中菜一向講求手藝,有鑊氣、夠火喉嘅高質中菜,真係屋企煮唔到㗎!嚟緊母親節、父親節咁多長輩飯局,搵定中菜餐廳就啱喇。呢間喺銅鑼灣嘅「顏府御膳」就由掌廚多年師傅煮製,並於多款經典中菜加入玩味新意,一家大細都啱食。
餐廳裝潢典雅時尚,好配合新派中菜風格。
預訂私人包廂更有隱私度。
夠火喉!新加坡黑胡椒粉絲蟹煲
新加坡傳統小菜—粉絲蟹煲,加入原粒黑胡椒、白胡椒同金不換炒香,比經典口味更刺激。入口辣得快、辣得香,但又唔會嗆同遮蓋蟹肉鮮味,嗜辣者一定食得爽!
特別選用多肉大蟹,用微辣胡椒吊味後啖啖蟹肉都好鮮甜。而且蟹底粉絲吸滿蟹肉精華,撈埋少少蒜香、胡椒食,Q彈香口。
新加坡黑胡椒粉絲蟹煲
蟹鉗好厚肉。
粉絲吸滿蟹肉鮮味。
中西Fusion 慢煮牛肋排
師傅特別引入西餐常見嘅上等美國安格斯牛肋排,再混合中式材料同西式慢煮法。先用香葉、白胡椒、花椒、八角等醃香牛肋排,再用頭抽、燒汁慢煮10個鐘,令牛肋排香得溫和又稍帶辣味,並有慢煮嗰種軟腍口感。
慢煮牛肋排肉質軟腍。
熱湯暖胃 砂鍋濃湯魚肚大芥菜
好多長輩都鍾意飲湯、食魚,呢道「砂鍋濃湯魚肚大芥菜」就啱喇。湯底用新鮮雞、胡椒粒熬製2小時,再加入新鮮大芥菜、沙爆魚肚令味道更豐富。
因為加咗胡椒粒,所以每啖濃郁雞湯都好暖胃,加埋魚肚嘅豐富膠質絕對可以養胃養顏,其實唔只長輩呀,女仔同養生一族都必試。