去到旺角，想搵個靚景闊落地方坐低飲酒傾偈，呢間天台酒吧餐廳“REFLECT” 就啱喇。12樓天台有好多梳化位，空間大到包場開Party都得!! 望住旺角夜景飲嘢幾好Feel。
“REFLECT” 天台有好多梳化位，望住旺角夜景食飯飲嘢。
同場有室內座位選擇，坐得舒服。
每晚有駐場調酒師，調製多款打卡雞尾酒。
呢度唔止有酒飲，仲係一間墨西哥餐廳嚟㗎。由10年經驗墨西哥大廚主理，除咗有經典脆皮玉米餅(Tacos)、餡餅(Enchilada)、墨西哥烤肉(Fajitas) 等等，亦會定期推新料理，就算成日嚟食都唔會悶～ 最近就有全新澳洲安格斯牛柳，同埋好多熟客敲碗已久嘅墨魚肉醬闊條麵強勢復刻。
【🆕全新料理】
澳洲安格斯牛柳
用經典法國菜做法嘅澳洲安格斯牛柳，一日只有3-4份，如果好想食要預早一日預訂啊!! 集合咗匈牙利鵝肝、澳洲牛柳、炒雜菜，油香同肉味撞埋一齊好吸引。食之前，仲會喺你面前即席刨新鮮松露㗎。
即席刨上新鮮松露，未食已經聞到好香。
【🔥強勢復刻】
Q彈Q彈！墨魚肉醬闊條麵
“REFLECT” 啱啱開舖時，曾經推出過呢道墨魚肉醬闊條麵。雖然停售咗大約一年，但間中都有熟客問幾時出返～ 終於!! 等到佢強勢回歸喇。
佢嘅肉醬唔係用牛肉/豬肉，而係將Q彈墨魚肉攪碎炒熟，再加墨魚汁慢煮，最後淋上酸酸哋嘅紅花汁。食落無肉類咁膩，反而彈牙鮮味，呢種「肉醬」真係幾有驚喜。
平時好少見嘅Q彈墨魚肉醬闊條麵。
召喚蘋果甜品Fans！反轉蘋果撻(Apple Tarte Tatin)
同樣因應大家敲碗，最終強勢回歸嘅反轉蘋果撻。私心覺得個餡真係超多蘋果肉同肉桂，食落仲好有牛油酥皮香，幸福感爆發。
反轉蘋果撻有超多蘋果肉同肉桂。
【必食！經典墨西哥餡餅】
脆皮玉米餅(Tacos)
墨西哥菜必食嘅Tacos，每份大約手掌咁大，有蘑菇、雞肉、牛肉口味揀，脆脆粟米餅包住就嚟滿瀉嘅餡，邊食邊飲酒都幾正。
Tacos 多到爆餡，飲酒幾正。
仲有幾款墨西哥餡餅～
辣雞肉餡餅Chicken Enchilada。
雞肉墨西哥烤肉Chicken Fajitas。
【🍸打卡雞尾酒】
夢幻泡泡煙！Fruity Garden
呢度嘅招牌雞尾酒Fruity Garden，上枱嗰陣會有透明泡泡～ 戳開彌漫仙氣。有幾款口味揀—士多啤梨/黑莓/芒果/仙人掌果，基底就用伏特加、橙、菠蘿、桃嚟調配。飲落幾香甜，就算平時唔太飲酒都可以試吓。
招牌雞尾酒Fruity Garden，上枱會有透明泡泡。
一戳開彌漫仙氣，影Story幾靚。
辣椒雞尾酒🤯 Fuego Agrio
想飲杯墨西哥風味，調酒師就將墨西哥辣椒(Jalapeno) 整成自家製墨西哥辣椒糖漿，加埋龍舌蘭酒(Tequila)、青檸、蛋白調製。飲落辣辣哋又重酒味，餘韻會有少少甜味中和辣度，好有驚喜。
雞尾酒加咗自家製墨西哥辣椒(Jalapeno) 糖漿，輕辣有驚喜。
Rubí
Mocktail 推薦呢杯Rubí，用石榴、青檸汁、桃汁同雪碧調製，香甜清爽，幾啱夏天飲。
好啱夏天飲嘅Mocktail。
REFLECT Restaurant & Bar
地址: 旺角西洋菜南街74-84號旺角城市中心12樓
電話: 94029697