去澳門玩想搵地道老店食經典美食？今次為大家介紹嘅4間餐廳歷史悠久，味道有保證之餘，連當地人都推薦！懷舊嘅茶記早餐、正宗葡國菜、出晒名嘅豬骨粥及傳統手工製嘅糖水，剛剛好涵蓋早午晚餐加埋甜品，絕對推薦大家帶埋親朋戚友嚟返一轉澳門地道美食一日遊！
Photo by _myfoodie
一早過大海仲未食早餐？嚟十月初五街嘅懷舊茶室南屏雅敘同街坊齊齊歎奶茶、蛋撻、招牌厚蛋火腿三文活同沙翁啦！呢間茶記於1968年就開業，據聞係全澳首間有冷氣嘅冰室，門面同裝潢處處散發懷舊氣息。佢哋每日於清晨06:30就開門，如果想食到新鮮出爐嘅沙翁就唔好太晏嚟！
Photo by or#Tm66166507
有約40年歷史嘅林記燒烤雖然店名有「氹仔」二字，但佢哋已於1996年搬到黑沙環區現址，距離出入澳門嘅澳門客運碼頭算近，經由港珠澳大橋過去都十分方便。最正係佢哋營業至深夜，食完宵夜飽飽返酒店或返香港極滿足！
呢度嘅多國風味燒烤同葡國菜備受讚賞，嚟到一定要試嘅菜式為葡式凍蝦、燒羊架、烤乳豬、招牌咖哩（推介配牛腩 / 牛舌 / 蟹）配脆皮豬仔包、三椒桑拿蝦同特飲馬來桔仔冰！
於沙梨頭海邊街由街邊檔開始經營咗80年嘅權記骨粥，係澳門無人不識、甚至係由細食到大嘅宵夜之選。呢度嘅招牌豬骨粥出名又綿又鮮，佢哋多年都堅持花功夫用豬骨長時間熬製，老闆娘話好多人都鍾意加牛雜落粥一齊食。
豬骨粥以外，呢度嘅炒麵同糯米飯亦十分受歡迎，後者特別在本身並冇調味，單靠臘味、魚蛋粒與秘製豉油仍然美味，與粥品係絕佳配搭。值得注意嘅係，呢個檔口不設座位，大家要諗定係咪買外賣返酒店定係去邊食喇（隔離勤記糖水有少量座位）！
Photo by FloraNemo
Photo by sherryyu01
叫澳門人推介Local糖水店，應該大部份人都提及呢間於1965年開幕嘅老字號——杏香園。佢哋經營咁多年都堅持以傳統手工、祖傳秘方與採用真材實料炮製窩心糖水，當中又以蛋白杏仁茶、合桃糊、花生糊與木瓜雪糕最為馳名。另外佢哋亦有唔少特色甜品如懷舊嘅芒果盅雪糕、創新芒果雪耳，不過想食就要有心理準備排隊侯位，因為好多時佢哋一入夜就有人龍出現！