成日過開澳門玩嘅朋友可能已經對旅遊區美食瞭如指掌，但其實澳門同香港一樣，有唔少街坊、學生哥成日幫襯嘅平靚正美食，卧虎藏龍於熟食中心內，打算去發掘吓嘅話一定要睇以下內容喇！一次過涵蓋哂營地街市、祐漢熟食中心、下環街市，齊齊跟Local搵食！
Photo by 女子的休假計劃
有60年歷史嘅勝記咖啡位於全澳歷史最悠久嘅熟食中心——營地街市市政綜合大樓三樓，呢度以前係街邊檔，搬入熟食中心後繼續以瓦煲煮咖啡或奶茶為主打，佢哋會於就滾時加入蛋殼同煮，飲落特別濃滑又重茶香。
Photo by melodyyyhuiii
由於用藥煲慢煮需要花好多心機同時間，所以澳門而家都唔多地方有得飲！另外佢哋嘅豬扒包亦有唔少捧場客，加上每日限量供應，太晏過嚟嘅話就未必有得食！
Photo by JanlyJudy
喺營地街市熟食中心飲完咖啡唔夠滿足？呢度仲有食家蔡瀾、梁文韜和蘇施黃都有介紹過、經營超過55年、三代相傳嘅梓記牛雜！佢哋採用市場直送嘅新鮮食材，經仔細沖洗後會按不同部位先後滷煮，冇騷味同時仲好入味！牛肚、牛腸、牛筋、牛膀、牛肺等常見部位有得食之餘仲有牛脆骨同牛舌、牛粉腸，淨食牛雜時記得加黃芥末，如果係食麵就記得加自家秘制辣椒油喇！
Photo by Ta_718
Photo by olafoodieee
祐漢熟食中心由澳門政府民政總署管轄，闊落光猛同時又多座位、多攤位，第一次去建議直奔好多人食過都大讚平靚正、就算係非繁忙時間都經常出現人龍嘅其記！大家都鍾意佢哋嘅麵食同炸兩（炸腸），自選雙餸麵選擇多又大碗，比較多人揀嘅有牛雜、豬手同雲吞配招牌靚湯瀨粉。
Photo by RRfood
吳廷記創立於上世紀五十年代（始於1949年），由街邊小販車做起，傳承至今三代，現時位於已有60多年歷史嘅下環街市市政綜合大樓內。招牌大大隻字標明賣獨家冷糕同自家研發嘅紅豆餅，不過前者只限秋冬發售，想食到都要睇吓運氣如何！而紅豆餅佢哋就每日現場即包即煎，食落去外脆內軟，甜度係香港人最愛嘅唔太甜，獨食一個都完全唔會膩！