發現尖沙咀有間人寵共融嘅木系西餐廳 “Potluck Eatery”，第一眼畀佢門口半露天空間吸引。入到去發現用餐區好大：有幅大壁畫、小木凳、藤梳化椅，寬敞空間鬧市少見，好啱同朋友嚟Chill吓，仲可以打卡留影。
門口半露天空間，木門同綠色牆身有種復古美感。
大壁畫、小木凳，打卡位絕對鬧市少見，係難得嘅喘息空間。
懸掛月亮燈用餐區，好有氛圍感。
【Bookmark 龍蝦牛扒/乳豬啤酒套餐】
呢度嘅多國菜料理驚喜地出色，選擇仲有好多款。唔想選擇困難，誠意推薦最新嘅《龍蝦牛扒套餐 $398/2位》同《乳豬啤酒套餐 $498/2位》，兩款套餐包咗每日自家Blend製餐湯配蒜蓉法包、主菜、意大利麵/意大利飯、甜品和飲品。佢哋嘅牛扒、乳豬係真心大份，乳豬餐仲名乎其實連埋兩杯啤酒，CP值超高呀!!
全新《龍蝦牛扒套餐 $398/2位》、《乳豬啤酒套餐 $498/2位》，大份兼CP值高。
《龍蝦牛扒套餐 $398/2位》
呢個餐嘅主角係炭燒肉眼扒拼波士頓龍蝦，炭燒牛扒夠香、厚切兼有肉汁，加埋烤焗波士頓龍蝦已經係一餐精緻西餐。仲要有幾款意大利麵/飯揀，好似卡邦尼意大利粉、黑松露雜菌意大利飯、香蒜白酒大蜆意粉(+$88)、松露野菌烤茄子意大利千層麵(+$88)等，套餐包埋甜品簡直無得輸。美食當前想飲少少酒，即享優惠價 $49 追加紅/白酒，私心覺得好啱拍拖嚟食。
《龍蝦牛扒套餐$398/2位》主菜
《乳豬啤酒套餐 $498/2位》
西班牙烤乳豬唔係度度有得食，仲配埋廚師推介芝士蟹肉焗大啡菇，兩樣都係juicy得嚟啖啖肉，無諗過咁match!! 套餐有餐湯配蒜蓉法包，意大利麵/飯亦有不同選擇，但呢個餐最特別係包埋 2 杯生啤，乳豬＋啤酒真係好啱Vibe～ 一班朋友嚟食，再嗌多幾款小食或單點料理，咁一定勁豐富！
《乳豬啤酒套餐 $498/2位》主菜
【長薄餅推薦】
好多人鍾意佢哋嘅長方形薄批Pizza，巴馬火腿薄餅、意大利三色芝士薄餅(藍芝士、水牛芝士、巴馬臣芝士)、菠菜煙三文魚薄餅、香辣海鮮薄餅，目測差唔多每枱都有食😂。同場仲有香煎法式鵝肝多士、芝士明太子蒜蓉包、脆炸魷魚伴墨魚汁沙律醬等等，好多都啱同朋友Share。
巴馬火腿薄餅
長方形薄餅，每件Size啱啱好，唔會太膩，食完仲有Qouta 食其他嘢。批底夠薄脆，Pizza餡存在感好強，鍾意啖啖爆餡口感嘅話就啱晒喇。最多人鍾意嘅巴馬火腿薄餅，個醬甜甜哋，哈密瓜加埋鹹火腿好滋味。
每件薄餅上有煙三文魚花花，一眾三文魚控必食!!
菠菜煙三文魚薄餅
每件足料唔使爭😎，薄餅上擺滿海鮮 — 魷魚、大蝦、青口。
香辣海鮮薄餅
鍾意重芝士味嘅話，呢款薄餅加咗重口味藍芝士，仲有拉絲幾正。
意大利三色芝士(藍芝士、水牛芝士、巴馬臣芝士) 薄餅
【特色鮮橙咖啡、柚子蜜桃咖啡，夏日必試】
近期新品仲有鮮橙咖啡、柚子蜜桃咖啡，入口先有清新果香，之後滲出咖啡微苦，好啱夏天飲。最估唔到仲有幾款靚靚嘅Cocktail同Mocktail，同佢哋主打嘅多國菜好夾。
全新鮮橙咖啡
全新柚子蜜桃咖啡
【Cocktail 推介🍸】
一班人入面有人飲酒、有人飲啡，嚟呢度就完美解決啦😂。
好啱夏天飲嘅清爽雞尾酒，用經典 Limoncello 為基調，再以檸檬、白酒、梳打水帶嚟酸甜平衡味道，好有意式風味。
Limoncello Spritz
唔知飲咩好嘅時候，Mojito一向係好選擇!! Rum酒撞上梳打水嘅輕盈氣泡，每啖都有清新薄荷、檸檬嘅微酸甜感。
Mojito
【Mocktail推介🍹】
呢杯Apple Yuko果香幾重，融合柚子嘅清新微酸、伯爵茶嘅香同蘋果嘅甜，十分協調。
Apple Yuko
結合柚子、香橙同莓果嘅Mocktail，成杯Lady Yuzu顏色有不同層次，女仔一定鍾意。
Lady Yuzu
好有熱帶花香風味嘅Amber Fiesta，融合菠蘿、柚子同檸檬清新，加埋洋甘菊柔和花香，味道同香味都好放鬆。
Amber Fiesta
Potluck Eatery
地址: 尖沙咀柯士甸道136-138號金門商業大廈地舖
電話: 26400388
