旺角夜空過聖誕: 墨西哥x西餐食新鮮龍蝦/和牛即刨黑松露有儀式感

平時約飯局，最熱門選擇一定係最方便嘅中心點—旺角!! 嚟緊聖誕飯局，想喺旺角搵間有氣氛嘅靚餐廳，一定要Mark實呢間天台酒吧餐廳「REFLECT」呀。佢哋最吸引係有個超大天台(大到可以包場開Party嗰種)，仲有好多梳化位坐得舒服，畀大家喺旺角夜景下Chill住飲酒食飯。

「REFLECT」超大天台有好多梳化位，難得喺旺角可以望住夜景食飯飲嘢。

室內環境都好寬敞舒服。

每晚都有駐場調酒師，調製多款打卡雞尾酒，聖誕嚟飲嘢幾有Feel。

「REFLECT」本身主打墨西哥菜，並由10年經驗墨西哥大廚主理，所以料理一向保持高水準。12月聖誕套餐只係$888/2位，足足5道菜!! 由餐湯食到甜品，除開每人500蚊有找，CP值真心高啊。廚師團隊亦將大家熟悉嘅西餐加入墨西哥元素，好似煙火雞凱撒沙律會食到墨西哥煙辣椒嘅微辣煙燻風味；龍蝦意粉又會食到墨西哥辣椒(Jalapeño)嘅香辣。而且辣得恰到好處，就算唔嗜辣嘅朋友都可以Enjoy。

「REFLECT」聖誕套餐$888/2位詳情

今次聖誕套餐有兩項主菜環節，仲要兩項主菜都好有誠意～有曬海鮮、烤雞、牛扒、豬鞍選擇，唔食牛嘅朋友都滿足到。而第一項主菜選擇係龍蝦扁意粉 / 風味烤春雞；第二項主菜選擇就係蘋果芥末豬鞍 / 墨西哥烤牛扒。

駐場調酒師特別設計咗兩款限定雞尾酒—Helleborus Rose(聖誕玫瑰)、 Gingy Creamy(薑餅人忌廉)。Helleborus Rose象徵希望同生命力，以伏特加、粉紅西柚酒、蜂蜜、金巴利等調製而成，清甜微苦猶如冬日中嘅綻放玫瑰，為聖誕夜添加一種溫柔力量。Gingy Creamy就喺寒冷聖誕為你送上一絲溫暖，以威士忌、自家製薑餅糖漿、檸檬、新鮮薑汁打造呢種香甜暖胃感覺。

除咗限定雞尾酒，「REFLECT」亦貼心準備咗Wine Pairing～只要$188/位就可以分別為前菜沙律、兩項主菜配搭總共3杯美酒，以獨特酒香昇華菜式味道㗎🥂。

【SOUP】

松露磨菇湯(Truffle Mushroom Soup)

大廚將聖誕套餐常見嘅蘑菇湯，特別加入矜貴黑鬆露熬煮，更會即席喺你面前刨新鮮黑鬆露，超強菌香揭開聖誕大餐序幕，好有儀式感。

【APPETIZER】

煙火雞凱撒沙律(Smoked Turkey Caesar Salad)

(Wine Pairing: Menstrello Prosecco D.O.C Spumante, N.V.)

主打墨西哥菜嘅「REFLECT」，將平時食到無咩驚喜嘅凱撒沙律，加入當地人好鍾意嘅墨西哥煙辣椒!! 令凱撒沙律有種獨特煙燻、微辣風味，幾有新鮮感。當然繼續有經典嘅脆脆巴馬火腿、蒜香包粒、巴馬臣芝士，好有層次口感。

【MAIN COURSE(2選1)】龍蝦扁意粉(Lobster Linguine) / 風味烤春雞(Mexican Roasted Chicken)

(Wine Pairing: Serengeti Varietals Chardonnay, South Africa)

龍蝦扁意粉(Lobster Linguine)

驟眼望好似普通西餐意粉，其實細節位加咗好多墨西哥菜元素，如果約朋友嚟食聖誕餐，真係會Surprise到對方！

以呢道意粉為例，煙辣椒番茄汁係自家用墨西哥辣椒(Jalapeño)、墨西哥煙辣椒、水欖、銀魚柳、番茄等熬煮再攪爛，第一啖就食到好多種辣味、魚味、番茄同香料嘅融合，辣辣哋又酸酸哋同平時嘅西餐好唔同啊。而且廚師團隊亦引入新鮮波士頓龍蝦，為咗保持原汁原味只係加咗少少鹽、黑椒、牛油燒香，鍾意海鮮鮮味嘅話一定鍾意!!

風味烤春雞(Mexican Roasted Chicken)

另一選擇就係呢道烤春雞，用墨西哥香料醃製後再風乾雞皮。有人落單先會會即時燒香，所以雞皮勁脆、雞肉又Keep到肉汁，餘韻又有墨西哥風味。