尖沙咀一向有好多隱世餐廳，真係熟客先搵到好嘢食。好似呢間喺赫德道嘅樓上店「花晨月夕KUNO」，係香港少有工業風廚師發辦，有種《深夜食堂》感覺，氣氛輕鬆唔拘束。
每年得幾個月係海膽季節，師傅都捉緊時間由5月3日起，喺日本引入多款海膽—北海道原隻紫海膽、赤海膽、馬糞海膽，加埋拖羅、白身魚等多款日本食材，打造共17道料理嘅限定「海膽盛宴」。
趁海膽時令季節，特由日本引入多款海膽。
【海膽盛宴$1,880】共17道料理
先付 季節前菜
刺身4品 原隻北海道紫海膽 薄切白身魚配海膽魚子醬 最中餅配海膽拖羅蓉 三色海膽
天婦羅 海膽帶子紫菜卷 北海道魷魚絲配海膽醬
寿し9貫
吸い物 生紫菜海膽蜆肉清湯
甜品 |
「海膽盛宴」足足有17道料理。
【先付】
師傅用咗多款春夏食材設計精緻前菜，當然仲有今次主題嘅海膽啦。鹽水海膽玉子豆腐將兩種軟綿綿食材加埋一齊，口感控一定鍾意。
仲有靜岡縣水果番茄，比普通番茄甜1.5倍㗎～仲有煮螺、日本蟹仔等，豐富擺盤影相好靚。
4款精緻前菜。
【刺身4品】
全部刺身都有海膽，估唔到海膽都有咁多種食法～
原隻北海道紫海膽
紫海膽每年得2、3個月有得食，身價矜貴之餘，味道都特別清甜，回甘度強，每啖都好有層次。
原隻紫海膽，身價矜貴。
薄切白身魚配海膽魚子醬
夏天係白身魚季節，魚味淡雅，配香濃嘅海膽魚子醬啱啱好。
淡雅白身魚，配上海膽魚子醬恰到好處。
最中餅配海膽拖羅蓉
薄脆嘅日本最中餅內，放有超厚切拖羅～上層有滿滿金箔海膽；下層則有金箔拖羅壽司飯。可以好霸氣咁一啖咬落去，多重口感又脆又軟。但身為拖羅控真係忍唔住先咬一啖拖羅先，油脂勁肥美～
超厚切拖羅好搶眼！
三色海膽
師傅每日都會精選當日靚嘅3款海膽，分別配上蟹肉、白身魚、紫蘇葉等唔同食法。
3款海膽都好大份量，對比吓唔同海膽有咩分別先。
【天婦羅】
天婦羅就有海膽帶子紫菜卷、北海道魷魚絲配海膽醬。唔知點解香港比較少見紫菜卷天婦羅，其實嗰種獨特香脆爆餡口感好正，今次終於喺度食到喇，加埋海膽醬更加濃郁惹味。
紫菜卷天婦羅入口爆餡，加埋海膽醬好惹味。
【寿し9貫】
師傅會依當日魚材或你嘅喜好手握壽司，今次我哋有拖羅、吞拿魚、貝類等。夏天時令嘅白身魚都以海膽點綴，以今次主角突出鮮味。
9件壽司大滿足。
【吸い物】
生紫菜海膽蜆肉清湯
如果你去間日本食店飲到碗清徹鮮甜嘅湯，代表師傅手藝有返咁上下。今次嘅熱湯都係清徹見底，入口係驚喜地鮮味，海膽、蜆肉配料亦好有存在感。
鮮甜清湯配啖啖海膽。
【甜品】
甜品亦唔敷衍，睇吓日本哈蜜瓜幾大件！適逢當造期清甜多汁，配脆脆甜品做出層次。
日本哈蜜瓜好大件。
花晨月夕
地址: 尖沙咀赫德道2號金麟商業中心2樓
電話: 29555288