年輕人對「土地問題」呢4個字感受猶深,莫講話買樓,想有個地方Hea吓、傾吓計都難。所以幾位90後索性自己整個「基地」,掛滿霓虹燈加一整排開揚大窗,仲好歡迎大家都當自己基地嚟Hea。
「基地」店外已見到滿滿霓虹燈!
90後老闆坦言:「如果個地方自己都唔鍾意,人哋點會鍾意?所以想呢度設計得年輕好玩,嚟到係成班朋友玩得開心,又有好嘢食」。所以無論環境、食物同酒都好講究,「呢度嘅霓虹燈每幾個月就換一次,全部都係自家設計,以本土同Graffiti 為主要概念。每到夜晚10:30後霓虹燈以外嘅燈都會熄,好靚好有氣氛。」
霓虹燈充滿本土元素。
兒時回憶「食鬼」都有。
10幾年法菜經驗大廚主理 食法國菜唔使拘謹
一般酒吧都好易忽略食物質素,但呢度就請嚟10幾年法國菜經驗大廚主理,有生蠔、白蘭地火燒牛扒、法式雞飯等等…食物質素真心有驚喜,同場仲有多款自家設計Cocktail,特別係功夫茶同鴛鴦Cocktail 玩味十足,打卡一流呀。
白蘭地火燒!澳洲M7和牛短骨戰斧扒【需預訂】
本身完全無預料,喺酒吧食到咁有大份牛扒!仲要係澳洲M7和牛短骨戰斧扒,重約1kg-2kg,4個人Share 都好夠。其實呢塊肉眼扒,就係平時食到嘅戰斧扒同一個肉位,難怪咁厚肉又咁濃肉味。
上枱前拎定電話打卡就啱,因為有專人即席淋上白蘭地點火,火焰都好高好有霸氣㗎。而大廚就話其實點火唔只為打卡,其實牛扒本身灑上黑胡椒粒,一瞬火焰已可逼出黑椒香,食落更正㗎!
唯美蘋果木煙霧 煙燻海膽魚籽蛋
另一打卡必食就有呢道「煙燻海膽魚籽蛋」,一打開即飄出滿滿蘋果木煙,捉啱Timing 影女神相一流。當然啦,專誠整嘅蘋果木煙唔只用嚟影相,仲會令每隻蛋都有種獨特木香。
咁究竟呢隻蛋係咩來頭?其實大廚將蛋切開後,刮起蛋黃加醬汁拌勻得更綿滑,再釀入蛋白後,放上海膽、魚子醬,完美地將多種口感、味道加埋一齊。
有錢唔賺堅持法國直送!Gillardeau No.1生蠔
美酒當然配埋生蠔,呢度特別由法國引入,被比喻為「生蠔中的勞斯萊斯」嘅法國生蠔Gillardeau。No.1 Size 生蠔厚肉大隻是常識吧,食落鮮甜得嚟仲有淡淡榛果香。
因為法國蠔每星期只有2日飛機空運到港,所以當日賣晒可能就要等幾日先食到喇。老闆就話寧願賺少啲,都唔想賣啲低質素嘅嘢畀食客。
創意Q彈 香煎鵝肝多士.柚子啫喱
因為有法國大廚坐鎮關係吧?少見酒吧都食到高質鵝肝,鵝肝係傳統外脆內嫩味道,驚喜之處係側邊嘅柚子啫喱,用嚟代替平時用作解膩嘅水果。啫喱Q彈微酸,成個感覺過癮啲,無咗食法國菜要好拘謹嘅感覺。
【預訂先有得食】繁複法菜 黑松露羊肚菌鵝肝雞飯
大廚將傳統法國雞飯加入新玩味,以雞油代替牛油,並加入香煎鵝肝粒,飯粒食落夠晒香仲有少少肝鵝咬口,個人好鍾意呢個飯底。
並且依據法國煮法,將原隻雞先焗15分鐘,再額外將難熟嘅雞胸、雞脾焗25分鐘,令原隻雞熟度一樣再慢煮3小時。雖然做法繁複,但就做到每個肉位都係咁嫩。出餐時會再加埋法國黃酒煎香,上枱時已聞到酒香喇!將羊肚菌撈勻雞油飯食一絕。
龍蝦膏做「天然味精」?必食龍蝦扁意粉
平時去酒吧真係好少食意粉,因為多數都…煮得幾乾(咳咳)。所以呢道意粉比預期中好食得太多太多,除咗上面咁大隻龍蝦已夠晒搶眼,仲特別將龍蝦頭煮成醬汁,令意粉食落軟滑濕潤。
另一值得一讚,係大廚加咗「天然味精」。第一下聽到心諗咩味精可以天然?原來係將龍蝦膏高溫焗乾後再撈入意粉,好似味精咁鹹香~但就完全係原始龍蝦香嚟㗎!
慢煮16小時 慢煮西班牙豬肩
豬肩肉味好濃,但稍一不慎就會煮得韌喇。所以大廚特別將西班牙豬肩以58°C慢煮16小時,令豬肩肉纖維變鬆,食落肉味香濃又彈牙。
法式經典醬汁 香煎魔鬼魚 配法式牛油檸檬汁
呢度嘅海鮮選擇幾多,估唔到較冷門嘅魔鬼魚都食到,仲配埋傳統法式牛油檸檬汁。個人覺得呢個汁先係重點,因為稍一不慎就會煮得油汁分離,係幾有難度嘅法國醬。
大廚要利用檸檬酸味中和牛油嘅膩,並且掌握技巧先可煮得軟滑濃郁、微酸開胃,用嚟配味道清雅嘅魔鬼魚最啱。
佐酒一流 焗西班牙八爪魚 配焦糖蒜泥
海鮮方面仲有呢道慢煮八爪魚,八爪魚份量搶眼。淋上低溫煮溶嘅焦糖中和蒜泥辛味,甜中帶微辛好啱作為佐酒菜。
Why not both? 窩夫配多款法國甜點
最後一定要試埋甜品,呢餐法國料理完全吊起法國甜品癮,所以呢道窩夫配齊幾款法國甜點就最啱。
必飲打卡Cocktail!
呢度嘅Cocktail 加入好多創意同本地元素,最IGable 一定係功夫茶概念嘅「Another Kung Fu Cha」,以Whisky為基調加入伯爵茶、蘋果汁、檸檬汁等,剛烈酒味又帶茶香。
另外仲有以茶餐廳嘅鴛鴦為靈感嘅「Yuen Yeung In Da Base」,同樣以Whisky 為基調,加入自家調製鴛鴦、椰子糖漿等,飲落先有Whisky 後續又滲出熟悉嘅鴛鴦,玩味十足。
同場仲有多款口味Cocktail揀,如清新草青味為主調嘅「Poison Ivy」、泰式「Thailand Banzai」同以經典Cocktail 為主調再加入玫瑰嘅「Rose’s Collins」等。
(左起) Poison Ivy、Thailand Banzai、Rose’s Collin。
基地
地址: 尖沙咀山林道29-31號廣利樓地下A號舖
電話: 23613118 / 93063858 (WhatsApp)
Facebook: https://www.facebook.com/BASE.852