喺屯門三聖附近，除咗海鮮仲有其他選擇，例如日本菜、泰國菜等，而呢間居酒屋格調嘅日式餐廳就係其中一間喇。店內以淺色木做設計主軸，燈光明亮，又有吧檯座位讓食客近距離觀賞師傅炮製菜式，另外室外用餐區更可以帶同寵物入座，滿足各類型客人需要。菜式主打多款時令刺身、壽司、燒物等，其中集12件手握壽司嘅九宮格拼盤、芝士海膽沾麵，更加係必點之選。
三色拖羅
正式開餐前，不妨以三色拖羅當前菜。食材選用日本藍鰭，一份有齊大拖羅、中拖羅同赤身，每款2件，厚切食落啖啖肉㗎。
本手返‧手握壽司（時令）
雖然呢個手握壽司拼盤用九宮格木盤呈上，但其實合共有12件時令壽司，賣相精緻又豐富。款式以刺身壽司為主，但會隨食材同季節而轉換。而壽司飯則選用北海道七星米，加入經過自家調配嘅赤醋，令飯粒顏色冇咁深沉，但仍然夠味。
打卡必點款式
海膽、三文魚籽同牡丹蝦為常見款式
芝士海膽沾麵
沾麵係其中一款受歡迎嘅日式麵食，餐廳以日本時令海膽、芝士同忌廉湯製作湯底，鹹味同鮮味互相平衡；而沾麵似粗身嘅烏冬，非常掛汁，加埋日本溏心蛋、粟米、木耳等配菜，有多種口感之餘亦更香甜。如果想試多啲海膽入饌嘅菜餚，呢度重有好多選擇㗎。
沾麵湯底會再放上原件海膽提鮮
時令北海道海膽
想食到海膽原味？可以點時令北海道海膽，師傅大約喺1板海膽中取出2行分量，配埋紫菜畀大家包起嚟食，入口creamy又鮮甜。
海膽來自北海道
日本特盛岩蠔（$138）
如果你亦鍾意食蠔，呢味日本特盛岩蠔就啱晒你喇。岩蠔係日本時令款式，例如赤崎，體形比較大，配埋海膽、三文魚籽同魚子醬顏色豐富，而且鮮味十足。如果落埋另上嘅柚子味酸汁，會更加提鮮𠻹。
岩蠔偏大隻，入口嫩滑juicy
三色手卷
而三色手卷喺赤醋飯上放上海膽、三文魚籽同吞拿魚蓉3款人氣食材，食一個唔會過飽，又可以止下口癮。
所有壽司同手卷嘅飯底都係赤醋飯
日式木系裝潢，簡潔舒適
生日優惠：由2022年7月21日起，直至餐廳另行通知，當月壽星以電話訂座星期一至四晚市時段，凡2人起並於落單前出示身份證核實，即送指定清酒一壺（欲了解詳情可聯絡餐廳）。
鮨亭
地址: 屯門青善街22號康景花園地下3-4號舖
電話: 24300111