香港都食到地球另一端嘅味道，仲要係瑞士最南端嘅瑞士意大利語區提契諾(Ticino) 料理。當地靠近阿爾卑斯山，水質純淨又陽光充沛，造就一系列獨特料理。主廚兼老闆Matthew Ziemski 以簡單初心開設「Nocino」，將自己家鄉料理帶畀香港人，好似小牛舌配意式吞拿魚醬、紅酒燉鹿肩蕎麥玉米糊都係提契諾(Ticino) 特色料理，當然唔少得「Nocino」爆紅手工意粉!! 而家陸續喺大坑、中環、觀塘都有分店，可以隨時嚟食啦。
踏入12月天氣咁凍，瑞士人Matthew 都將佢由細食到大嘅經典暖笠笠瑞士火鍋帶嚟香港，限定推出「瑞士芝士火鍋體驗」🫕！暫時預計去到2026年1月中，想試吓地道芝士火鍋就唔好錯過喇。
🤩「Nocino」以每日新鮮自家手工意粉爆紅，同場仲有多款瑞士Ticino 料理～
小牛腿醃核桃肉醬寬帶麵。手工意粉好有蛋香，寬帶麵更加令咬口Double！上面爆滿嘅帕瑪森芝士泡沫好吸引。
紅酒燉鹿肩蕎麥玉米糊。歐洲常見嘅鹿肉料理，用紅酒慢燉到好軟嫩。
【冬日限定】真·瑞士人整嘅 瑞士芝士火鍋體驗$168
香港都食到由真·瑞士人整嘅瑞士芝士火鍋!! 價錢只係$168，分別有6款芝士火鍋選擇—經典格魯耶爾芝士‧艾門塔爾芝士🧀、辣肉腸‧馬斯卡彭芝士🥩、醃墨西哥辣椒‧羅勒‧杏仁🌶️、黑松露‧白蘭地🥃等等，仲有甜品版黑朱古力及海鹽焦糖🍫𠻹。每份火鍋都會配送橄欖油麵包，畀大家吸滿濃郁芝味真係好啱冬天啊。
正宗瑞士風味🧀「經典格魯耶爾芝士‧艾門塔爾芝士」
瑞士格魯耶爾芝士、瑞士艾門塔爾芝士、白葡萄酒、白胡椒、肉荳蔻
Matthew嚴選兩款瑞士國寶級芝士，包括略帶堅果同微甜果香嘅格魯耶爾芝士(Gruyère)、輕盈奶香又拉絲嘅艾門塔爾芝士(Emmental)，並加入大蒜同少少櫻桃酒打造正宗瑞士風味。食嗰陣用橄欖油麵包瘋狂捲起長長拉絲!! 入口爆出滿滿芝士味好正。
惹味辣肉腸🥩「辣肉腸‧馬斯卡彭芝士」
瑞士格魯耶爾芝士、瑞士艾門塔爾芝士、大蒜、白酒、馬斯卡彭芝士、辣肉腸、櫻桃酒
同樣用上兩款瑞士國寶級芝士—格魯耶爾芝士(Gruyère)、艾門塔爾芝士(Emmental)，再加碼有馬斯卡彭芝士(Mascarpone)、西班牙辣肉腸，每啖都係煙燻肉香+芝士，辣得溫柔幾過癮。
海鮮風味🐙「墨魚汁‧煙燻斯卡莫札芝士」
瑞士格魯耶爾芝士、瑞士艾門塔爾芝士、大蒜、白酒、墨魚汁、煙燻辣椒粉、煙燻斯卡莫札芝士、櫻桃酒
將墨魚汁加入呢兩種經典芝士—格魯耶爾芝士(Gruyère)、艾門塔爾芝士(Emmental) 真係幾有驚喜!! 獨特海鮮味撞落芝士鹹香，再加埋意大利斯卡莫札芝士(Scamorza)、煙燻辣椒粉又係另一種層次。
獨特肉香🐮「牛肉汁‧醃核桃」
瑞士格魯耶爾芝士、瑞士艾門塔爾芝士、大蒜、白酒、牛肉汁、醃核桃
格魯耶爾芝士(Gruyère)、艾門塔爾芝士(Emmental) 做芝士火鍋底，再以牛肉汁、蜜餞核桃調味，天然微酸中和牛肉油膩，係香港好少食到嘅中歐風味。
經典奢華🥃「黑松露‧白蘭地」
瑞士格魯耶爾芝士、瑞士艾門塔爾芝士、白酒、奶油、大蒜、黑松露醬
將充滿菌香嘅黑松露醬，加埋醇厚白蘭地成就呢個奢華味道!! 當然繼續有瑞士格魯耶爾芝士、瑞士艾門塔爾芝士啦。一咬開麵包即刻爆出松露+堅果+芝士嘅獨特鹹香，再後續滲出深邃白蘭地酒味。
香辣風味🌶️「醃墨西哥辣椒‧羅勒‧杏仁」
瑞士格魯耶爾芝士、瑞士艾門塔爾芝士、大蒜、白酒、杏仁醬
一向辣得過癮嘅醃墨西哥辣椒(Jalapeño)，撞上兩款瑞士芝士嘅堅果奶香，飲埋酒真係一流!!
甜品版火鍋🍫「黑朱古力‧海鹽焦糖」
64%黑朱古力、海鹽、甜煉乳
將64%黑朱古力融化出可可獨特微苦甜，再加入海鹽、煉乳煮出鹹甜鹹甜嘅獨特味道，冬天食特別有幸福感!! 啱晒嚟緊聖誕、除夕呢啲特別日子呀。
「Nocino」大坑店有歐洲小酒館感覺。
觀塘分店好開揚，木系大自然元素好溫馨。
中環蘇豪店門口簡約型格。
Nocino (93WYS) (牛頭角)
地址: 香港牛頭角偉業街93號93WYS地舖
電話: +852 91722094