對唔少打工仔嚟講，食晏最重要就係夠快靚正，有多啲時間享受美食好重要。今次介紹嘅「Grill ขนทอง」就係個好推介，銅鑼灣新店位於駱克駅，四款抵食嘅午市套餐供應至下午6:00！放工後Happy Hour或者想醫肚，更有多款串燒同泰式小食選擇。
日賣800碟！招牌串燒配炒飯
有去過蘭桂坊嘅朋友一定認識「Grill ขนทอง」呢間泰式串燒店，難怪兩間店最熱賣嘅午市套餐都係串燒配炒飯！有齊雞肉、豬肉同牛肉，分別醃至入味再高溫燒熟，外層微焦而裡面保留到肉汁。炒飯炒得夠乾爽，粒粒分明，加上豆角粒增加口感層次。銅鑼灣更特別供應泰式串燒雞肉配炒飯，唔食牛嘅朋友都唔使走牛肉啦。
泰式串燒雞、豬、牛配炒飯（配餐飲）
三款串燒都夠入味，微微焦香好加分
皇牌推介 嫩滑肉厚泰式去骨海南雞飯
串燒之外，小店最出名嘅就係佢哋嘅去骨海南雞，唔單止因為已經先去骨，食落啖啖肉夠晒爽，更因為雞皮爽滑、肉質更係非常嫩滑，連雞胸肉都唔會乾！點少少甜豉油同泰式辣醬已經可以帶出雞肉香氣。原來秘訣係要用一定重量嘅雞，太輕嘅話肉唔夠厚，太重嘅話肉質又易老。油飯嘅油香亦好濃郁。
去骨泰式海南雞飯（配餐飲）
海南雞皮爽肉嫩，而且已經去骨，食得更方便！
午市套餐另有泰式青咖喱牛腩飯同青木瓜手撕雞沙律選擇，外賣堂食都好方便，特別係青木瓜手撕雞沙律好啱有Keep Fit需要、或者比較細食嘅女士。
銅鑼灣限定！杯裝Single Shot冬陰功 + 青咖喱大魚蛋
無論行街途中想食少少嘢醫肚，定怕唔夠飽加多個小食，都可以試呢兩款為銅鑼灣新店而新推出嘅小食：冬陰功湯同泰式青咖喱大魚蛋。
冬陰功湯特別以杯裝奉上，更取名為Single Shot，唔單止因為可以好似咖啡咁方便Grab & Go，亦因為冬陰功湯味道酸辣富椰奶香，同咖啡一樣可以幫手提神！又或者放工後一個人想試串燒，配埋冬陰功湯立食一樣得。
Single Shot冬陰功湯
泰式青咖喱大魚蛋顧名思義就係用泰式青咖喱煮大魚蛋，估唔到泰式咖喱同香港嘅經典街頭小食魚蛋又幾夾。同樣用杯裝，內附大量香辣惹味嘅青咖喱醬汁，畀大家一路食一路點，就算係鍾意重口味嘅朋友仔都保證滿足到呀。
泰式青咖喱大魚蛋
營業至凌晨5:30 特設高溫燒爐炮製串燒
餐廳特設燒烤爐，最高可達300°C，縮短燒烤時間保留食材水分
無論係新開嘅銅鑼灣店，定係中環店都營業至凌晨5:30，無懼疫情繼續照顧各位「夜鬼」！放工後最受歡迎嘅自然係泰式串燒同啤酒啦。兩間店都配備特設燒烤爐，因為食材燒得越耐越容易變乾，所以用300°C高溫燒串燒，要燒至啱啱熟保留到最多肉汁，而又唔會咬開中間未熟，就非常考驗師傅手藝啦。
菠蘿有層焦糖面，清甜多汁
豬頸肉肉質爽口，油香十足
串燒不敗秘密：自家醬汁！
串燒本身出色之餘，醬汁亦係靈魂所在。負責人指中環店開業前籌備咗11個月，當中有5至6個月就係不斷研發同調配醬汁！現時有泰式紅雞醬、黃咖喱醬、芫荽酸辣醬、沙爹醬、烤牛肉醬、青咖喱醬、青辣椒醬，每款串燒都有佢嘅「Perfect Match」醬。
客人可以選擇辣定唔辣，再由師傅按食材配搭最適合嘅自家特色醬汁
而串燒嘅最佳拍檔仲有泰國啤酒！On Tap嘅Singha生啤比起樽裝啤酒口感自然更新鮮，而Singha生啤麥香適中，口感清爽，配任何串燒都咁夾呀。
Singha生啤
銅鑼灣店裝修同樣走街頭風格，環境舒適
Grill ขนทอง (銅鑼灣店)
地址: 銅鑼灣駱克道487-489號駱克駅地下
電話: 27166922
Grill ขุนทอง (中環店)
地址: 中環和安里1號地舖
電話: 25301022