想過一個畀花花圍繞嘅浪漫聖誕，可以試吓呢間黎巴嫩餐廳「RUE DU LIBAN」，藍色門餐廳門口已經好IGable，入面餐廳環境仲掛滿花花真係好夢幻。
山林道藍色打卡餐廳「RUE DU LIBAN」，由黎巴嫩人Imran Khaleel開設。
花花用餐環境好精緻。
而且呢度係由黎巴嫩人Imran Khaleel 開設，佢年輕時遠赴瑞士讀書，之後喺高級酒店開展職業生涯，一直對料理要求好高。而家夥拍40年經驗埃及人主廚Ahmed Menshawy，以開羅喜來登酒店同埋黎巴嫩、杜拜多個歐洲國家掌廚經驗，令「RUE DU LIBAN」料理成日帶嚟驚喜。
埃及人Chef Ahmed Menshawy 擁超過40年黎巴嫩料理經驗，並曾於開羅嘅喜來登酒店掌廚，擅長黎巴嫩古老食譜。
【聖誕套餐$528/人 超豐富7道菜🎄】
今個聖誕，佢哋就設計咗聖誕套餐～ 只係$528/人就可以食到7道菜!! 飲完暖笠笠南瓜湯後，就有軟QQ嘅哈羅米芝士芝麻菜沙律。然後就有黎巴嫩人好鍾意食嘅開胃菜，今次可以食勻冷同熱兩款—經典鷹嘴豆蓉 / 松露軟芝士(Truffle Labneh)、黎巴嫩香腸。
主菜有冬日氣氛十足嘅栗子釀雞外，再有4選1—燉牛肉、烤羊排、澳洲肺魚、肉醬千層批，絕對係聖誕大餐嘅豐富程度啊。
聖誕套餐$528/人。
【SOUP】
南瓜湯(Pumpkin Soup)
用新鮮南瓜慢火熬煮熱湯，口感好似絲絨咁濃滑。天然甜香，略帶黎巴嫩香料風味，加埋忌廉好有層次又暖胃。
【SALAD】
哈羅米芝士芝麻菜沙律(Halloumi Arugula Salad)
煎到金黃色嘅厚切哈羅米芝士，外脆內軟Q好特別!! 獨特鹹香啱啱好，配埋新鮮沙律菜、香甜石榴一齊食好開胃。
【APPETIZER(COLD)】
經典鷹嘴豆蓉 或 松露軟芝士(Classic Hummus or Truffle Labneh)
好有黎巴嫩風味嘅兩款開胃菜，你會點揀呢? 經典鷹嘴豆蓉係健康滿足嘅選擇，大廚將鷹嘴豆打成奶滑質地，加埋檸檬汁、特級橄欖油等，口感輕盈又有豆香，用薄餅蘸嚟食好好味。
另一選擇就係松露軟芝士，呢款軟芝士(Labneh) 黎巴嫩嘅特色芝士，係將乳酪放入布袋瀝乾做出嘅定芝士，口感比希臘乳酪厚實，同時又濃滑帶淡淡酸香。今次加埋松露菌香，做出精緻味道。
【APPETIZER(HOT)】
黎巴嫩香腸(Makanek)
大廚自家剁碎肉碎，再手工加入各種黎巴嫩香料，最後煎到外皮微焦，比平時嘅腸仔惹味好多，真心未食已經聞到好香!!
【MAINS】
栗子釀雞(Stuffed Chestnut Chicken)
冬天食熱辣辣栗子特別有幸福感，大廚特別釀入雞肉再慢火烤至金黃皮脆、封鎖肉汁。一啖入口有栗子甘香同雞汁，完全係聖誕嘅味道啊。
以下4選1👇
燉牛肉(Beef Stew)
用多種蔬菜、香料燉煮牛腩幾小時，令軟化牛肉肉質同時吸滿湯汁精華，用嚟撈飯一流!!
烤羊排(Roasted Lamb Rack)
黎巴嫩香料好啱入饌羊排，多層次香料令羊肉更加惹味!! 好推薦大家每人嗌唔同主菜Share，有羊、有牛又有雞，好有聖誕大餐Vibe。
澳洲肺魚(Barramundi)
身為懶人又想食魚嘅話，少刺嘅澳洲肺魚就啱晒喇。雪白魚肉彈牙清甜，魚皮又燒到金黃脆口。配埋自家慢煮雜菜，酸香微辣好有地中海風味。
肉醬千層批(Moussaka)
將厚切茄子炸至金黃軟糯，再層層疊上香料牛肉醬。入口有種爆醬口感，特別係茄子真係滲出肉香，鍾意綿密口感嘅話必食!!
【DESSERT】
朱古力熔岩蛋糕(Chocolate Lava Cake)
最後就有外層烤到微脆，入面係朱古力流心嘅熔岩蛋糕！一啖蛋糕、一啖雲呢拿雪糕，甜度平衡啱啱好，為聖誕大餐完美落幕。
RUE DU LIBAN
地址: 尖沙咀山林道22-26號地下A號舖
電話: 23102922