katayef)，黃金餃炸到外脆內軟，酥脆口感令甜餡唔會太膩，對香港人嚟講幾有新鮮感。

Shahrazad Xmas 2025 $548/人

開胃菜

凍開胃菜(Cold Mezze): 風乾牛肉、中東芝士(Shanklish Cheese)、鷹嘴豆蓉、茄子蓉

烤香料大蝦串(Gambari Machwi)

【熱湯】

栗子濃湯(Shorbat kastana)

主菜2選1

酥皮手撕雞(Mewarak Dajaj)

或

摩洛哥燉羊肉(Lamb Tajine)

【甜品】

黃金餃(Qatayef)

【除夕套餐】Shahrazad New Year

細個食酥皮係一件大事，多數去西餐廳食大餐或者大時大節先有。今次「Shahrazad Lebanese」嘅除夕套餐由開胃菜到主菜都有大大件酥皮，嗰種獨特嘅酥脆牛油香真係好令人回味。

共享開胃菜(Assorted Mezze to Share)

開胃菜有新鮮蔬菜條配松露乳酪醬(Amuse Bouche)外，仲有黎巴嫩經典3款凍開胃菜(Cold Mezze)—鷹嘴豆蓉、烤茄子蓉、紅椒核桃蓉，3款口感都好綿滑，好啱夾薄餅一齊食。當中最常見嘅鷹嘴豆蓉，仲有陣芝麻香，濃而不膩嘅感覺好好。如果你鍾意濃味啲，相信會鍾意紅椒核桃蓉，好食到紅椒嘅輕辣輕甜，又有堅果餘韻幾吸引。